Dual Panel1Patang bulang ribokoanganna, ri se’reang allo, iamintu ri bulang Nisan, sitabangi Karaeng Artahsasta angnganre. Inakke ampatalangi je’ne’ inung karaenga. Anjo wattua susai tanjakku nicini’. Tale’bakai susa kamma anjo alloa tanjakku ri dallekanna.
2Lanri kammana, akkuta’nammi ri nakke angkana, "Angngapa nasusa kamma nicini’ tanja’nu, nampa tenaja nugarring? Mattantu nia’ nukalussakkang." Ta’bangkama’,
3kunampa appiali angkana, "Poro la’bui umurutta satunggu-tungguna karaeng! Antekamma talasusa atanta, punna kota pa’jerakkanna boe-boena atanta kamma-kamma anne sesa-sesa rumbangngang mami; pakke’bu’ lompona ancuru’mi nakanre pepe’."
4Akkuta’nammi karaenga angkana, "Jari, apa nukaeroki?" Lalang atingku appala’ doamma’ ri Allata’ala makoasaya ri suruga;
5nampa kukana ri karaenga, "Punna kikaerokang karaeng, nakiero’ anturukianga’ pappalakku, kisuroma’ mange ri butta Yehuda untu’ ambangungi ammotere’ kota tampa’ pa’jerakkanna boe-boena atanta."
6Anjo wattua ammempoi karaenga ri sa’rinna ratua. Naturukiamma’ pappalakku. Akkuta’nangi ri nakke angkana siapa salloku lammantang anjoreng siagang ringngapanna kulammotere’. Jari kupauammi tanggala’ le’baka kupattantu.
7Nampa appala’ma’ sura’ untu’ sikamma guburnur niaka ri propinsi Efrat bageang ilau’, sollanna tena kunggappa kasukkarang lalang pa’jappangku sa’genna mange ri Yehuda.
8Pantaranganna anjo appala’ tomma’ sura’ untu’ Asaf, iamintu pangngurusu’na romanga ri pa’rasanganga, sollanna napasadianga’ kayu untu’ pakke’bu’ lompo pa’jaganga ri ampi’na Balla’Na Batara ri Yerusalem; kammayatompa untu’ tembo’na kotaya siagang balla’ lakupammantangngia. Naturukiang ngasemma’ karaenga anjo pappalakku, lanri Natulunga’ Allata’ala.
9Nampa a’lampama’ mange ri Efrat bageang ilau’. Nia’ kuagang siapa are perwira siagang tantara a’dongko’ jarang. Nirurunganga’ ri ke’nanga saba’ parentana karaenga. Battui anjoreng, kupassareammi anjo suraka mae ri sikamma guburnurka.
10Mingka nalangngere’na Sanbalat, iamintu tu Bet-Horon, siagang Tobia, se’re tunna’gala’ jamang battu ri Amon, angkana battua’ untu’ kaparalluanna bansa Israel, a’jari sanna’mi birisi’na ke’nanga.
11Battuku mange ri Yerusalem, ammari-marima’ tallungallo.
12Lalang siapaya anjo sallona tenapa nakupau manna pole ri nai angkana le’bakka’ nasungkeang Allata’ala pikkirangku untu’ ambangungi ammotere’ kota Yerusalem. Ammukona, ri wattunna bangngi, ambangunga’ nampa kukio’ siapa are agangku untu’ a’lampa assulukang kota. Pantaranganna keledai kudongkokia, tena olo’-olo’ dongkokang maraeng naerang ikambe.
13Bangngi iji nanabokoi ikambe anjo kotaya, ammalo ri Pakke’bu’ Lompo Ka’bung, ri bageang ilau’. A’lampa timboroki ikambe, mange ri Pakke’bu’ Lompo Pa’loroang, ammalo ri Timbuseng Je’ne’ Naga. Lalang a’jappana ikambe kuparessami sikamma kapanrakanna tembo’ kalli’na kotaya. Kammayatompa kucini’ tommi sikamma pakke’bu’ lompo le’baka nakanre pepe’.
14Nampa battu ri rayanganna kotaya a’jappa tulusu’mi ikambe a’lampa wara’, mange ri Pakke’bu’ Lompo Je’ne’ Takkioroka siagang Kollang Karaenga. Mingka anjoreng tena oloang akkullea naolo keledaia, lanri jai duduna sesa-sesa rumbangngang.
15Jari, naummi ikambe ri Ka’bung Kidron nampa napannarrusu’ jappana ikambe anjo bangngia, siagang kuparessami tembo’ kalli’na kotaya. Le’baki anjo a’lekkomi ikambe nampa ammotere’ mange ri kotaya, ammalo ri Pakke’bu’ Lompo Ka’bunga.
16Tena manna sitau battu ri tutoa-toana ra’yaka angngassengi angkana a’lampa kemaea’ siagang apa kurancanakang anjo wattua. Nasaba’ sa’genna anjo wattua tenapa apa-apa kupau mae ri sikamma julu bansaku; baji’ na ri sikamma imanga kammayatompa sikamma tutoa-toana ra’yaka, yareka ri pagawe-pagawea, kammayatompa inai-nai lamminawanga ambangungi kota Yerusalem.
17Mingka kale’bakkanna kukanamo ri ke’nanga, "Cini’ minne antekamma sessana tallasatta! Kota Yerusalem ammantang mami sesa-sesa rumbangngang kammayatompa sikamma pakke’bu’ lompona la’busu’mi nakanre pepe’. Umba nanibangungi ammotere’ sikamma tembo’ kalli’na kota Yerusalem, sollanna tenamo nanahinaki’ taua."
18Nampa kucaritamo ri ke’nanga antekamma bateku nitulung ri Allata’ala siagang apa le’ba’ nakana karaenga mae ri nakke. Appialimi ke’nanga angkana, "Umba kippakkaramula ambangung!" Nampa sadia ngasemmo ke’nanga untu’ appakkaramula anjama.
19Ri wattunna naasseng Sanbalat siagang Tobia kammayatompa Gesyem, tu Arab, anjo rancanana ikambe, nakakkalimi siagang nacau-caumi ikambe. Nakana ke’nanga, "Apa ngaseng lanugaukang? Apaka erokko apparicu angngewai karaenga?"
20Appialima’ angkana, "Allata’ala, makoasaya ri suruga, iami lassarei ikambe pakkulle sa’genna a’jari anne jama-jamanna ikambe. Ikambe anne atanNa siagang lappakkaramulai ambangung ikambe. Mingka ikau ngaseng antu, tena ha’nu siagang tena apa-apannu ri Yerusalem. Ba’lalo punna a’bicara taua ri passala’na Yerusalem, talanitappuai arennu kau."