Dual Panel1(4-17) Tutuko punna erokko a’lampa mange ri Balla’Na Batara. Bajikangngang a’lampako mange anjoreng untu’ appilajara’, kala untu’ assarea koro’bang, sangkamma nagaukanga tau toloa. Anjo ke’nanga takkulleai naasseng angkana kereanga annaba siagang sala.
2(5-1) Appikkirikko rolong nunampa a’bicara, siagang teako linta’ dudu a’janji mae ri Allata’ala. Ia niaki ri suruga nampa ikau niakko ri buttaya. Jari tutuko ri kana-kanannu.
3(5-2) Pila’ ranggaselai taua, pila’ akkullei anggappa so’na kodi. Pila’ jai bicara, pila’ akkullei taua appasulu’ kana-kana tolo.
4(5-3) Jari, punna a’janjiko mae ri Allata’ala, rupai linta’ janjinnu. TaNangaiyai Allata’ala tau a’gau’ toloa. Lanri kammana anjo, rupai janjinnu.
5(5-4) Bajikangngangi tenaya ni’janji, kala a’janjia na tanirupaia.
6(5-5) Teako lanri passala’ kana-kanannu nudoraka, sa’gennu musti mangaku mae ri imang allayania ri Batara, angkana sala pauko ri janjinnu. Untu’ apa nanupakalarro Allata’ala sa’genna Naancuru’ wassele’ jama-jamannu?
7(5-6) Sangkamma jaina so’na tena battuanna, kamma tomminjo jai bicara tena matu-matunna. Mingka malla’ lalo mako mae ri Batara.
8(5-7) Teako lannassi punna nucini’ tukoasaya anjallakkangi tu kasi-asia, narampasa’ ha’na ke’nanga siagang tanasarea ke’nanga kaadelang. Tunggala’ se’rea pagawe nikatutui ri atasanna, nampa rua-ruai nikatutui ri atasang la’bi tinggianganga pangka’na.
9(5-8) Ba’lalo manna karaenga tanjeng tongi mae ri wassele’ kattoa.
10(5-9) Tau balalaya ri doe’, tale’bakai ganna’-ganna’ doe’na; tau pongoroka ri barang-barang, tale’bakai sangga sukku’ ri passawallang. Yangasenna sia-siaji bawang.
11(5-10) Pila’ jai kakalumanynyangngang ri se’rea tau, pila’ jai tau maraeng musti nasare kanre. Tena passawallang mae ri patanna, poro naassennaji bawang angkana akkalumanynyangi.
12(5-11) Setrea pajama akkullei tagannakka ri kanre, mingka kaminang sike’de’na akkullei baji’ tinrona. Kabalekanna, se’rea tau kalumanynyang, jai sikali barang-baranna, sa’genna takkulleai attinro napakamma lussa’.
13(5-12) Nia’ kucini’ ri anne linoa sanna’ appakasi’nana pa’mai’: Nia’ se’re tau appatambung barang-barang untu’ wattu kakurangang.
14(5-13) Mingka tappela’ ngasengi anjo baranga lanri nia’na bala, sa’genna tenamo apa-apa akkulle nasareangi ana’-ana’na a’jari warisi’.
15(5-14) Ri wattunta nilassukang assolarakki’; kamma tomminjo punna nibokoi linoa anne, tena apa-apa battu ri wassele’ posota nierang.
16(5-15) Anjo kammaya teai sipato’ appakasi’nana! A’lampaki’ sangkamma ri wattunta battu. Nimangngangngi kalenta untu’ angngondang anging, nampa apa wassele’na?
17(5-16) Lalang tallasatta, kammaki’ tau angngosala’ lalang ri sassang, susa-susaki’, lussakki’, birisikki’, siagang pa’risi’ pa’maikki’.
18(5-17) Jari kupahammi angkanaya ia kaminang bajika mae ri katte iamintu angnganre, angnginung, siagang nipikasiakki wassele’ jama-jamanta lalang katallassang sinampe’ Napassareanga Allata’ala mae ri katte; iami anjo sarenta.
19(5-18) Punna nia’ sitau annarima kakalumanynyangngang siagang barang-barang battu ri Allata’ala, nampa nisare ising untu’ ampinyamangngi anjo kakalumanynyangnganna, musti appala’ sukkuruki siagang nakasia’ baji’ sikontu wassele’ jama-jamanna. Anjo kammaya passareNa tonji bawang Allata’ala.
20(5-19) Nabonei Allata’ala sa’genna rassi pa’mai’na taua anjo siagang karannuang; jari tena nalussa’ annawa-nawai ri passala’ sinampe’naja anne tallasaka.