Dual Panel1Pammujina Asaf: se’re kelong-kelong. (83-2) O, Allata’ala, teaKi’ a’mereki, teaKi’ lappakki limanTa siagang ammantang a’mereki.
2(83-3) Ciniki musunTa a’jalloki, sikamma tau birisika ri Katte apparicu ngasengi.
3(83-4) Appareki rancana cara’de’ untu’ angngewai ummatTa; assikongkoloki ke’nanga angngewai sikamma tau Kijagaia.
4(83-5) Nakana ke’nanga, "Umba niancuruki bansa Israel, sollanna nikaluppai arenna ke’nanga."
5(83-6) Assamaturu’mi bansa-bansaya, assikongkolo’mi ero’ angngewaKi’:
6(83-7) bansa Edom, siagang Ismael, tu Moab siagang Hagar;
7(83-8) bansa Gebal, Amon, siagang Amalek, bansa Filistea siagang pandudu’na Tirus.
8(83-9) Kammayatompa Asyur asse’re tommi ke’nanga, a’jari mata-matana turunganna Lot.
9(83-10) Gau’ kammami ke’nanga tu Midian, sangkamma Sisera siagang Yabin ri Binanga Kisyon,
10(83-11) le’baka niancuru’ ri Endor, na’jari pupu’ ri butta.
11(83-12) Gau’mi pamimpinna ke’nanga sangkamma Oreb siagang Zeeb, patunduki tukoasana ke’nanga sangkamma Zebah siagang Salmuna,
12(83-13) lanri nakanamo ke’nanga, "Umba naniempoi butta pammantanganNa Allata’ala."
13(83-14) O, Allata’ala, pasimbung laloi ke’nanga sanrapang limbu’bu’, sanrapang rarame niirikanga ri anging.
14(83-15) Sanrapang pepe’ angkanreai romanga, rinra pepe’ ampamutungai moncong-monconga.
15(83-16) Ondangi ke’nanga siagang anging lompoTa, pabangkai ke’nanga siagang anging puttusutTa.
16(83-17) O, Batara, boli’mi kamma nihina ke’nanga, sollanna naakui ke’nanga kakoasanTa.
17(83-18) Boli’mi kamma tuli nipakasiri’ siagang malla’ ke’nanga, boli’mi kamma mate lalang hina ke’nanga.
18(83-19) Poro naassengi ke’nanga angkana iKatteji bawang Kaminang Tinggi, O, Batara, makoasaya ri sikontu linoa.