Alkitab Mobile SABDA
[VER] : [MAKASAR]     [PL]  [PB] 
 <<  Mazmur 68 >> 

1Untu’ pamimping pakelong. Pammujina Daud. (68-2) Ammentemmi Allata’ala ampasisa’la’-sa’laki musunNa, tau birisika ri Ia larimi battu ri dallekanNa.

2(68-3) Nibongkai ke’nanga a’lampa ri Allata’ala, sanrapang umbu nituika ri anging nampa lanynya’. Sanrapang liling assolong lalang pepe’, kammaminjo lanynya’na tau ja’dalaka battu ri dallekanNa Allata’ala.

3(68-4) Mingka tau bajika rannui siagang ma’reja-rejai, akkio’ rannu-rannui ke’nanga ri dallekanNa Allata’ala.

4(68-5) Makkelongko mae ri Allata’ala, pujimi arenNa, pasadiai agang lompoa labattua a’dongko’ rammang. ArenNa Batara, assannang-sannang mako ri dallekanNa!

5(68-6) Allata’ala niaka ammantang ri Balla’ matangkasa’Na a’jari mangge mae ri ana’ kukanga siagang angngagangngangi sikamma jandaya.

6(68-7) Allata’ala assarei tampa’ pammantangngang tau akkale-kalea; nalappassangi tau nitahanga sa’genna mate’ne ke’nanga. Mingka tu mangngewaya mae ri Batara musti ammantangi ri butta rosoka.

7(68-8) O, Allata’ala, ri wattunna Kiulu ummatTa a’jappa allaloi parang kalotoroka,

8(68-9) annekkereki linoa, tattumpai bosia ri dallekanTa, lanri battuna Allata’alana Sinai, Allata’alana Israel.

9(68-10) Allumpai Kipaturung bosia, nampa Kipa’jari baji’ butta rosotTa.

10(68-11) Nampa ammantang ummatTa anjoreng; lalang kabajikanTa, o, Allata’ala, Kiparakai tu kasi-asia.

11(68-12) Assarei kaputusang Batara, nampa sikamma bainea angngerang kabara’:

12(68-13) "Larimi sikamma karaeng-karaenga siagang pasukanna!" Lari ke’nanga sanrapang jangang-jangang bodobangkeng a’lampa anri’ba’. Sikamma bainea ri balla’ a’bage-bage pera’ siagang bulaeng nabokoia ke’nanga. Manna najai tena namminawang a’bundu’, mingka ammetami umma’Na Allata’ala.

13(68:12)

14(68-15) Ri wattunna Napasimbung Kaminang Tinggia sikamma karaenga anjoreng, turummi bosia sangkammaya es batu battu ri Moncong Salmon.

15(68-16) Moncong Basan Iami moncong heba’, moncong jaia coppo’na.

16(68-17) Angngapa nabattu ri anjo coppo’ jainu akkimburu anciniki Bulu’ Sion Napilea Allata’ala untu’ a’jari pammantanganNa? Lammantangi Batara anjoreng sa’genna satunggu-tungguna.

17(68-18) Appulo sa’bu kareta kassa’ Napake ammumba Allata’ala siagang sanna’ mala’biri’Na ri alla’na ke’nanga.

18(68-19) Naiki Batara ri tampa’ tinggia; jai tunitahang Naerang. Annarimai passare battu ri alla’na rupataua ba’lalo battu ri alla’na tau mangngewaya ri Ia; sollanna ammantang ke’nanga assipammantangngang Karaeng Allata’ala.

19(68-20) Pujimi Batara, saba’ Iami ampasalamakki’; allo-allona Napisang erangnganta.

20(68-21) Allata’alata Iamintu Batara Mappasalamaka, Ia allappassangki’ battu ri kamateanga.

21(68-22) Mattantu laNalicaki Allata’ala ulunna musunNa, sikamma tau tulusu’ attallasaka lalang dosa.

22(68-23) Nakana Batara, "He umakKu, Kuerangi musunnu battu ri Basan Kuerangi ke’nanga ammotere’ battu ri dapara’na tamparanga,

23(68-24) sollannu akkulle ambissai bangkennu siagang cera’na ke’nanga, na nilepa’ ke’nanga ri sikamma kongkonnu sa’genna sukku’."

24(68-25) Sikontu taua nacini’mi barisang lompo pammetanTa, o, Allata’ala, Allata’alaku, Karaengku, nirurungammi ri tau jai mange ri tampa’ pammantangnganNa.

25(68-26) A’jappai ri dallekang sikamma pakelonga, ri bokona sikamma pakarena kacapia; ri tangngana sikamma tulolo patunrung rabanaya; kammaminne kelonna ke’nanga:

26(68-27) "Pujimi Allata’ala ri tangnga-tangngana pa’rappunganna umma’Na, pujimi Batara, he sikontu turunganna Yakub!"

27(68-28) Benyamin, suku kaminang ca’dia, a’jappa ri dallekang, nampa a’rurung-rurung sikamma pinggawana tu Yehuda ri bokona sikamma pinggawana tu Zebulon siagang Naftali.

28(68-29) Natuntuki Allata’ala kagassingannu; o, Allata’ala, pakajarreki apa le’baka Kigaukang mae ri kambe.

29(68-30) Sikamma karaenga angngerangi passare mae ri Katte ri BallatTa ri Yerusalem.

30(68-31) Kiga’gara’ laloi tu Mesir, anjo olo’-olo’ sekkeka ri tangngana ruku’ tinggia. Kikalarroi bansa-bansaya, pa’rappungang tedong romanga siagang ana’-ana’na, massing sionjo’-onjokanga untu’ anggappa pera’. Napasimbungi Allata’ala bansa-bansa nangaia a’bundu’.

31(68-32) Sikamma tumalompona Mesir battui angngerang tambaga; tu Sudan apparri-parri angngerang passare mae ri Allata’ala.

32(68-33) Makkelongko mae ri Allata’ala, he sikamma kakaraengang, akkelongko lagu-lagu pammuji mae ri Batara,

33(68-34) mae ri Ia angngoloai alla’ marioloa. Pilangngeri! Batara a’bicara, sa’ranNa a’galutturuki sanna’ heba’na.

34(68-35) Akuimi koasaNa Allata’ala makkanaya nakamma ri Israel, koasaNa sa’genna langi’.

35(68-36) Tamaka appakalannasa’na Allata’alata wattunna assulu’ battu ri tampa’ pammantanganNa. Allata’alana Israel assarei koasa kagassingang umma’Na. Nipujimi Allata’ala!


  Share Facebook  |  Share Twitter

 <<  Mazmur 68 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel