Alkitab Mobile SABDA
[VER] : [MAKASAR]     [PL]  [PB] 
 <<  Ulangan 15 >> 

1"Ri kala’busanna tunggala’ taung makatujua musti nugaukangi nikanaya kalappassang pappinrang.

2Kammaminne carana. Sikamma tu Israel niaka doe’ pappinranna mae ri tau julu bansana, musti nabilang lappasa’mi anjo pappinranna, lanri situru’ katantuang KalenNa Batara anjo inranga nibilang lappasa’mi, jari takkulleami nisingara’.

3Akkullei nusingara’ doe’ nupappinrangnganga mae ri tu bansa maraenga, mingka takkulleami nusingara’ doe’ nupappinrangnganga mae ri julu bansanu.

4LaNabarakkakiko Karaeng Allata’alanu ri pa’rasangang Napassareanga mae ri kau. Jari latena tu kasi-asi ri tangnga-tangngana bansanu,

5assala’ mannurukiko mae ri Karaeng Allata’alanu, siagang nugaukang baji’ sikontu apa kuparentakanga mae ri kau anne alloa.

6Karaeng Allata’alanu lambarakkakiko sangkamma le’baka Napa’janjiang. Lajai bansa nusare angnginrang doe’, mingka ikau kalennu tena nulangnginrang; lajai bansa nukoasai, mingka tena nalanakoasaiko ke’nanga.

7Punna ammantang mako sallang ri pa’rasangang Napassareanga Karaeng Allata’alanu mae ri kau, nampa ri kalase’renna kotanu nia’ julu bansanu kakurangang, teako kabajikang kalennu bawang nuparhatikang siagang taerokako ambantui.

8Mingka, musti lammoro’ pa’maikko mae ri anjo taua siagang sarei angnginrang siapa-siapa jaina naparalluang.

9Teako appareki alasang angkanaya a’reppese’mi taung kalappassanna inranga, sa’genna tena nuero’ ansarei angnginrang. Teako lappassangngi anjo pikkirang ja’dala’ kammaya antama’ ri pikkirannu. Punna tanusarea angnginrang, anjo taua lakkioki mae ri Batara ampabattui anjo passalaka, nampa ikau lanisalakang.

10Pakasannangi pa’mai’nu na nurella assarei anjo taua, na Nabarakkaki Karaeng Allata’alanu sikontu usahanu.

11Ri alla’na bansa Israel tuli lania’na siapa are tu kasi-asi siagang kakurangang. Lanri kammana anjo nakuparentakangko sollannu lammoro’ pa’mai’ mae ri ke’nanga."

12"Punna nia’ tu bura’ne yareka baine battu ri bansanu ambalukangi kalenna untu’ a’jari atannu, musti anjamai ri kau lalang annang taung sallona. Ri taung makatujua, musti nupakabebasaki anjo taua.

13Anjo ata bebasakamo, takkulleai a’lampa nampa tanusarea apa-apa.

14Sarei siagang lammoro’ pa’mai’nu apa Napassareanga Karaeng Allata’alanu mae ri kau, iamintu: gimbala’, gandung siagang anggoro’.

15U’rangi angkanaya ikau ata tonjako riolo ri Mesir nampa nipakabebasakko ri Karaeng Allata’alanu; iaminjo saba’na nakupassareang anne parentaya mae ri kau.

16Mingka punna taeroka anjo ataya a’lampa lanri mangngaina mae ri kau siagang mae ri kaluarganu, siagang sannangi ero’ ammantang siagang ikau,

17erangi anjo taua mae ri pakke’bu’ balla’nu siagang tintingi tolinna, nampa la’jari atami ri kau lalang sikontu umuru’na. Kamma tomminjo musti nugaukang mae ri ata bainea.

18Punna nia’ ata ero’ nupakabebasa’, teako lussakki pa’mai’nu, nasaba’ annang taummi le’ba’ anjama ri kau siagang gaji bageruanna gajina se’rea palayang. Gaukangi anjo parentaya, na Nabarakkaki Karaeng Allata’ala sikontu usahanu.

19Ana’ sapi laki siagang ana’ gimbala’ laki bungasa’ lassuka musti nipassareangi mae ri Karaeng Allata’ala. Anjo sapia takkulleai nipake untu’ appa’jeko, siagang anjo gimbalaka takkulleai nicukkuru’.

20Tunggala’ taung ikau siagang sikontu kaluarganu musti nukanrei dagenna ri dallekanNa Karaeng Allata’ala, ri tampa’ ibada Napattantua.

21Mingka punna nia’ caca’na anjo olo’-oloka, ebara’na akkeppangi yareka butai yareka caca’ battala’ maraengannaya, takkulleai nupassareang mae ri Karaeng Allata’alanu.

22Tunggala’ taua, baji’ natangkasa’ yareka ra’masaki, akkullei nakanre ri balla’na, sangkamma angnganre dageng jonga yareka dageng kijang.

23Cera’na takkulleai nukanre, mingka musti nutumpai naung ri buttaya sangkamma je’ne’."


  Share Facebook  |  Share Twitter

 <<  Ulangan 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel