Dual Panel1Cilakai kota nakalompoang pa’maika sikamma painunna Israel! La’jari toami kaga’ganna, rapang bunga kalumeng niaka ri simbolenna ke’nanga. Cilakai kota tinggia nai’ battu ri tangngana ka’bung copponga, nakalompoanga pa’mai’ sikamma tau sitangnga matea nasa’ring.
2Nia’ se’re tau kassa’ siagang barani laNasuro battu Batara. Kabattuanna nirurungangi ri bosi es siagang anging kancang, rapang bosi lompo siagang a’ba ammanyukkanga. Nakaterassangi na napatappasa’ ke’nanga naung ri buttaya.
3Kalompoang pa’mai’na anjo sikamma pamimping nasa’ringa lanionjo’-onjokangi.
4Masahoro’na anjo kota appakaramulayamo toa, lalanynyaki. Sarenna larapangi rappo ara ti’noka ri wattu alla’; kamma nicini’na, kamma niallena na nikanre.
5Batara Kaminang Makoasaya la’jari rapang bunga ga’ga mae ri umma’Na tassesaya.
6LaNasarei Batara kaadelang sikamma hakinga, kabaraniang mae ri sikamma tau tugasaka anjagai kotaya battu ri pa’bakkana musua.
7Kammayatompa sikamma na’bia siagang imang-imanga nasa’ring tongi, lanri jai duduna anggoro’ siagang inungang terasa’ nainung ke’nanga. Ta’royong-royongi jappana ke’nanga siagang tatto’ro-to’roi lanri tenana nasilolongang pikkiranna. Na’bi-na’bia takkulleai napahang sikamma pangngunju’ Nipappicinikanga mae ri ke’nanga battu ri Allata’ala. Sikamma imanga tena tommo nakkulle natappuki sikamma parkara nieranga mae ri dallekanna ke’nanga.
8Mejana ke’nanga rassi langnge, sa’genna tenamo tampa’ tangkasa’ napakamma.
9Akkunrarengi ke’nanga passala’ ri nakke, nakana, "Nakana kalenna inai naajara’? Inai todong parallu pappakasingara’ battu ri ia? Nakanaka ikatte anne ana’ ca’di beru nisa’la susu?
10Angngapa naia langngajarakki’ tasse’re-se’re hurupu’, tassibuku-tassibuku kana, kammayatompa tassilampang-tassilampang bicara."
11Punna tena ngaseng nuero’ ampilangngeria’, lania’ tau maraeng laNasuro Batara untu’ angngajarakko bicara maraeng, julea nulangngere’.
12Napirarai ngasengko Batara tampa’ pammari-mariang, mingka taerokako mappilangngeri ri Ia.
13Lanri kammana anjo laNaajarakko Batara tasse’re-se’re hurupu’, tassibuku-tassibuku kana, kammayatompa tassilampang-tassilampang bicara. Na ri wattunnu a’jappa latu’guru’ tumingarako sa’gennu loko’, nialle ri sikko’ siagang nitahang.
14Pilangngeri apa Napaua Batara, he sikamma tupacau-caua, ammarentaya ra’ya’ Yerusalem!
15Nukana kalennu le’ba’ mako appare’ panjanjiang siagang kamateanga, kammayatompa appare’ passitujuang siagang lino tau matea. Nupattantui ri kalennu angkana anjo bala labattua sallang talanatujuako, lanri akkala’ balle-ballenu.
16Lanri kammana anjo, kammaminne kananNa Batara Kaminang Tinggia, "LappadongkoKa’ batu pa’dongkokang majarre’ siagang makassa’ ri Sion; se’re batu pundasi ia ka’jalaka ballinna, niaka tulisanna angkana: ‘Inai-inai jarre’ tappa’na, tena nalanibeta.’
17Kaadelanga laKupa’jari pa’baku’, siagang kalambusanga Kupa’jari pangngukkuru’." Bosi batua lambarrasaki sa’genna tangkasa’ sikamma balle-balle nupattoanga. A’baya langnganyukkangi tampa’ paccokkoannu.
18Parjanjiannu siagang kamateanga kammayatompa passitujuannu siagang lino tau matea lanipassala-salangi; sa’genna punna battu balaya, laancurukko nionjo’-onjokang.
19Lanitujuko ri kacilakang situlusu’na, siagang musti nutanggong ngasengi anjo kammaya allo-allo, bari’basa’, tangngaallo siagang bangngi. Lannekkerekko napakamma malla’ punna nupahangi pappasanNa Allata’ala.
20Rapangko tau eroka attinro lalang koi bodoa sa’genna tena nukkulle nupatonrang kalennu. Kalimbu’na kurang la’baki untu’ angkalimbuki kalennu.
21Lammentengi Batara sangkamma ri Moncong Perazim. Laberjuangi sangkamma ri Lappara’ Gibeon untu’ anggaukangi pattujunNa, iamintu pattujuang appakalannasaka mae ri rupataua! LaNagaukangi jama-jamanNa appakalannasaka.
22Kulangngere’mi kaputusanNa Allata’ala Kaminang Tinggia siagang Kaminang Makoasaya, iamintu lanaancuruki sikontu pa’rasanganga. Teako callai anne kana-kana kupabattua, kana-kana pappakaingaka. Sallang la’bi sukkarrangngangi lanupata’lappasa’ kalennu!
23Pilangngeri anne kana-kanangku, parhatikangi pappasangku.
24Se’rea pamarri tena natulusu’ lappa’jeko, ammingkung, siagang a’nangkala ri buttaya untu’ nalamungi.
25Punna sadiamo anjo buttana, appakioro’mi bine, ebara’na bine le’leng siagang bine kebo’. La’lamungi ruang rupa gandung a’barri’-barrisi’, nampa ri birinna lamung-lamung maraeng.
26Naassengi carana anjamai, saba’ le’ba’mi Niajara’ ri Allata’alana.
27Saba’ tena nammake pakkakasa’ pallessoro’ untu’ allessoroki bine le’lenga yareka tena napionjoki roda karoba untu’ anggilingi bine keboka. Mingka Napatunrunji ri sipolonga kayu.
28Ri wattunna nalessoro’ anjo gandunga, tena napatunrung tulusu’na sa’genna ancuru’. Tena! Naassengi antekamma carana allessoroki siagang baji’; a’dongkoki rate ri karobaya natenaja naancuru’ lisere’na anjo gandunga.
29Anjo kacara’dekanna, iamintu kacara’dekang nagappa battu ri Batara Kaminang Makoasaya. Sikontu rancanaNa Batara pore ngasengi siagang tuli a’jari ngasengi.