Alkitab Mobile SABDA
[VER] : [MAKASAR]     [PL]  [PB] 
 <<  Mazmur 90 >> 

1Pappala’ doanna Musa, atanNa Allata’ala. O Batara, iKattemi tampa’ pa’la’langanna ikambe sikontu turungang.

2Ri tenanapa nipa’jari sikamma moncong-monconga, tenanapa Kipareki buttaya siagang linoa, iKattemi Allata’ala mannannungang, tena pakaramulanTa nataena kala’busanTa.

3Kisuroi rupataua ammotere’ mange ri assala’na, a’jari limbu’bu’ butta sangkamma riolo.

4Untu’ iKatte sisa’bua taung sanrapang sialloji, allalomi allo subangngia; sanrapang passisambeang a’jaga ri wattu bangngi.

5Kilo’lorangi ikambe; sanrapang so’na, sanrapang ruku’ accu’la’;

6attimboi na’bakka’ ri wattu bari’basa’, mingka kalumengi ri wattu karuenna.

7Ta’bangkai ikambe ri kalarroanTa, cappuki posso’ lanri larroTa.

8Kipadongkoki kasalanna ikambe ri dallekanTa, dosa taccokkona ikambe Kicini’ ngasengi.

9Bodoi tallasa’na ikambe lanri kalarroanTa, le’baki taung-taung katallassanna ikambe sanrapang sipa’maikang nappasa’.

10Wattu tallasa’na ikambe poro tujupulo taunji bawang, punna gassing ikambe, sagantujupulo taung. Mingka kasukkarrang siagang kapa’risang bawang nagappa ikambe; le’baki attallasa’ poro sinampe’, allanynya’mi ikambe.

11Inaika angngassengi lompona pangngalarroinTa? Yareka angngassengi kale’bakkanna kalarroanTa?

12Kipakaingaki ikambe antekamma bodona anne tallasaka sollanna a’jari tau tutu baji’ ikambe.

13O, Batara, sa’genna siapa salloTa lalarro? Ammotere’ lalo maKi’ siagang Kikamaseangi ata-atanTa.

14Kipakajaimi pangngamaseanTa mae ri kambe bari’-bari’basa’, sollanna rannu siagang akkelong ikambe lalang sikontu tallasa’na.

15Kisarei kate’neang ikambe sangkamma jaina pa’risika ia le’baka nakasia’ lalang taung-taung ballasa’na ikambe.

16Kipicinikiangi ikambe ata-atanTa sikamma bate paretTa, siagang koasa accayaTa mae ri turunganna ikambe.

17O, Batara Allata’alana ikambe, Kibarakkaki ikambe, sollanna angngerang wassele’ sikamma jama-jamanna ikambe.


  Share Facebook  |  Share Twitter

 <<  Mazmur 90 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2017
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran