Dual Panel1"Kamaseangi Karaeng Allata’alanu, siagang tuli mannurukiko ri sikontu parentaNa.
2U’rangi kamma-kamma anne apa nuassenga ri passala’na Batara battu ri pangalamannu. Ana’-ana’nu tenapa naassengi anjo pangalamang kammaya. Ikaumi le’ba’ anciniki kalompoanNa Karaeng Allata’alanu, kagassinganNa, kakoasanNa,
3siagang sikamma gau’ appakalannasa’ le’baka Nagaukang. Kalennu anciniki apa Nagaukanga mae ri karaeng Mesir siagang sikontu pa’rasanganna.
4Nuciniki antekamma bateNa Batara angngancuruki tantarana tu Mesir siagang sikontu jaranna siagang kareta bundu’na ke’nanga. Nitallangngang ngasengi ke’nanga ri Tamparang Alara’ ri wattunna naondangko ke’nanga.
5Nuassengi apa Nagaukanga Batara untu’ ikau ri parang lompoa ri wattu tenanapa nubattu mae anrinni.
6Nuu’rangi tongi apa Nagaukanga Batara mae ri Datan siagang Abiram, ana’-ana’na Eliab battu ri suku Ruben. Ri dallekannu ngaseng, nuciniki ta’bage rua buttaya nampa nia’lu’ ke’nanga siagang kaluargana, kemana, sikontu atanna kammayatompa sikontu olo’-olo’na ke’nanga.
7Jari, nucini’ ngasemmi siagang mata kalennu sikontu gau’ appakalannasa’ le’baka Nagaukang Batara."
8"Turuki sikontu hukkung kupabattua mae ri kau anne alloa, sollanna nukkulle allimbangi binangaya siagang antama’ ri pa’rasangang tenayamo nasallo nanupammantangngi.
9Siagang lattallasa’ mako sisalloang ri pa’rasangang kalumanynyanga siagang copponga buttana, iamintu Napa’janjianga Batara mae ri boe-boenu siagang mae ri jari-jarina ke’nanga.
10Anjo pa’rasangang nupammantangngia sallang tena nasangkamma butta Mesir, iamintu tampa’ nupammantangngia riolo. Anjoreng ri Mesir musti anjama battalakko untu’ ansarei je’ne’ panai’ kokonnu punna erokko appakioro’ bine.
11Mingka anjo pa’rasangang lanupantamakkia iamintu daera moncong siagang ka’bung; tuli nibasai ri bosi buttana.
12Naparakai Karaeng Allata’alanu anjo pa’rasanganga siagang najagai a’bujuru’ taung.
13Jari turuki lalomi parenta-parenta kupabattua mae ri kau anne alloa; kamaseangi Karaeng Allata’alanu siagang gaukangi ibadanu mae ri Ia lalang sikontu batangkalennu siagang nyawanu.
14Punna nugaukang anjo kammaya, lappaturungi bosi Batara mae ri buttanu punna narapi’ wattunna, ri le’ba’nu akkatto, siagang ri wattunnu appakkaramula annanang. Jari langgannaki gandunnu, anggoro’nu siagang minynya’ zaitunnu,
15kammayatompa rukuka untu’ olo’-olo’ piaranu. Sikontu kanre-kanreang nuparalluia lasadia ngasengi untu’ ikau.
16Teako erokki nipakabella battu ri Batara untu’ anynyomba siagang ampare’ atai kalennu mae ri rewata-rewata maraenga.
17Punna nudakkai anjo parentaNa, lalarroi Batara mae ri kau. Tena Nalappaturung bosi; la’jari kalotoro’ taba sikali buttanu sa’genna tenamo wassele’na lamung-lamunnu. Jari tasalloami numate ri butta coppong Napassareanga Batara mae ri kau.
18U’rangi siagang parhatikangi anjo parenta-parentaya. Sikkokangi ri limannu siagang patabai ri abannu sollanna tuli nuu’rangi.
19Pangngajarrangi mae ri ana’-ana’nu. Bicarakangi lalang ri balla’nu siagang ri pantaranganna balla’nu, wattunnu ammari-mari siagang ri wattunnu anjama.
20Tulisiki ri benteng pakke’bu’ balla’nu siagang ri pakke’bu’ lomponu.
21Na ikau siagang ana’-ana’nu lanipakala’bui umuru’nu ri pa’rasangang Napa’janjianga Karaeng Allata’alanu mae ri boe-boenu. Lalang nia’na langika irateanna buttaya, kamma tomminjo sallonu lammantang ri anjo buttaya.
22Turuki siagang pa’mai’ tamamminra sikontu hukkung kupabattua mae ri kau, iamintu: Kamaseangi Karaeng Allata’alanu, gaukangi sikontu apa Naparentakanga mae ri kau, siagang paralluko tuli tamamminra pa’mai’ mae ri Ia.
23Na Batara lambongkai anjo sikontu bansaya battu ri dallekannu, siagang kau lampammantangngi buttana bansa-bansa lompoangnganga siagang kassakangnganga naikau.
24Sikontu daera naonjoka bangkennu la’jari nupatangi. Ia daeranu iamintu battu ri parang lompo bageang timboro’ sa’genna mange ri Moncong Libanon bageang wara’, kammayatompa battu ri Binanga Efrat ri bageang iraya sa’genna mange ri Tamparang Tangngaya ri bageang ilau’.
25Ri sikontu anjo pa’rasanganga laNapa’jari malla’ ngasengi Karaeng Allata’alanu sikontu taua mae ri kau sangkamma le’baka Napa’janjiang, sa’genna manna sitau tania’ akkulle anrompaiko.
26Anne alloa akkullei nupilei kalase’renna iamintu barakkaka yareka pattunraya.
27Lanibarakkakiko punna mannurukiko ri parenta-parentaNa Karaeng Allata’alanu, ia kupabattua mae ri kau anne alloa.
28Mingka lanitunraiko punna tena numannuruki mae ri parenta-parentaNa Karaeng Allata’alanu, passangalinna ta’gilingko untu’ anynyomba ri rewata-rewata maraenga ia tenaya nale’ba’ nusomba.
29Punna le’ba’ mako Naerang Karaeng Allata’alanu antama’ ri pa’rasangang nupammantangngia sallang, anjo barakkaka musti nupaui battu ri Moncong Gerizim siagang anjo pattunraya nupaui battu ri Moncong Ebal
30(Anjo ruaya moncong niaki ri laukanna Binanga Yordan ridaerana tu Kanaan ammantanga ri Ka’bung Yordan, a’dalle’ kalau’ tena nabella battu ri poko’-poko’ tampa’ ibadaya ri More ri ampi’na kota Gilgal.)
31Tassalloami nanu’limbang ri Binanga Yordan siagang nupammantangngi butta Napassareanga Karaeng Allata’alanu mae ri kau. Punna le’baki nualle anjo buttaya siagang punna ammantang mako anjoreng,
32musti nuturuki sikontu hukkung kupabattua mae ri kau anne alloa."