Alkitab Mobile SABDA
[VER] : [MAKASAR]     [PL]  [PB] 
 <<  Yeremia 14 >> 

1Akkana kammai anne Batara ri passala’na wattu timoro’ karri dudua.

2"Si’nai pa’mai’na Yehuda a’birimmi kamma mate kota-kotana. Anra’bami naung taunna ri buttaya nakkunrareng. Ammuriciki Yerusalem appala’ tulung.

3Sikamma palayanna tau kalumanynyanga nisuroi a’boya je’ne’ ri kere-keremae; a’lampai ke’nanga mange ri sikamma bungunga mingka la’busu’ ngasemmi je’neka. Tena bonena bongkia naeranga ke’nanga ammotere’. Lussa’mi natappu’ minasa ke’nanga siri’-siriki ke’nanga na natongko’ rupanna.

4Taturungai bosia siagang kalotoro’ sikali buttaya; natongkoki rupanna pamarria lanri la’bana nyawana.

5Tenamo ruku’, jari a’lampami anrong jongaya. Nabokoi ana’na beru lassuka ri parang lompoa.

6Ri coppo’ buluka ammenteng mami keledai liaraka, tenamo naccaya matanna lanri tenanamo ruku’; a’mai’ poso sangkamma serigala.

7Akkioki ummakKu angkana, ‘Batara manna pole naniutung ikambe ri dosana mingka Kitulungi ikambe situru’ janjinTa. A’mole-mole maKi’ nibokoi ri kambe; tojeng, dorakami ikambe ri Katte.

8IKatteji bawang panrannuanna Israel, ampasalamakai ikambe battu ri balaya. Mingka angngapa Kikamma tau maraeng ri pa’rasanganna ikambe, rapang pajappa battu bella poro assengka bawang sipattang nampa a’lampa?

9Angngapa Kisangkamma tau lingu; rapang tubarani tenaya nakkulle annulung? Mingka, mattantu niakKi’ ri tangnga-tangngana ikambe, o Batara! Ikambe ummatTa, teaKi’ bokoi!’"

10Ri passala’na anjo bansaya Nakana Batara, "Tena Kusannang mae ri sikamma anjo tau nangaia lari a’lampa ambokoiA’, siagang tenaya naero’ allewai kalenna. Tena nalaKukaluppai kasalanna ke’nanga; laKuhukkungi ke’nanga lanri dosana ke’nanga."

11Nakana Batara ri nakke, "Teako palakki ri Nakke untu’ antulungi anjo tau sikammaya.

12Manna pole appuasa ke’nanga, tena Kuero’ amparhatikangi pakkio’na ke’nanga appala’ tulung; siagang manna pole assare ke’nanga mae ri Nakke koro’bang nitunu siagang gandung, mingka tena nalasannang nyawaKu mae ri ke’nanga. Kabalekanna, laKutumpasaki ke’nanga lanri pa’bundukang, kacipurang, siagang garring."

13Nampa kukanamo, "O Batara Kaminang Tinggia, Kiassengi angkanaya le’ba’mi na’bi-na’bia akkana mae ri ra’yaka angkanaya tena nalania’ pa’bundukang yareka kacipurang lanri le’ba’maKi’ a’janji angkanaya tuli lania’na kaamangngang anrinni ri pa’rasanganga."

14Mingka appialimi Batara angkana, "Anjo na’bi-na’bia kabara’ balle-balle naerang na nabalukang arengKu; tena naKusuroi ke’nanga, siagang tena todong Kuparentakangi ke’nanga yareka a’bicara mae ri ke’nanga. Anjo sikamma paccini’ nacaritaya ke’nanga teai battu ri Nakke; nabotoi ke’nanga apa-apa tenaya matu-matunna siagang napare’-pare’ kalennai ke’nanga.

15Napaui lalang arengKu ke’nanga angkanaya anne pa’rasanganga tena nalanituju ri pa’bundukang yareka kacipurang, padahala’ tena naKusuroi ke’nanga akkana kamma anjo. INakke, Batara, Kupauangko, Yeremia, apa laKugaukanga mae ri anjo na’bi-na’bi tenaya naKusuroi. LaKubunoi ke’nanga lanri pa’bundukang siagang kacipurang.

16Sikamma tau antarimaya anjo sikamma botona ke’nanga lanibuno kamma tongi anjo carana. Lanipasambilai maya’na ke’nanga mange ri sikamma agang-aganga ri Yerusalem natena antarawangi ke’nanga. Kammami anjo sarenna ke’nanga siagang tubai’-bainena siagang ana’na ke’nanga. LaKusarei ke’nanga angkasiaki apa kale’bakkanna kaja’dallanna ke’nanga."

17Nasuroa’ Batara ampauangi si’naku mae ri umma’Na. Musti akkana’ kamma anne, "Boli’ma’ tenammariku angngarru’, allo bangngi ammatti’ je’ne’ matangku. Nasaba’ loko’ sanna’mi bansaku siagang teai sipato’ sessana

18Punna mangea’ ri paranga, kuciniki maya’-maya’na tumatea lanri pa’bundukang. Kuciniki lalang ri kotaya kasessanga, tau a’biringa mate naalle cipuru’. Na’bia siagang imanga nagaukangi jama-jamanna natanassenga apa battuanna apa nagaukanga ke’nanga."

19Batara, maka Kisorongboko taba sikalimi Yehuda na Kikabirisi pandudu’na Sion? Angngapa nasarring kamma pannunrunTa ri kambe sa’genna takkulleamo ammolle ammotere’ ikambe? Tena matu-matunna ikambe a’boya kaamangngang, tena bua’-bua’na a’boya pammolleang, nasaba’ katerassang bawang nia’.

20Batara, ri Kattemi bawang doraka ikambe. Namangakui ikambe dosa kalenna ikambe siagang dosana boe-boena ikambe.

21Kiu’rangi janjinTa, teaKi’ pakatunai ikambe; teaKi’ kaluppai janjinTa siagang ikambe. Yerusalem tampa’ empoang kala’biranTa, teaKi’ pakatunai.

22Rewata-rewatana bansa-bansaya takkulleai appaturung bosi ri lino. Manna langika takkulle todong ampaturungi bosia siagang koasa kalenna. IKatteji bawang panrannuanna ikambe. IKatte ampa’jari ngasengi anjo sikammaya.


  Share Facebook  |  Share Twitter

 <<  Yeremia 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel