Alkitab Mobile SABDA
[VER] : [MAKASAR]     [PL]  [PB] 
 <<  Yehezkiel 7 >> 

1Nakana Batara ri nakke,

2"He tau, iNakke, Batara Kaminang Tinggia, eroki Kupabattu anne mae ri butta Israel angkana: Iaminne kala’busanna riwaya’na sikontu anne pa’rasanganga!"

3Nakana Batara, "He Israel, kamma-kamma anne narapi’mi wattu kale’bakkannu. Lanupisa’ringi pangngalarroingKu. Kuadeliko situru’ panggaukannu kodia.

4Tena nalaKukamaseangko yareka tena nalaKupammopporangko. LaKuhukkungko situru’ sikontu kakodiang le’baka nugaukang. Jari nuassemmi angkanaya iNakkemi Batara."

5Iaminne Napaua Batara Kaminang Tinggia mae ri bansa Israel, "A’le’basaki balaya tuli labattu antujuko.

6Kamma-kamma anne sikontu-kontuna narapi’mi kala’busanna. Iaminne kale’bakkannu. Tenamo panrannuang mae ri kau.

7Sikontu-kontuna kala’busannami mae ri kau, he bansa niaka ammantang anrinni ri buttaya. Kamma-kamma anne tenamo pa’gaukang passua’-suarrang ri tampa’ pakkorobangngang ri moncong-monconga, mingka ia niaka poro karicuang mami.

8Tasalloami nanukasia’ pangngalarroi lompoKu. LaKuadeliko situru’ panggaukannu. LaKubalasaki mae ri kau sikontu panggaukang kodinu.

9Tena nalaKukamaseangko yareka tena nalaKupammopporangko. LaKuhukkungko situru’ sikontu panggaukang kodi le’baka nugaukang. Jari nuassemmi angkanaya iNakke Batara siagang iNakke anghukkungko."

10Battumi allo angngeranga bala mae ri Israel. Kajariammi ri kemae-kemae gau’ pallaka. Katampoanga narapi’mi pamangeanna.

11Kasekkekanga pila’ lappakajai kaja’dallang. Sikontu kakalumanynyangnganga, kalompoanga siagang kaporeanga ia niaka ri ke’nanga lala’busuki tena sikali bate-batena.

12Tasalloami nanarapi’ wattunna, a’reppese’mi allonna! Tau ammallia siagang tau a’baluka tanggappayami passawallang apa-apa, lanri sikontuna taua lanituju ngasengi ri hukkunganNa Allata’ala.

13Tena padanggang langgappai ammotere’ apa le’baka nabalukang, nasaba’ manna inai lanituju ngasengi ri pangngalarroinNa Allata’ala. Tau ja’dalaka tena nalasalama’.

14Assa’rai tarompeka siagang sadia-sadia ngasemmi taua. Mingka tena manna sitau la’lampa mange ri tampa’ pa’bundukanga, lanri sikontu taua nituju kabusuki ri pangngalarroinNa Allata’ala.

15Ri agang-agang niaka ri kotaya nia’ pa’bundukang, ri sikamma ballaka nia’ garring siagang kacipurang. Inai mamo nia’ ri pantaranganna kotaya lamatei lalang pa’bundukang, siagang ammantanga ri kotaya lamatei lanri garring siagang kacipurang.

16Nia’ sipa’gang lata’lappasa’ nampa lari naiki ri pa’bulukanga. Anjoreng lasanrapangi ke’nanga jangang-jangang pune-pune nibongkaya battu ri ka’bunga; kabusu’na lakkunrarengi pa’risi’ lanri dosa-dosana ke’nanga.

17Tunggala’ taua la’jari lamma kabusuki limanna siagang annekkereki kulantu’na.

18Lammakei ke’nanga kaeng karung siagang lannekkereki sibatu kale. Lanigondoloki ulunna ke’nanga siagang lanipakasiriki ke’nanga.

19Bulaenga siagang peraka lanapelaki ke’nanga ri aganga rapang loro, nasaba’ ri allo napa’bettese’na kalarroanNa Batara, anjo bulaenga siagang peraka takkulleai ampasalamaki ke’nanga, ba’lalo ia ngasemmi anjo angngerangi ke’nanga mae ri dosaya. Takkulleai napake ke’nanga untu’ ampassukkuki cinnana yareka ambonei battanna ke’nanga.

20Riolo nakalompoang pa’maiki paramata ga’gana ke’nanga, mingka lanri napakena ke’nanga untu’ appare’ barhala-barhala appakaringi’-ringi’, Napa’jarimi Batara anjo barang-barang kammaya appakamalla’-malla’.

21Nakana Batara ri bansa Israel, "LaKulappassangi bansa maraenga angngellakko. Sikamma tau ja’dalaka lanarampasaki barang-barannu nampa nara’massi.

22Tena apa-apa laKugaukang punna napanraki siagang narantassi BallakKu ri sikamma paellaka.

23Sikontu pa’rasanganga a’jari ricui; kemae-kemae nia’ pammunoang siagang kapallakkang.

24Bansa-bansa kaminang sekkeka laKupabattui untu’ angngempoi sikamma balla’nu. Sikamma tau porenu kaminang barania la’jari mallaki punna Kulappassang anjo bansa-bansaya angngancuruki tampa’-tampa’ ibadanu.

25Nitujui ke’nanga ri kasusaang siagang tappu’ panrannuang, nampa a’boya kaamangngang, mingka tanagappayai ke’nanga.

26Balaya siagang kabara’ kodia tenammarina tulusu’ labattu. Nupalaki mae ri na’binu sollanna akkulle ke’nanga antappui lalang paccini’na ke’nanga, mingka tena todong nakkulle ke’nanga. Kammayatompa sikamma imanga tenamo apa-apa lakkulle napangngajarrang mae ri ummaka, siagang sikamma pamimpinga kala’busammi ri kana-kana untu’ pappakainga’.

27Lappiraungi karaenga, tappu’ panrannuangi ana’ bura’nena karaenga siagang lannekkereki napakamma malla’ ra’yaka. LaKuhukkungko situru’ sikontu panggaukannu, kammayatompa Kuadeliko sangkamma batenu angngadeli parannu tau. Jari lanuassemmi angkanaya iNakke Batara."


  Share Facebook  |  Share Twitter

 <<  Yehezkiel 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel