Dual Panel1Nakana Batara Kaminang Tinggia, "He tau, ancangi Gog, karaeng lompo battua ri pa’rasangang Mesekh siagang Tubal, siagang pauangi angkanaya iNakke anne musunna.
2INakke lampalekkoi, siagang Kuerangi assulu’ battu ri daera bellaya bageang wara’, mange ri daera monconna Israel.
3Anjoreng laKutunrungi anrong panana sa’genna ta’lappasa’ battu ri lima kairinna, nampa Kutu’gurang ana’-ana’ panana battu ri lima kananna.
4Irate ri daera moncong-monconna Israel, lamate Gog siagang sikontu tantarana kammayatompa sikontu naaganga sita’gala’; nampa maya’-maya’na ke’nanga laKupassareangi mae ri jangang-janganga siagang olo’-olo’ sekkeka untu’ nakanre.
5Anjo sikamma tantaraya latu’guruki na mate ri koko-kokoa. INakke, Batara Kaminang Tinggia, anne akkana.
6Lappa’niakKa’ pepe’ akkanre ri butta Magog siagang ri sikamma biring tamparanga, ri daera amanga siagang sannanga katallassanna pandudu’na. Jari naasseng ngasemmi ke’nanga angkanaya iNakkemi Batara.
7Mingka ri tangnga-tangngana tu Israel, laKupa’nyatai arengKu matangkasaka, siagang tenamo nalanira’massi arengKu. Jari naassemmi bansa-bansaya angkanaya iNakkemi Batara, iamintu Allata’ala matangkasaka ri Israel."
8Nakana Batara Kaminang Tinggia, "Tojeng, anjo allo Kupakkanaya ma’nassa labattui.
9La’balulungi assulu’ pandudu’na kota-kotaya ri Israel untu’ ampasse’rei sanjata nibokoia, iamintu pannahang siagang pa’dang, anrong pana siagang ana’ pana, kammayatompa takkang pattunrung. Kabusu’na anjo kammaya napa’jari ke’nanga kayu tunuang, anggannaka nipake tuju taung sallona.
10Jari taparalluami ke’nanga appasse’re kayu tunuang ri kokoa yareka anna’bang poko’ kayu ri romanga, nasaba’ sikontu anjo sanjata nibokoia sukku’ jaina untu’ nipare’ kayu tunuang. Lanaellaki siagang lanarampasaki barang-baranna sikamma tau le’baka angngellaki siagang anrampasaki barang-baranna ke’nanga. INakke, Batara Kaminang Tinggia, anne akkana."
11Nakana Batara, "Punna kajariang ngasemmo anjo sikammaya, laKusaremi Gog butta pa’jerakkang ri Israel, iamintu ri ka’bung pa’limbangnganga ri rayanganna Tamparang Matea. Anjoremmi Gog siagang sikontu tantarana lanitarawang. Siagang laniaremmi anjo ka’bunga ‘Ka’bung Pasukang Gog’.
12Tuju bulangi sallona Israel akkareso antarawangi anjo sikontu tau matea sollanna tenamo nara’masa’ anjo tampaka.
13Sikontu pandudu’na pa’rasanganga lamminawang turu’ ngasengi ambantu untu’ antarawangi anjo tau matea; siagang untu’ yangasenna anjo sikammaya, lannarimai ke’nanga pahala ri allo pammetangKu. INakke, Batara Kaminang Tinggia, anne akkana.
14Allalonamo anjo wattu tuju bulanga, nia’ siapa are tau lanisare tugasa’ untu’ angnginroi anjo pa’rasanganga amboyai maya’-maya’ niaka ija tassiara’; na punna nia’ nabuntulu’, natarawangi ke’nanga anjo mayaka sollanna natangkasa’ anjo pa’rasanganga battu ri kara’massanga.
15Lalang ri anjo pa’jappanna ke’nanga, punna anggappai buku tau, lanasarei pammatei sa’rinna, sollanna nacini’ patarawanga nampa natarawang anjo buku taua ri Ka’bung Pasukang Gog.
16Kammami anjo carana nanitangkasi anjo pa’rasanganga battu ri kara’massanga. (Ri allo ri boko, anjoreng ri ka’bunga lania’ kota niarenga sangkamma Pasukang Gog.)"
17Nakana Batara Kaminang Tinggia ri nakke, "He tau, kioki sikontu jangang-janganga siagang olo’-olo’ maraengannaya, sollanna nia’ battu ri kere-keremae untu’ angkanrei koro’bang Kupasadiakangi ke’nanga. LapparekKa’ passua’-suarrang lompo ri daera moncong-monconna Israel; anjorengi ke’nanga akkulle angnganre dageng siagang angnginung cera’.
18Akkullei ke’nanga angnganre maya’-maya’ pasukang tu barani, angnginungi cera’na sikamma pamarentaya ri lino. Anjo sikamma pasukanga siagang pamarentaya lanibunoi sanrapang bembe laki yareka ana’-ana’ bembe, yareka sapi-sapi liara’ co’moka.
19Punna le’baki Kubuno sikamma anjo taua rapang koro’bang, sikamma jangang-janganga siagang olo’-olo’ maraengannaya lanakanrei sikontu jannana sa’genna takkoa’; kammayatompa lanainungi cera’na sa’genna nasa’ring.
20Ri mejangKu akkullei ke’nanga nabassori battanna siagang sikontu tau a’jaranga siagang jaranna, kammayatompa sikontu pasukang tu baranina. INakke, Batara Kaminang Tinggia, anne akkana."
21Nakana Batara, "LaKuparhatikangi kala’birangKu mae ri bansa-bansaya. Lanacini’ ngasengi ke’nanga antekamma bateKu ampakei kakoasangKu untu’ ampa’rupai kaputusang-kaputusangKu adeleka.
22Appakkaramula anjo wattua lanaassemmi tu Israel angkanaya iNakkemi Karaeng Allata’alana ke’nanga.
23Siagang sikontu bansaya lasadara’ ngasemmi angkanaya tu Israel nikiringi mae ri butta pammelakkanga lanri dorakai ke’nanga mae ri Nakke. Kubokoimi ke’nanga siagang Kubalang parekangi nibeta ri musunna kammayatompa nibuno lalang pa’bundukang.
24Kugaukangi mae ri ke’nanga simbattala’ siagang kara’massang siagang kaja’dallanna ke’nanga, nampa Kubokoi ke’nanga."
25Nakana Batara Kaminang Tinggia, "Mingka kamma-kamma anne laKukamaseangi umma’ Israel jari-jarina Yakub, siagang Kupa’jari kalumanynyang poleangi ke’nanga. Lanri kammana anjo Kujagaimi arengKu sollanna tuli nipakalompo.
26Punna sannangi pole ke’nanga ammantang ri pa’rasangang kalenna, tena manna sitau lakkulle anggarattaki ke’nanga; jari lanakaluppaimi ke’nanga antekamma batena le’ba’ nipakasiri’ ke’nanga lanri dorakana mae ri Nakke.
27LaKuerangi ke’nanga ammotere’ battu ri sikamma pa’rasanganna musunna ke’nanga, siagang la’nassami katangkassangKu mae ri sikontu bansaya, lanri sikamma anjo panggaukangKu.
28Jari naassemmi ummakKu angkanaya iNakkemi Karaeng Allata’alana ke’nanga. Nasaba’ iNakke angkiringi ke’nanga mange ri butta pammelakkanga, mingka iNakke todong angngerangi ke’nanga ammotere’ mange ri pa’rasangang kalenna ke’nanga, natena manna sitau battu ri ke’nanga nibokoi anjoreng.
29LaKupantamaki RohKu antama ri bansa Israel, siagang tenamo nalanibokoi pole ke’nanga. INakke, Batara Kaminang Tinggia, anne akkana."