Dual Panel1Ri taung makaappa’ a’jari karaenna Yoyakim ana’ bura’nena Yosia ri Yehuda, anggappa’ pasang battu ri Batara ri passala’na sikontu bansa Yehuda. Anjo wattua taung makase’re ri wattu a’jari karaenna Nebukadnezar ri Babel.
2Kukana ri sikontu bansa Yehuda siagang pandudu’na Yerusalem,
3"Lalang ruampulo antallu taung, appakkaramula battu ri taung makasampulona antallu ammarenta Yosia ana’ bura’nena Amon ri Yehuda, sa’genna anne alloa le’ba’mi a’bicara Batara mae ri nakke siagang tale’baka’ takkaluppa ampabattui mae ri kau ngaseng apa le’baka Napau. Mingka tena nujampangi.
4Tulusu’ Nasurona todong Batara sikamma na’bia atanNa mae ri kau ngaseng, mingka teako ampilangngeri siagang amparhatikangi ke’nanga.
5Nasuroko ke’nanga ampamari batenu attallasa’ ri kaja’dallanga, siagang sikamma panggaukang dosanu, sollannu akkulle ngaseng ammantang tuli ri anne pa’rasangang le’baka Napassareang Batara mae ri kau siagang mae ri boe-boenu a’jari pisakanu.
6Napisangkaiko anjo na’bi-na’bia anynyomba siagang assambayang mae ri rewata-rewata maraenga. Napisangkaiko ke’nanga anynyomba ri barhala-barhala nupareka kalennu, nasaba’ anjo kammaya napakalarroi Batara. Punna nuturuki anjo parentaNa Batara, tena Nahukkungko.
7Mingka KalenNa Batara angkana, angkanaya tena numappilangngeri mae ri Ia. Ba’lalo nupanaiki larroNa lanri anjo barhala-barhalanu. Ikau ngaseng kalennu ampabattui hukkunganNa mae ri kalennu.
8Lanri teanu mappilangngeri ri kana-kananNa, naNakanamo Batara Kaminang Koasaya,
9‘LaKukioki sikontu bansaya battu wara’, kammayatompa atangKu Nebukadnezar karaeng Babel. LaKupaturungi ke’nanga untu’ a’bundu’ angngewai Yehuda siagang pandudu’na kammayatompa sikontu bansa niaka ri tammulilina. Lanipanraki bansa Yehuda siagang bansa-bansa naaganga singngampi’, nampa Kubalang parekang ancuru’ sa’genna satunggu-tungguna. Sikamma tau ancinikai lata’bangkai siagang a’jari mallaki. INakke, Batara, anne akkana.
10Sikamma sa’ranna tau a’rannu-rannua siagang passua’-suarranna pa’buntinganga laKupammari. Latenamo minynya’ lampunna ke’nanga, siagang lacappu’mi gandunna ke’nanga.
11Sikontu anne pa’rasanganga laKubalang parekangi ancuru’ siagang a’jari sino. Bansa-bansa niaka ri tammulilina la’jari atai mae ri karaeng Babel tujupulo taung sallona.
12Le’baki anjo laKuhukkungi bansa Babel siagang karaenna lanri dosana ke’nanga. LaKuruntungi pa’rasangang Babel siagang Kubalang parekangi ancuru’ sa’genna satunggu-tungguna.
13LaKuhukkungi Babel siagang sikontu bala le’baka Kurancanakang mae ri bansa-bansaya siagang le’baka Kupabattu mae ri Yeremia — iamintu sikontu bala niaka nitulisi’ ilalang ri anne kittaka.
14LaKubalasaki sikamma panggaukanna tu Babel; lanipa’jari atai ke’nanga ri karaeng-karaeng lompoa siagang ri jaia bansa.’"
15Batara, Allata’alana Israel, Nakana ri nakke, "Allei anne kaca anggoro’ le’baka Kubonei anggoro’ pangngalarroingKu. Erangi mange ri sikontu bansa nupa’lampaia Kusuro, siagang suroi ke’nanga angnginungi anne anggoroka.
16Punna nainungi ke’nanga, lata’royong-royongi ke’nanga siagang kala’busang pikkirammi lanri pa’bundukang Kupabattua mae ri ke’nanga."
17Jari kuallemi anjo kaca pangnginungang anggoroka battu ri limanNa Batara; nampa a’lampa’ mange ri sikontu bansa kupa’lampaia Nasuro Batara; nampa kupainung ke’nanga anjo anggoroka.
18Yerusalem siagang sikontu kotaya ri Yehuda, siagang sikamma karaenga kammayatompa pagawe-pagawena, kusarei angnginungi anjo anggoroka, sa’genna a’jari ke’nanga rapang parang kalotoro’ appakamallaka. Sa’genna anne alloa arenna ke’nanga nipakei untu’ pattunra.
19Iaminne areng-arenna sikamma tau mustia angnginung battu ri anjo kaca pangnginungang anggoro’Na Batara: karaeng Mesir siagang sikamma pagawena kammayatompa tunna’galaka jabatang; sikontu tu Mesir siagang bansa maraeng niaka ammantang ri Mesir; sikontu karaenga ri pa’rasangang Us; sikontu karaenga ri kota-kota Filistin ri Askelon, Gaza, Ekron; sikontu tau attallasaka ija ri Asdod; sikontu tu Edom, Moab, siagang Amon; sikontu karaenga ri Tirus siagang Sidon; sikontu karaenga ri birinna Tamparang Tangngaya; kota-kota Dedan, Tema, siagang Bus; sikontu tau ancukkuru’ bodoai uu’na; sikontu karaeng Arab; sikontu karaeng suku-suku campurang ammantanga ri parang lompoa; sikontu karaenga ri Zimri, Elam, siagang Madai; sikontu karaenga wara’, bellaya siagang ambania, tunggala’ taua. Sikontu bansa ri sikontu tompo’na buttaya musti nainungi anjo anggoroka. Na tau kala’busanga musti angnginungi anjo anggoroka iamintu karaeng Babel.
20(25:19)
21(25:19)
22(25:19)
23(25:19)
24(25:19)
25(25:19)
26(25:19)
27Nampa Nakana Batara ri nakke, "Pabattui mae ri sikamma anjo taua angkanaya iNakke, Batara Kaminang Koasaya, Allata’alana Israel, ansuroi ke’nanga angnginung sa’genna nasa’ring siagang ta’langnge-langnge. Kupakatu’guruki ke’nanga siagang takkulleai ambangung poleang lanri pa’bundukang Kupabattua mae ri ke’nanga.
28Na punna taeroka ke’nanga antarimai anjo kaca pangnginunganga battu ri limannu untu’ angnginungi anggoro’na, pauangi angkanaya Batara Kaminang Koasaya amparentakangi anjo.
29LaKupakaramulai anjo pangngancuranga ri kota KalengKu. Gassingka nakapangi ke’nanga angkanaya tena nalanihukkung ke’nanga. Ma’nassa lanihukkungi ke’nanga lanri laKupabattui pa’bundukanga mae ri sikontu bansaya ri sikontu linoa. INakke, Batara Kaminang Koasaya, anne akkana.
30Sikontu apa Kupaua mae ri kau, Yeremia, musti nupabattui. Paui mae ri ke’nanga angkana, ‘A’galatturuki sa’ranNa Batara battu ri suruga; battu ri pammantangngang matangkasa’Na a’gamarrung angngewai umma’Na. Sikontu panduduka ri tompo’na buttaya nalangngereki ammarrang rapang pajama anggoro’ ammaccoka anggoro’ ri tampa’ panggilinganga.
31Sa’genna cappa’na buttaya kalangngerang sa’ranNa; appareki parkara Batara mae ri bansa-bansaya. Sikontu taua laniadeli siagang tau ja’dalaka lanihukkung matei.’"
32Nakana Batara Kaminang Koasaya, "Battu ri cappa’-cappa’na buttaya a’gamarrung anging lompoa; bala lompo antujui bansaya tasse’re-se’re."
33Ri anjo alloa maya’ tunibunoa ri Batara latassiaraki ri sikontu tompo’na buttaya. Tena nalanikarruki ke’nanga, tena todong nalaniangka’ untu’ nitarawang, passangalinna lanibalang parekangi bawang ri buttaya sangkamma pa’gompoang loro.
34He pamimping-pamimpinga, he sikamma pakalawaki umma’Na Batara! Angngarru’ lompoko! Anggulung-gulungko lalang ri aua, nasaba’ narapi’mi wattunnu nibuno, siagang ia ta’lappasaka lanipasisa’la’-sa’laki. Lasanrapangko bongki lompoa anggaranna tu’guru’ na reppe’.
35Ma’nassa takkulleako ta’lappasa’.
36Akkunrarengko siagang angngarrukko si’na pa’mai’nu lanri larroNa Batara naNapanraki bansanu kammayatompa Naancuruki anjo pa’rasangannu amanga.
37(25:36)
38Rapang singa assuluka battu ri leanna, kamma tomminjo Batara assuluki untu’ anghukkungi umma’Na. Palla’na pa’bundukanga siagang kalarroanNa Batara ampinrai anne pa’rasanganga a’jari parang lompo.