Dual Panel1Naeranga’ anjo tu bura’nea ammotere’ mange ri pakke’bu’ antamaya ri Balla’Na Batara. Nia’ kucini’ je’ne’ a’lo’loro’ battu rawanganna anjo pakke’buka a’lampa anrai’, sangkamma Balla’Na Batara a’dalle’ anrai’ tongi. Anjo je’neka a’lo’loroki battu ri rawanganna pakke’bu’ lompona Balla’Na Batara bageang timboro’, allalo ri sa’ri timboranna tampa’ pakkoro’bangnganga.
2Nampa anjo tu bura’nea naeranga’ assulu’ battu ri pakke’bu’ lompo waraka nampa naeranga’ mange ri pakke’bu’ lompo bageang irayaya. Anjo binanga ca’dia a’lo’loroki battu ri sa’ri timboranna anjo pakke’bu’ lompoa.
3Angngukkuru’ tommi anjo tu bura’nea siagang takkang pa’baku’na na naeranga’ ampinawangi lo’loro’na anjo binangaya a’lampa anrai’ sa’genna 500 metere’ bellana, nampa nasuroa’ a’limbang. Ri anjo tampaka, je’neka sa’ge tompo’ pala’ bangkenji.
4Nampa angngukkuru’ pole 500 metere’, na anjoreng je’ne’na sa’ge kulantuki. Angngukkuruki pole sa’genna 500 metere’ bellana, na je’ne’na narapiki sa’ge aya’.
5Sikalipi pole angngukkuru’ sa’genna 500 metere’ bellana, na anjoreng lantang sikali je’ne’na punna lanioloi a’jappa bangkeng. Punna eroki taua a’limbang musti a’langei.
6Nampa nakana anjo taua ri nakke, "He tau, parhatikang ngasengi anne baji’-baji’." Nampa naeranga’ ammotere’ antulakkangi binangaya,
7siagang kucini’mi angkanaya rua-rua birinna anjo binangaya jai sikali poko’-poko’ kayu.
8Nakana ri Nakke, "Anne binangaya a’lo’loro’ anraiki ammalo anrinni ri pa’rasanganga siagang ammalo ka’bunna ri Binanga Yordan a’lampa mange ri Tamparang Matea. Punna battu je’ne’na antama ri Tamparang Matea, nasambeimi je’ne’ tamparang ce’laya siagang je’ne’ la’ba.
9Manna pole a’lo’loro’ kemae anne binangaya, anjoremmi lajai sangka’ rupa juku’ siagang olo’-olo’ maraengannaya. Je’ne’na Tamparang Matea napa’jari la’bai, siagang kemae-kemae a’lo’loro’ anjo je’neka, anjoreng tommi lania’ katallassang.
10Battu ri timbuseng-timbuseng je’ne’ ri En-Gedi sa’genna timbuseng-timbuseng je’ne’ En-Eglaim, biring-birinna lasuaraki napakamma paboya juku’ angngalloi jalana anjoreng. Sangka’ rupa juku’ lania’ lalang ri anjo je’neka, sangkamma niaka ri Tamparang Tangngaya.
11Mingka je’neka ri empanga siagang balanga ri birinna anjo tamparanga tena nala’jari la’ba, passangalinna tuli la’jari pacce’lang.
12Ri sikamma birinna anjo binangaya napattimboi sangka’ rupa poko’ kayu rappo-rappoang. Tale’bakai kalumeng leko’na anjo poko’-pokoka, siagang tena la’busu’na rapponna. Anjo poko’-pokoka lappa’niaki rappo-rappo beru ri tunggala’ bulang, nasaba’ tuli nibasaina ri je’ne’ a’lo’loroka battu ri Balla’Na Batara. Rapponna a’jari kanreang-kanreang siagang leko’na a’matu-matui untu’ pa’balle."
13Nakana Batara Kaminang Tinggia, "Iaminne pa’baeng-baenna butta lanibage-bagea mae ri sampuloa anrua suku Israel. Suku Yusuf annarimai rua bageang.
14Le’ba’Ma’ assumpa angkanaya anjo buttaya laKupassareangi mae ri boe-boenu. Lanri kammana anjo, allemi anjo buttaya siagang bagemi siagang adele’ massing ri kau.
15Pa’baeng-baeng bageang waraka appakkaramulai battu ri Tamparang Tangngaya a’lampa anrai’ sa’genna kota Hetlon, mange ri Hamat, tulusu’ mange ri kota Zedad,
16mange ri Berota siagang Sibraim (kota-kotaya anjo ri alla’nai kota Damsyik siagang kota Hamat pammantanganna), nampa mange ri kota Hazar-Enan, ri pa’baeng-baenna kota Hauran.
17Jari, pa’baeng-baeng bageang waraka appakkaramulai battu ri Tamparang Tangngaya sa’genna anrai’, ri kota Hazar-Enan; jari daera Damsyik siagang Hamat niaki warakkanna anjo pa’baeng-baenga.
18Pa’baeng-baeng rayaiya a’lampa timboro’, battu ri se’reang tampa’ ri alla’na daera Damsyik siagang daera Hauran. Jari Binanga Yordan a’jari pa’baeng-baeng iamintu butta Israel biring ilau’ siagang Gilead biring iraya, sa’genna mange ri Tamar ri biring tamparanna Tamparang Matea.
19Pa’baeng-baeng bageang timboro’ a’lampa kalau’, battu ri Tamar mange ri timbuseng je’ne’ Kades-Meriba, nampa kalau’ ri pa’baeng-baenna Mesir sa’genna Tamparang Tangngaya.
20Pa’baeng-baeng bageang ilauka appakkaramula battu ri Tamparang Tangngaya, nampa a’lampa wara’ ri se’reang tampa’ ri laukanna agang antamaya ri Hamat.
21Bagei anjo buttaya massing ri kau ngaseng, situru’ suku-suku Israel;
22siagang anjo buttaya a’jarimi nupatang satunggu-tungguna. Ia bansa maraeng niaka ammantang tuli ri tangnga-tangnganu, nampa nia’ ana’-ana’na lassu’, musti anggappa tongi bageang battu ri anjo buttaya. Anjo ke’nanga musti nipare’ sangkammai bansa Israel, siagang musti amminawang tongi nigoccang arenna ke’nanga untu’ anggappa butta punna nibagei anjo buttaya ri suku-suku Israel.
23Sikamma pandudu’ bansa maraenga musti nisare tongi butta siagang suku Israel ri tampa’ napammantangia ke’nanga. INakke, Batara Kaminang Tinggia, anne akkana."