Dual Panel1Nasuroa’ Batara ampa’la’bangi anne kabaraka mae ri sikontu tau niaka ri Yerusalem, angkanaya, "He Israel, Kuu’rangi antekamma tamamminrana pa’mai’nu ri wattunnu rungka ija; antekamma lompona pangngainnu ri wattunta rapang bunting beru. NupinawangA’ mae ri parang lompoa allalo ri daera tenaya nanilamungi.
2(2:1)
3Israel, iNakke KalengKu ampatangko, Kusayanga lalang ri pa’maikKu. Kupitujui bala sikontu tau ansessayako, iNakke, Batara, anne akkana."
4Pilangngeri pasanNa Batara, he ikau jari-jarina Yakub, suku-suku Israel!
5Nakana Batara, "Kasalang apa nacini’ boe-boenu ri Nakke, sa’genna a’boko mae ri Nakke? Naondangi ke’nanga barhala tenaya anggaranna na kale’bakkanna kalenna tonji ke’nanga a’jari tuna.
6Tenamo najampangiA’; iNakke, le’baka angngului ke’nanga ri aganga, siagang angngerangi ke’nanga assulu’ battu ri Mesir allalo ri parang kassika, daera roso’ a’lekko-lekkoa, butta kalotoro’ siagang jaia bahayana — parang tenaya nanipammantangngi siagang tenaya nanipanumaloi!
7Kuerangi ke’nanga mange ri pa’rasangang coppong untu’ angkasiaki sikamma wassele’ bajika anjoreng. Mingka anjorengi narantassi ke’nanga buttaKu nanapa’jari appakaringi’-ringi’ apa-apa Kupatanga.
8Sikamma imanga tamakkuta’nangngai angkana kemaeA’, Batarana. Sikamma tau appaentenga hukkung tanaassengA’, sikamma pamarentaya nabaliangA’. Lalang arenna Rewata Baal na’bicara sikkamma na’bia, siagang anynyomba ri barhala tenaya matu-matunna."
9Nakana Batara, "Kamma-kamma anne Kukara-karai pole ummakKu, naKuadeli jari-jarina.
10Jappai biring lau’na Siprus, kiringi taua anrai’ ri pa’rasangang Kedar, paressa bajiki anjoreng, maka nia’ kajariang kammaya?
11Tale’bakai nia’ se’re bansa ansambei rewatana manna pole naanjo teai Allata’ala sitojennaya. Mingka, ummakKu le’bakKa’ nasambei, kalompoanna ke’nanga siagang se’rea apa takkulle appare’ apa-apa.
12Lanri kammana, he langika, ta’ge’gosokko! Lannasakko siagang annekkerekko!
13Ruang rupa dosa nagaukang ummakKu: nabokoiA’ assarea je’ne’ pannallassi ri rupataua; napapparekangi kalenna ke’nanga kalo’bang assabang tenaya nakkulle annahang je’ne’ tingkasa’na."
14"Israel teai ata, teai tongi turungang ata. Mingka angngapa nania’lu’mo ri balinna?
15Ammarrummi sa’ranna musunna rapang sa’ra singa, nipa’jari roso’mi buttana natena apa-apa wassele’na, kota-kotana la’busuki nakanre pepe’, nibalang parekang ta’ronang tena bonena.
16He Israel, nigoncimmi uu’nu ri tu Memfis siagang tu Tahpanhes.
17Kalennu tonji a’jari passabakkang sikontu apa kajarianga mae ri kalennu, lanri ri wattunnu Kuulu ri pa’jappannu, ma’bokoko ri Nakke, Karaeng Allata’alanu
18Apa nusawala’ a’lampa mange ri Mesir? Ero’ angnginungi je’ne’na Binanga Nil? Apa nusawala’ a’lampa mange ri Asyur? Ero’ angnginungi je’ne’na Binanga Efrat?
19Kaja’dallannu tonji anghukkungi kalennu, nisessako lanri nusorongbokoA’, iNakke, Allata’alanu. Kamma-kamma anne kasia’mi pai’na siagang paccena punna nubokoiA’ siagang tena nupakalompoA’. INakke, Karaeng Allata’alanu anne le’ba’ a’bicara; iNakkemi Karaeng Allata’ala Kaminang Tinggia siagang Makoasaya."
20Nakana Batara, "Sallo mako taeroka anynyomba ri Nakke; taeroka mannuruki yareka mappilangngeri ri Nakke Irate ri tunggala’ bulu’ tinggia nai’, siagang irawanganna poko’ kayu lompoa anjorengko anynyomba ri rewata-rewata kacopponganga.
21Kulamungko rapang poko’ anggoro’ Kupilea battu ri lamungang bajika. Mingka kamma-kamma anne amminra mako, a’jari lamung-lamung liara’ siagang tenaya matu-matunna.
22Manna pole nu’je’ne’ siagang ammake sabung sijaiang, mingka sikamma ra’masa’nu Kucini’ tongiji.
23Barani tojengko angkana tena nupalla’, siagang tenale’bakako amminawang ri Rewata Baal! Ciniki gio’-gio’nu ri lappara’na ka’bunga, u’rangi kaja’dallannu siagang akuimi! Rapangko unta gana balereka, piti lari-lari takkulle nilewai,
24nampa antama’ ri parang lompo sinoa. Tanakulleai naparrangngi punna battu balere’na. Ia cinnaya taparalluami a’boya’ lanri punna wattu pa’lakiang tuli napassareangi kalenna.
25He Israel, teako lari mange angngondangi rewata-rewataya, siagang teako ammarrangngi angkioki ke’nanga, kabokkaki sallang bangkennu nakalotoro’ karro’-karro’nu napakamma turere. Angkanako, ‘Tena, tena oloku lakkulle ammotere’ nasaba’ kungaina rewata-rewataya, nakuero’ amminawang ri ke’nanga.’"
26Nakana Batara, "Rapang palukka’ siri’-sirika ri wattunna nijakkala’, kamma tomminjo batenu lasiri’-siri’ ngaseng, he tu Israel, siagang sikamma karaenga, sikamma pamarentaya, siagang imang-imanga siagang sikamma na’bi-na’binu!
27Lanipakasirikko, lanri sipolong kayu nukio’ bapa’ siagang se’re batu nukio’ amma’. Tena nubattu mae ri Nakke, passangalinna nubokoiA’. Mingka punna battu kasukkaranga, nampami iNakke nukio’ untu’ battu ampasalamakko.
28Kemae ngaseng anjo barhala-barhala nupareka? Punna nia’ kasukkarang, suromi anjo sikamma barhalaya ampasalamakko’ punna akkullei! He Yehuda, anjo rewata-rewatanu sangkammai jaina kota-kotanu!
29Apa tena nungaiangA’ sa’gengKu nubaliang?
30Tena matu-matunnu Kuhukkung, lanri teanu appilangngeri pappakainga’. Rapang singa a’jalloka, sangkamma tomminjo batenu ambunoi sikamma na’binu.
31He umma’ Israel, pilangngeri anne kana-kanangKu. Maka le’bakKa’ a’jari rapang parang lompo mae ri kau yareka rapang butta masassanga? Mingka angngapa nanukana erokko bebasa’, siagang taeroka mako ammotere’ mae ri Nakke?
32Maka nia’ tulolo angkaluppai belo-belona, yareka bunting baine angkaluppai baju buntinna? Mingka ikau sallo sikaliMa’ nukaluppai — takkulleami nirekeng angkana siapami sallona.
33Cara’de’ tojeng-tojengko appare’ akkala’ untu’ angngallei nyawana sikamma tanrinnu. Manna pasundala’ kaminang panraka akkulle tongiji appilajara’ mae ri kau!
34Ra’masaki pakeannu napakamma cera’na tu kasi-asia siagang tau tenaya salana, teai cera’na palukka’ nijakkalaka. Mingka manna nakamma
35nukana ija kalennu tena nusala, angkanaya tena Kularro mae ri kau. Mingka iNakke, Batara, laKuhukkungko lanri tenana nuero’ mangaku angkanaya salako.
36Linta’ sikaliko a’lampa mange ri rewata-rewatana bansa maraenga untu’ appala’ tulung! Mattantu lanipakala’bai nyawanu ri tu Mesir, sangkamma batenu nipakala’ba nyawanu ri tu Asyur.
37Lanubokoi Mesir siagang la’ba pa’mai’ siagang siri’-siri’. INakke, Batara, antollaki ke’nanga tau nupattoanga; tena apa-apa passawallang lanugappa battu ri ke’nanga."