Dual Panel1Anjo wattua lanakelongangi taua anne kelonga ri butta Yehuda: "Tamaka kassa’na kotata; KalenNa Allata’ala ambangungi pattahanganNa, anrinni lasalamakki’.
2Sungkei sikamma pakke’bu’ lompoa, sollanna antama’ bansa tamamminraya, bansa anggaukangai ero’Na Allata’alana.
3O, Batara, iKatte assare passiamakkang siagang salewangang mae ri tau jarreka pa’mai’na, lanri tappa’na mae ri Katte.
4Tuli tappa’ mako mae ri Batara, saba’ Karaeng Allata’ala tuli anjagaiki’.
5Napakatunai Batara tau tampoa; Naancurukui kota pattahanganna ke’nanga, na Napasilappara’ siagang buttaya.
6Sikamma tu kasi-asia siagang tau pa’risika langngonjo’-onjokangi."
7Tau lambusuka pa’mai’na a’jappai ri oloang lambusuka, saba’ iKatte, Batara, amparekangi oloang.
8Mannuruki ikambe ri kaputusanTa, o Batara, siagang mattayang-tayang ri Katte; iKattemi napuji siagang nakanakkukang atinna ikambe.
9Punna bangngi, nakkuki nyawaku mae ri Katte, punna bari’basa’ mattayangi atingku. Punna sallang Kiadeli buttaya, lanaassemmi pandudu’na linoa apa annabaya.
10Manna nabaji’ nigaukang ri tau ja’dalaka, tena todong napappilajari apa annabaya. Manna ri pa’rasangang niaka hukkunna jekkong tonji gau’na, na taeroka angngakui koasaNa Batara.
11O, Batara, sadia maKi’ langhukkungi musunTa, mingka tanaassengai kalenna ke’nanga. Lappassammi ke’nanga ammakkala’ kacci anciniki pangngamaseanTa mae ri ummatTa. Lappassammi ke’nanga cappu’ niancuru’ ri hukkungang Kisadiakanga mae ri ke’nanga.
12O, Batara, iKatte lampa’jari salewangangi ikambe; sikontu najamaya ikambe, iKattemi anggaukangi untu’ ikambe.
13Le’baki ikambe nikoasai ri karaeng-karaeng maraeng, mingka iKatteji bawang naakui ikambe, o, Karaeng Allata’alana ikambe!
14Matemi ke’nanga siagang tenamo nalattallasa’ poleang, talambangungami ammotere’ rohna. Saba’ cappu’mi ke’nanga le’ba’ Kiancuru’ siagang Kipela’ ri pangngu’ranginTa.
15Le’ba’mi Kipa’lappi-lappi jaina ummatTa, o Batara, Kipa’jari luara’ daerana ikambe, lanri kammana anjo iKattemi nipakala’biri’.
16Le’ba’mi Kihukkung ikambe; lalang ri kasukkarrang a’gilingi ikambe mae ri Katte, siagang appala’ doang mae ri Katte, o Batara.
17Rapang baine lamanaka ammulissara’ siagang ammarrang napakamma pa’risi’, kammaminjo ikambe ri dallekanTa, o Batara.
18Rapangi tau tianang ikambe, ammulisara’ napakamma pa’risi’, mingka tena apa-apa nalassukang ikambe; tena kasalamakkang napassareang ikambe mae ri linoa, tena todong natambai ikambe pandudu’na.
19UmmatTa mateamo lattallasa’ poleangi ammotere’, sikamma maya’na ke’nanga lambangungi ammotere’. Tau le’bakamo nitarawang lalang ri buttaya lambangung poleangi siagang akkio’ rannu. Rapang saliu’ ampakkamalei buttaya, Kipattallasaki ummatTa salloamo le’ba’na mate.
20Antama’ mako ri balla’nu, he bansaku, nampa nutongko’ pakke’bu’nu. Accokko mako untu’ sinampekang, sa’genna ammari larroNa Batara.
21Laturungi Batara battu ri pammantanganNa ri suruga untu’ anghukkungi linoa siagang pandudu’na lanri dosana ke’nanga. Pammunoang le’baka nagaukang cokko-cokko ke’nanga lanisungke ngasengi. Tenamo nalanitongko’ ri butta sikamma tau mate nibunoa.