Dual Panel1"Nampa a’giokki’ a’lampa wara’, mange ri Basan. Majumi Karaeng Og, iamintu karaeng Basan, siagang sikontu tantarana untu’ ambundukiki’ ri ampi’na kota Edrei.
2Mingka Nakanamo Batara mae ri nakke, ‘Teako mallakki mae ri ia, Musa. LaKupassareangi anjo taua mae ri kau, kammayatompa tantarana siagang sikontu daerana. Gaukammi mae ri ia sangkamma apa le’baka nugaukang mae ri Sihon, karaenna tu Amori ammarentaya ri Hesybon.’
3Jari Napassareang tommi Karaeng Allata’alata anjo Karaeng Og siagang ra’ya’na mae ri katte, nampa nibeta kabusu’mo anjo ke’nanga.
4Anjo wattua nirampasa’mi sikontu kotana ke’nanga; tena manna se’re ammantang tassesa. Kabusu’na nia’ annampulo kota nirampasa’ ri sikontu daera Argob, niparentaya ri Karaeng Og battu ri Basan.
5Sikontu anjo kotaya nipakajarreki siagang tembo’-tembo’ pattahangngang tinggia; nipakajarreki siagang pakke’bu’-pakke’bu’ lompo siagang panjoli pakke’bu’ kassaka untu’ antongkoki pakke’bu’ lompona anjo kotaya. Pantaranganna anjo nia’ jai kota maraeng tenaya nammake kalli’ tembo’.
6Sikontu anjo kotaya niancuru’ kabusuki; sikontu tu bura’nea, tubainea siagang ana’-anaka nibuno kabusuki, sangkamma le’baka nigaukang mae ri kota-kotana Karaeng Sihon battu ri Hesybon.
7Olo’-olo’na ke’nanga niallei siagang kota-kotana ke’nanga nirampasaki.
8Anjo wattua niallei battu ri anjo ruaya karaeng Amori iamintu daera niaka ri bageang timboranna Binanga Yordan siagang Binanga Arnon sa’genna mange ri Moncong Hermon.
9(Anjo Moncong Hermon niarengi Siryon ri tu Sidon, nampaniarengi Senir ri tu Amori.)
10Niallei sikontu daerana Karaeng Og battu ri Basan: kota-kotana ri lappara’ tinggia, daera Gilead siagang Basan, tulusu’ anrai’ sa’genna kota Salka siagang Edrei bellana."
11(Anjo Karaeng Og iami karaeng kala’busanga ri tuRefaim. Patti maya’na iamintu batu nipare’; la’buna appa’ metere’ na sangkara’na a’biringi rua metere’ situru’ siagang ukkurang le’baka nipattantu. Sa’genna kamma-kamma anne akkulle iji nicini’ ri Raba, kotana tu Amon.)
12"Ri wattunna nikammaimo anjo buttaya, kupassareammi ri Ruben siagang mae ri Gad daera warakkanna kota Aroër ri ampi’na Binanga Arnon, siagang sipa’gang battu ri daera monconna Gilead kammayatompa kota-kotana.
13Anjo sesa bageruanna daera Gilead kupassareangi mae ri bageruanna suku Manasye; kammayatompa daera Basan le’baka nijaja ri Karaeng Og iamintu sikontu daera Argob." (Anjo Basan alla’bangi niasseng salaku pa’rasanganna tu Refaim.
14Yair battu ri suku Manasye angngallei anjo sikontu daera Argob, iamintu battu ri Basan sa’genna ri pa’baeng-baenna Gesur siagang Maakha. Naaremmi anjo desa-desaya sangkamma areng kalenna, na sa’genna kamma-kamma anne tuli alla’banna niasseng salaku desa-desa Yair.)
15"Daera Gilead kupassareangi mae ri golongang Makhir battu ri suku Manasye.
16Nampa mae ri suku-suku Ruben siagang Gad kupassareangi daera niaka ri alla’na Gilead siagang Binanga Arnon. Tangnga-tangngana anjo binangaya a’jari pa’baeng-baenna ke’nanga ri bageang timboro’, nampa ri bageang wara’ a’baeng-baengi ke’nanga siagang Binanga Yabok.
17Ri bageang ilau’, daerana ke’nanga narapiki sa’genna ri Binanga Yordan, battu ri Tamparang Galilea bageang wara’ sa’genna ri Tamparang Matea ri bageang timboro’, tulusu’ sa’genna ri bangkeng Moncong Pisga ri bageang iraya.
18Anjo memang wattua kusaremi ke’nanga parenta kammaya anne: Nasareko Karaeng Allata’alanu daera rayanganna Binanga Yordan untu’ a’jari pammantangngannu. Mingka sikontu tantaranu musti angngerangi sanjata nampa a’limbang ri Binanga Yordan ri dallekanna suku-suku Israel maraenga.
19Tubai’-bainenuji bawang siagang sikamma ana’nu kammayatompa anjo olo’-olo’ jainu akkulle ammantang ri kota-kota le’baka kupassareang mae ri kau.
20Bantui julu bansanu sa’genna napammantangngi ke’nanga butta laNapassareanga Karaeng Allata’alanu mae ri ke’nanga ri laukanna Binanga Yordan; kammayatompa sa’genna nisare pangngellai ke’nanga attallasa’ siagang amang anjoreng, sangkamma Nagaukanga Batara anrinni mae ri kau. Le’bappi anjo kammaya nampako akkulle ammotere’ mae ri butta le’baka kupassareang mae ri kau.
21Nampa kukana ri Yosua: Le’ba’mi nucini’ sikontu apa Nagaukanga Karaeng Allata’alanu mae ri Sihon siagang Og, anjo ruaya karaeng. Kamma tomminjo apa laNagaukanga mae ri sikamma karaeng eroka nualle buttana.
22Teako mallakki mae ri ke’nanga, lanri Karaeng Allata’alanu labarjuang untu’ ikau."
23"Anjo wattua appala’ doamma’ mae ri Batara angkana:
24O, Batara Kaminang Tinggia, kuassengi Batara, angkanaya anne sikamma apa Kipappicinikanga mae ri nakke, nampami pakaramulanna sikamma gau’ malompoTa siagang gau’ mappakalannasatTa. Tena ruanTa Allata’ala ri langika kammayatompa ri buttaya, akkullea anggaukangi sikamma gau’ hebaka.
25Kisarema’ pangngellai untu’ allimbangi Binanga Yordan, Batara, untu’ anciniki pa’rasangang copponga buttana, moncong ga’gaya siagang Monconna Libanon.
26Mingka passabakkang ikau ngasemmi Nalarro Batara mae ri nakke sa’genna tena Naturukianga’ pappalakku. Kabalekanna Nakana Batara, ‘Sikamma monjo Musa, tea’ mako paui pole anjo passalaka!
27A’lampa mako mange ri Moncong Pisga siagang accini’ mako wara’ siagang timboro’, anrai’ siagang kalau’. Parhatikangi baji’-baji’ anjo apa nucinika, nasaba’ ikau tena nalanulimbang Binanga Yordan.
28Ajara’mi siagang saremi pangngunju’ Yosua. Pakajarreki pa’mai’na, nasaba’ iami lampimpingi anjo bansaya untu’ a’limbang siagang angngallei anjo pa’rasangang nucinika.’
29Jari ammantang maki’ ri ka’bung ba’leanna kota Bet-Peor."