Dual Panel1Ri tanggala’ sampulo, bulang sampulo, lalang taung makasalapang ri wattu nipela’na ikambe, Nakana Batara ri nakke,
2"He tau, cataki tanggalaka anne alloa, lanri anne alloa nappakkaramula karaeng Babel angkurungi Yerusalem.
3INakke, Batara, nia’ se’re pangngebarangKu untu’ lanipabattu mae ri ummakKu nangaia angngewa: Tiriki je’neka antama ri pancia nampa padongkoki irate ri pepeka.
4Bonei dageng antama dageng kaminang bajika; assi salangganna siagang bongganna kammayatompa buku-buku jaia oto’na.
5Dageng gimbala’ co’mo’ siagang rungka nupake tambai pasadia kayu tunuanna. Lappassangi a’rerea tojeng je’ne’na pallui anjo dagenga siagang buku-bukunna."
6Nakana Batara Kaminang Tinggia, "Cilakai anjo kota rassia siagang pabuno-buno! Anjo kotaya rapangi uring taiang tenaya nale’ba’ nikeso’. Dageng niaka ilalanna nipasulu’ tassikere’-kereki, sa’genna manna sikere’ tania’ ammantang tassesa.
7Anjoreng ri kotaya kajariangi pammunoanga, mingka cera’na tena nata’bene naung ri buttaya, passangalinna nai’ ri batu terasaka, sa’genna takkullea nitambungi.
8Anjo ceraka kubalang parekangi anjoreng sa’genna akkulle nicini’ siagang a’boya pa’balasa’."
9Nakana Batara Kaminang tinggia, "Cilakai anjo kota rassia siagang pabuno-buno! KalengKu lappa’gompo kayu untu’ antunui.
10Tambai kayunna! Kapeki pepe’na! Pallui dagenna! Pelaki je’ne’na. Tunui buku-bukunna!
11Kamma-kamma anne padongkoki anjo uring tambaga kosonga irate ri pepeka siagang lappassangi sa’genna a’jari eja a’bara. Punna le’ba’mo akkanre taianna, anjo uringa latangkasa’mi ammotere’ situru’ atorang agamaya.
12Mingka tena natappela’ ngaseng taianna nakanre pepe’.
13He Yerusalem, anjo panggaukang-panggaukang kodinu nara’massimi kalennu. Kucobami antangkasiko, mingka tena matu-matunna, lanri tuli ra’masa’nu. Tena nulatangkasa’ ammotere’ sa’genna ammari pangngalarroingKu mae ri kau.
14INakke, Batara Kaminang Tinggia, anne akkana. Narapi’mi wattungKu untu’ angngalle tindakang. Tena nalaKukaluppai dosanu siagang tena nalaKupammopporang yareka tena nalaKukamaseangko. LaKuhukkungko situru’ sikontu panggaukannu. INakke, Batara Kaminang Tinggia, anne akkana."
15Nakana Batara ri nakke,
16"He tau, ti’ring laKualle silalonnai tau kaminang nukamaseanga. Mingka takkulleako appiraung siagang angngarru’, yareka nulappassang assolong je’ne’ matannu.
17Gassingka kalangngerangi anjo karru’nu. Teako a’jappai natena nummake soro’bang, yareka tena nummake pa’lapa’ bangkeng, kamma tau kamateanga. Tea tongko bongongi rupannu, siagang teako angnganrei roti nikanrea ri wattu kamateang."
18Ri bari’basa’na a’bicara’ mae ri anjo bansaya, na bangngina ammoterammi tubai’-baineku. Ammukona kugaukammi apa niparentakanga mae ri nakke.
19Akkuta’nammi ra’yaka angkana, "Angngapa kippakamma anne bapa’? Apa battuanna anne kammaya mae ri kambe?"
20Nampa appialima’ mae ri ke’nanga angkana, "Nasuroa’ Batara
21ampabattui anne pasanga mae ri kau ngaseng angkana; Ikau nukalompoang pa’maiki kakassakanna Balla’Na Batara. Nungai nucini’ siagang angkunjungi, mingka laNara’massi Batara Balla’na. Siagang sikamma anggota kaluarganu loloa ija, ia niaka ija ammantang ri Yerusalem, lanibunoi lalang ri pa’bundukang.
22Nampa lanugaukang sangkamma anne kugaukanga kamma-kamma anne. Tena nalanubongongi rupannu yareka tena nulangnganre roti nikanrea ri wattu kamateang.
23Tena nula’jappa nutammakea soro’bang yareka pa’lapa’ bangkeng, tena nuppiraung siagang angngarru’. Pila’ lata’ronangi tallasa’nu lanri dosa-dosanu; lakkunrarengko mae ri massing para ikau.
24Jari inakke, Yehezkiel, la’jari conto mae ri kau: lanugaukangi sangkamma apa kugaukanga kamma-kamma anne. Nakana Batara, angkanaya punna kajariang anjo passalaka, lanuassemmi angkanaya Iami Batara Kaminang Tinggia."
25Nakana Batara ri nakke, "Jari, he tau, laKuallei battu ri ke’nanga anjo BallakKu kassaka, a’jaria kalompoang pa’mai’na siagang kasannangnganna ke’nanga, siagang nangaia naciniki siagang nakunjungi. Nampa laKualle todong ana’-ana’na ke’nanga.
26Ri allo Kugaukanna anjo passalaka, sitau ta’lappasaka battu ri anjo kapanrakanga labattui siagang napabattui anjo kabaraka mae ri kau.
27Ri ia todong anjo alloa lakkulleko a’bicara ammotere’ siagang tenamo nupepe. Nampa la’bicara mako siagang anjo taua. Kammami anjo naikau la’jari pammatei mae ri ke’nanga; nampa naassemmo ke’nanga angkanaya iNakkemi Batara."