Dual Panel1"LaNaerangko Karaeng Allata’alanu mange ri pa’rasangang lanupammantangngia, siagang jai bansa laNabongka battu anjoreng. LaNabongkai tujua bansa la’bi lompo siagang la’bi kassakkangngang na ikau ri dallekang matannu, iamintu: Tu Het, Girgasi, Amori, Kanaan, Feris, Hewi siagang Yebus.
2Punna Napassareang Karaeng Allata’alanu anjo bansa-bansaya antama ri kakoasannu siagang nubeta ke’nanga, buno ngasengi anjo ke’nanga. Teako kamaseangi ke’nanga siagang teako appareki parjanjiang siagang ke’nanga.
3Takkulleako a’bunting siagang ke’nanga, siagang teako pa’biangngi ana’-ana’nu a’bunting siagang ke’nanga,
4sollanna tena nanipakabella ana’-ana’nu ri ke’nanga battu ri Batara, untu’ anynyomba ri rewata-rewata maraenga. Punna anynyombako mae ri rewata-rewata maraenga, larroi Batara siagang laNaancuru’ memangko silalonna.
5Lanri kammana anjo, rumbangi tampa’-tampa’ pakkoro’bangnganna anjo bansa-bansaya, ancuru’ ngasengi benteng-benteng batu nakanaya ke’nanga karamaki, ra’bai gamba’-gambara’na barhala Asyera, siagang tunui sikamma patung-patung barhala nasombaya ke’nanga.
6Gaukangi anjo kammaya lanri ikau Karaeng Allata’alanu ampatangko. Battu ri sikontu bansaya ri anne linoa, ikaumi Napile Karaeng Allata’alanu untu’ a’jari umma’Na kaminang Nangaia.
7Nakamaseangko siagang Napileko Batara, teai lanri la’bi lompoangangko na bansa-bansa maraenga; sikontu tojenna ikau bansa kaminang ca’di ri sikontu linoa.
8Mingka Napileko Batara lanri Nakamaseangko siagang eroki Narupai janji Napareka siagang boe-boenu. Iaminjo saba’na nale’ba’ mako Napasalama’ siagang kakoasang lompoNa siagang Nalappassangko battu ri nipare’ atanu battu ri karaeng Mesir.
9U’rangi angkanaya Karaeng Allata’alanu bawang Allata’ala, tena pantaranganna, siagang Iami Allata’ala tamamminraya nyawaNa. Narupai Batara janjinNa siagang Napappicinikangi pangngamaseanNa tenaya tappu’na sa’genna sisa’bu turungang mae ri tau mangngamaseanga ri Ia siagang mannurukia ri parenta-parentaNa.
10Mingka tena todong Nabata-bata anghukkungi tau birisika ri Ia.
11Jari, turuki sikontu hukkunNa kupabattua mae ri kau anne alloa."
12"Punna nuparhatikang anjo parenta-parentaya, siagang nugaukang tamattappu’, tena todong namamminra pa’mai’Na Karaeng Allata’alanu mae ri parjanjiang Napareka siagang ikau ngaseng. LaNapappicinikangi pangngamaseang tamattappu’Na mae ri kau, sangkamma Napa’janjianga mae ri boe-boenu.
13LaNakamaseangko siagang laNabarakkakiko, sa’genna a’jari jai ana’nu na pila’ katambang jainu. LaNabarakkaki sikamma kokonnu, sa’genna angngerang wassele’ gandung, anggoro’ siagang minynya’ zaitun. LaNabarakkakiko sa’genna a’jari jai sapinu, bembenu siagang gimbala’nu. Sikontu anjo barakkaka lanutarimai ri pa’rasangang Napassareanga Batara mae ri kau, situru’ janjinNa mae ri boe-boenu.
14Battu ri sikontu bansaya ri lino, tena manna se’re anggappa barakka’ alla’bi-la’bi kammaya ikau ngaseng. Ikau ngaseng siagang sikontu olo’-olo’nu tena sikali latamanang.
15LaNala’langiko Batara battu ri sikontu garringa siagang Napakabellako battu ri sikontu bala sangkamma le’baka nucini’ ri Mesir, ba’lalo anjo balaya musu-musunnu Napitujui.
16Sikamma bansa Napassareanga Karaeng Allata’alanu ri kakoasannu musti nuancuruki; teako kamaseangngi ke’nanga. Teako anynyombai ri rewata-rewatana ke’nanga, lanri anjo panggaukang kammaya napangngerangangko bala.
17Gassing nupikkiriki angkanaya la’bi jaiangngangi anjo bansa-bansaya sa’genna tanukulleai ambongkai ke’nanga.
18Mingka teako mallakki mae ri ke’nanga; u’rangi apa le’baka Nagaukang Karaeng Allata’alanu mae ri karaeng Mesir siagang sikontu ra’ya’na.
19U’rangi sikamma bala lompo nucinika kalennu, gau’-gau’ appakalannasa’, siagang kakoasang lompo Napakea Karaeng Allata’alanu untu’ allappassangko. Kamma tomminjo laNagaukanga Karaeng Allata’alanu mae ri sikontu bansa nukamallakkanga.
20Ba’lalo lappa’niaki Karaeng Allata’alanu karicuang ri tangnga-tangngana ke’nanga, sa’genna manna tau laria siagang accokkoa lapanra’ ngaseng tonji.
21Jari teako mallakki mae ri anjo bansa-bansaya. Karaeng Allata’alanu lanjagaiko. Iami Allata’ala malompo siagang sannaka heba’na.
22Anjo bansa-bansaya laNabongka tassike’de’-ke’deki battu ri dallekannu. Takkulleai linta’ dudu nuancuru’ ke’nanga, sollanna tena napila’ katambang olo’-olo’ sekkeka akkullea ambahayakangko.
23Kammaminjo bateNa Karaeng Allata’alanu lampassareangi musu-musunnu mae ri kau. LaNapasimbung-simbungi ke’nanga sa’genna ancuru’ ke’nanga.
24LaNapassareangi sikamma karaenna ke’nanga mae ri kau. Lanubunoi ke’nanga, nampa nikaluppaimo arenna ke’nanga. Tena manna sitau akkulle attahang andallekangko; anjo ke’nanga lanuancuru’ ngasengi.
25Tunui sikamma patung-patung barhala nasombaya ke’nanga. Teako cinnai ri pera’ yareka bulaeng niaka ri kalenna siagang teako allei untu’ kalennu. Punna nudakkai anjo parentaya tena tamatenu, nasaba’ Nakabirisi Karaeng Allata’alanu anynyombaya ri patung barhalaya.
26Teako ammoliki patung barhala lalang balla’nu, sollanna anjo pattunra antujuai tena natuju tongko. Anjo apa kammaya musti numusui siagang musti nupakatunai, lanri nitunrai ri Batara."