Dual Panel1O, Allata’ala, IKatte Allata’ala assarea pa’balasa’, Kipappicinikang laloi pa’balasatTa, o, Batara.
2Ammenteng maKi’, o, Hakinna sikontu linoa, Kiadelimi tau tampoa situru’ panggaukanna ke’nanga.
3O, Batara, sa’genna siapa sallona larannu tau ja’dalaka? Sa’genna siapa sallona, o, Batara?
4Appasuluki ke’nanga kana-kana kasara’, na napattampo-tampoang kaja’dallanna ke’nanga.
5Najallakkangi ke’nanga ummatTa, o, Batara, na nalica’ sikamma tunipileTa.
6Nabunoi jandaya siagang ana’-ana’ kukanga na bansa maraeng ammantanga ri anne pa’rasanganga.
7Nakana ke’nanga, "Tanacinikai Batara, tanijampangiai ri Allata’alana Yakub."
8He bansaku, teako dongo’ kammai anjo, appilajara’ mako ampakei akkala’nu!
9Allata’ala appare’ toli, maka tenaka Nallangngere’? Ia appare’ mata, maka tenaka Naccini’?
10Ia angngajaraki bansa-bansaya, maka tenaka Nahukkungi taua? Ia a’jari guru mae ri sikontu taua, maka tena pangngassenganNa?
11Naassengi Batara pikkirang taccokkona rupataua, Naassengi angkana yangasenna sia-siaji bawang.
12Mate’nei tau Kiajaraka, o, Batara, tau Kiajaraka hukkung-hukkunTa.
13Kipakasannangi ri allo-allo nia’na bala lompo, sa’genna nikekeang kali’bong untu’ anjakkalaki tau ja’dalaka.
14Saba’ talaNabokoiyai Batara umma’Na; talaNabawang-bawangngangiai pisaka Napatanga.
15Nalanipaenteng poleammo hukkunga ri pangadelanga, sikontu tau lambusuka nasitujui ngasengi.
16Inai angngalleia’ battu ri tau dorakaya? Inai angngagangnganga’ angngewai tau a’gau’ ja’dalaka?
17Ebara’ angkana tena Natulunga’ Batara, sike’de’ mama’ a’lette’ mae ri linona tau matea.
18Wattu kunawa-nawana angkana latu’gurukka’, pangngamaseanTa, o, Batara, ampa’jaria’ ammenteng kassa’.
19Punna susa siagang lussa’ pa’maikku, Kisaleoria’ siagang Kipakarannua’.
20Tena Kiagangngangi sikamma haking ja’dalaka, naKipake hukkunga appare’ rancana ja’dala’.
21Assikongkoloki ke’nanga ambaliangi tau lambusuka, siagang anghukkung matei tau tenaya salana.
22Mingka Batara Tumappatojengku, Allata’alaku a’jari pa’la’langangku.
23Nahukkungi tau ja’dalaka situru’ kaja’dallanna, Natongkoki bawana ke’nanga lanri dosana ke’nanga. Karaeng Allata’alata lantongkoki bawana ke’nanga.