Dual Panel1Nakana Batara ri nakke,
2"He tau, callai na’bi-na’bina Israel appabattua boto napare’-pare’ kalenna. Suroi ke’nanga ampilangngeri kanangKu."
3Nakana Batara Kaminang Tinggia, "Cilakai anjo na’bi-na’bi toloa! Anjo panggappana sangnging pikkirang napare’-pare’, siagang anjo paccini’na sangnging balle-balle bawang.
4He Israel, na’bi-na’binu tena matu-matunna, sangkamma serigala-serigala ammantanga ri tangnga-tangngana rumbanna kotaya.
5Tena ke’nanga najagai tembo’-tembo’ runtunga, siagang tena todong napakabajiki anjo tembo’-temboka. Jari, takkulleai nipartahangkang Israel punna kajariang bunduka ri allo battuKu anghukkungi.
6Sikamma paccini’na ke’nanga sangnging tena nakontutojeng siagang sikamma botona ke’nanga sangnging balle-balle. Naani ke’nanga kalenna angngerang pasang battu ri Nakke, padahala’ iNakke tena le’bakai Kusuro ke’nanga. Antekamma lakkulle ke’nanga manrannuang ri botona ke’nanga anjo angkana la’rupai?
7INakke, Batara Kaminang Tinggia angkana ri ke’nanga, ‘Anjo sikamma paccini’nu sangnging tena nakontutojeng siagang anjo sikamma botonu sangnging balle-balle. Nupaui angkanaya yangasenna anjo pasangKu, padahala’ iNakke tena le’bakKa’ a’bicara mae ri kau! Lanri kammana anjo iNakke la’jari balinnu.
8(13:7)
9INakke langhukkungko, he na’bi-na’bi appabattua boto balle-balle siagang paccini’ takontutojenga! Takkullea mako amminawang angngalle kaputusang lalang ri pa’rappunganna ummakKu. Lanigarisiki areng-arennu battu ri bansa Israel, siagang tenamo nulammotere’ mange ri butta passolongang cera’nu. Na nuassemmo angkana iNakke Batara Kaminang Tinggia.
10He na’bi-na’bi takontutojenga! Nupa’lingumi ummakKu lanri nupauna angkana yangasenna amangi siagang tena apa-apa. Padahala’ tena sikali! UmmakKu ambangummi tembo’ battu ri batu bata tenaya najarre’ batena attannang, nampa battuko assarei pa’leo’.
11He, na’bi-na’bi takontutojenga, laruntungi tembo’nu. LappaturungA’ bosi lompo. Anjo temboka lanitujui ri anging barubu siagang lanitujui ri bosi es,
12sa’genna rumbang, na tunggala’ taua lakkuta’nangi angkana apa matu-matunna nipa’leoki anjo temboka.’"
13Nakana Batara Kaminang Tinggia, "Lalang larroKu, lappabattuA’ anging lompo, bosi lompo siagang bosi es untu’ angngancuruki anjo temboka le’baka nupa’leoki,
14Kuancu’-ancuruki sa’genna pundasina mami ammantang. Anjo temboka lanatujuko siagang lanabuno kabusukko. Na nuassemmo angkana iNakke Batara.
15Anjo temboka siagang ikau ngaseng le’baka ampa’leoki, lanupisa’ringi antekamma heba’na pangngalarroingKu. Nampa laKupau mae ri kau angkanaya anjo temboka lanynya’mi, sangkamma siagang ikau le’baka ampa’leoki,
16he na’bi-na’bi takontutojenga! Nutappui angkana Yerusalem amangi siagang tangngapa-apayai, padahala’ tena sikali nakamma!" Kammami anjo kananNa Batara Kaminang Tinggia.
17Nakana Batara, "Kamma-kamma anne he tau, parhatikangi bai’-baine appanggaukang eroka nikana kalenna na’bi ri alla’na bansanu. Callai ke’nanga,
18siagang pabattui kanangKu, iNakke, Batara Kaminang Tinggia, mae ri ke’nanga: ‘Cilaka ngasengko! Nupapparekang ngasengi taua ponto-ponto jima’ siagang bongong-bongong ammakea baca, sa’genna akkulle nakoasai tau maraenga. Erokko koasa mae ri tallasa’na siagang matena ummakKu, siagang anjo koasa kammaya nupakei untu’ kaparalluang kalennu.
19NuhinaMa’ ri dallekanna ummakKu, lanri ero’nu poro anggappa sikangkang jelai gandung siagang pirang kere’ are roti. Tau tenaya nasala nubunoi, nampa tau siratanga mate nulappassangi attallasa’. Nampa nuballe-ballei ummakKu siagang tappa’mi ke’nanga mae ri kau ngaseng.’"
20Nakana Batara Kaminang Tinggia mae ri anjo bai’-baine eroka nikana na’bi, "BallisikKa’ anciniki anjo ponto-ponto jima’ niaka nupake untu’ angkoasai tallasa’na siagang matena ummakKu. LaKupasintaki anjo ponto-pontoa battu ri pappontoannu, nampa sikamma tau nukoasaia laKulappassangi.
21Bongong-bongong karama’nu laKukekkeki na ummakKu laKupalili battu ri pangaru ja’dala’nu sa’genna satunggu-tungguna. Na nuassemmo angkanaya iNakke Batara.
22Tau bajika tenaya naero’ Kuapa-apai, nupakaca’di nyawana lanri balle-ballenu. Tau ja’dalaka nupakalompoi nyawana sollanna tuli doraka siagang tena nipasalamaki ke’nanga.
23Kamma-kamma anne kala’busammi sikamma paccini’ balle-ballenu siagang boto takontu tojennu. Kupasalamaki ummakKu battu ri pangaru ja’dala’nu. Na nuassemmo angkanaya iNakke Batara."