Dual Panel1"Nasuroa’ Karaeng Allata’alanu ampangngajarrangi sikontu anne hukkunga mae ri kau ngaseng, sollanna nugaukangi sallang ri pa’rasangang tenayamo nasallo nanupammantangngi.
2Paralluko ikau siagang jari-jarinu ampakala’biriki karaeng Allata’alanu lalang sikontu tallasa’nu siagang nuturuki sikontu hukkung kupabattua mae ri kau, sollanna la’bu umuru’nu ri anjo pa’rasanganga. Lanri kammana anjo, pilangngeri
3sikamma sari’battangku ngaseng; gaukangi anjo kammaya siagang pa’mai’ tamamminranu, sollannu salewangang siagang a’jari bansa lompo ri pa’rasangang kalumanynyanga siagang copponga buttana, sangkamma Napa’janjianga Karaeng Allata’alana boe-boeta.
4U’rangi sikamma sari’battangku! Bataraji bawang, siagang Bataraji bawang Allata’alata!
5Kamaseangi Karaeng Allata’alanu siagang sikontu pa’mai’nu: Pappicinikangi kammaya anjo lalang ampe-ampe tallasa’nu siagang lalang ri panggaukannu.
6Tea’ laloko kaluppai parenta-parenta kupassareanga mae ri kau anne alloa.
7Pangngajarrangi mae ri ana’-ana’nu. Parallui nucaritakang ilalang ri balla’nu siagang ri pantarang balla’nu, wattunnu ammari-mari siagang ri wattunnu anjama.
8Pasikkoki anjo mae ri limannu siagang patabai mae ri abannu sollanna tuli nuu’rangi.
9Tulisiki ri pakke’bu’ balla’nu siagang ri pakke’bu’ lomponu."
10"A’janji Karaeng Allata’alanu mae ri boe-boenu iamintu Abraham, Ishak siagang Yakub angkanaya laNapassareangi anjo pa’rasanganga mae ri kau. Kota-kotana lompoi siagang coppongi, nampa teai ikau ambangungi.
11Rassi ngasengi balla’na siagang barang-barang baji’, nampa teai ikau ambonei anjo ballaka. Nia’ lanugappa siapa jaina bungung, nampa teai ikau angkekei. Langgappako koko-koko anggoro’ siagang koko zaitun, nampa teai ikau allamungi. Punna Naerangko Batara mange ri anjo pa’rasanganga, nampa nia’ ngaseng kanre-kanreang nukaerokia untu’ nukanre,
12katutui baji’-baji’ sollanna tena nutakkaluppa mae ri Batara, le’baka allappassangko battu ri Mesir, tampa’ le’baka nupammantangngi nipare’ ata.
13Pakala’biriki Batara, Allata’alanu, siagang Ia bawang nusomba; siagang punna assumpako, gaukammi anjo lanri arenNa bawang.
14Teako anynyombai ri rewata-rewata maraenga, ia nasombaya bansa-bansa niaka ammantang ri tammulilinu.
15Punna anynyombako mae ri rewata-rewata maraenga, lanitujuko ri pangngalarroiNa Karaeng Allata’alanu siagang lanipanrakiko taba sikali, lanri anjo Karaeng Allata’alanu niaka ri tangnga-tangnganu taerokai nipasangkamma siagang apa-apa maraenganga.
16Teako paccoba-cobai Karaeng Allata’alanu sangkamma nugaukanga ri Masa.
17Turuki sikontu hukkung Napassareanga Karaeng Allata’alanu mae ri kau.
18Gaukangi apa Nakanaya baji’ siagang adele’ Batara, na nusalewangang. Butta coppong Napa’janjianga Batara mae ri boe-boenu, lanupatangi,
19siagang lanubongkai musu-musunnu sangkamma Napa’janjianga Batara.
20Ri allo ri boko lakkuta’nangi ana’-ana’nu mae ri kau angkana, ‘Angngapai Karaeng Allata’alata naNasuroki’ anturuki sikontu anjo parentaya?’
21Musti appialiko angkana, ‘Riolo nipa’jari ataki’ ri karaeng Mesir, mingka Nalappassangki’ Batara siagang kakoasang lompoNa.
22Kalenna ikambe anciniki sikamma gau’ appakalannasa’ Nagaukanga Batara siagang sikamma apa-apa appakamalla’ Nagaukanga mae ri tu Mesir siagang ri karaenna ke’nanga, kammayatompa sikontu pagawena.
23Ia allappassangki’ battu ri Mesir sollanna Naerangki’ mae anrinni, nampa Napassareang anne buttaya mae ri katte sangkamma Napa’janjianga mae ri boe-boeta.
24Nasuroki’ Karaeng Allata’alata anturuki siagang anggaukangi sikontu anjo parentaya kammayatompa mappakala’biri’ mae ri Ia. Punna nigaukangi kammaya anjo, latuli Naparakai bansata sollanta tuli salewangang lalang tallasatta.
25Punna tamamminraya nyawata anturuki sikontu apa Naparentakanga Karaeng Allata’alata mae ri katte, lamangngellai mae ri katte.’"