Dual Panel1Tabellayai ri anjo wattua, tu’guru’ garrimmi Karaeng Hizkia, na’birimmo mate. Mangemi Na’bi Yesaya ana’na Amos antoaki, na nakana, "Appasangi Batara sollanna kipa’le’ba’ baji urusanta, lanri tenamo kilammolle ri garrinta karaeng. Tasalloami nakimate."
2Assailemi Hizkia mae ri temboka nampa appala’ doang nakana,
3"O, Batara, Kiu’rangi laloi angkanaya inakke anne le’ba’ma’ allayaniKi’ siagang pa’mai’ tamamminraku, kammayatompa situlusu’na atingku. Tuli kuusahaimi mannuruki ri erotTa." Nampa angngarru’ pacce Hizkia.
4A’lampanamo Na’bi Yesaya, Nisuromi ri Batara
5ammotere’ poleang mange ri Hizkia nampa napabattu anne pasanga angkana, "INakke, Batara, Allata’ala nasombaya Daud boenu, Kulangngere’mi pappala’ doannu siagang Kucini’mi je’ne’ matannu. LaKutambai umuru’nu sampulo allima taung sallona.
6Ikau siagang kota Yerusalem laKupata’lappasakko battu ri karaeng Asyur. Anne kotaya laKula’langi." Nampa nasuro Na’bi Yesaya taua akkota rappo ara nampa napasapu mae ri lattanna Hizkia sollanna ammolle ammotere’. Akkuta’nammi Karaeng Hizkia angkana, "Apa pammateina angkanaya laNapammollea’ Batara siagang akkulle ija’ a’lampa mange ri Balla’Na Batara?"
7Appialimi Yesaya angkana, "Iaminne pammatei Napassareanga Batara mae ri katte angkanaya Narupai janjinNa.
8Anjo taun-taunna mataalloa untu’ a’jari pannanrai wattu bate pare’na Ahas, lammunduruki taun-taunga sa’genna sampulo garisi’." Jari ammunduru’mi anjo taun-taunga sampulo garisi’.
9Ammollenamo ammotere’ Karaeng Hizkia, annulisi’mi kelong pammuji kamma anne:
10Kukana, nampami sitangnga umurukku nakumusti a’lampamo, ampa’le’baki sesa tallasakku ri lino tau matea.
11Kukana, talakucinikami Batara ri linoa anne, yareka accini’ tau ri anne linoa.
12Tappu’ nyawaku, battumi a’jalakku, rapang kema pakalawaki nibongkara’; rapang kaeng nipolong battu ri pattannungang; kukapangi laNapa’le’ba’mi Allata’ala tallasakku.
13La’busu’ bangngia’ ammarrang napakamma pa’risi’, rapang nilicara’ buku-bukungku ri singa; kukapangi laNapa’le’ba’mi Allata’ala tallasakku.
14Sa’rangku pila’ ca’dimi na pila’ lamma, rapang jangang-jangang bodobangkeng akkunrareng. Mangngammi matangku acconga nai’ ri langi’, Batara, Kilappassanga’ battu ri anne kasusaanga.
15Apa akkulle kupau? Anne gau’Na Batara; takkullea’ attinro lanri si’na.
16O, Batara, Kisarea’ katallassang lanri kananTa siagang panggaukanTa boli’ma’ kamma attallasa’ untu’ iKatte bawang.
17Pacceku tappinrai a’jari kasannangang, iKatte ampasalamaka’ battu ri bahayaya; Kipammopporangi sikamma dosa-dosaku.
18Tena ampujiKi’ lalang lino tau matea, tau matea takkulleai manrannuang ri tamamminraTa.
19Tuttallasa’ bawang akkulle mammuji ri Katte, kamma kugaukanga anne alloa. Tutoa ancaritai ri ana’na ri tamaka tamamminraTa, o Batara.
20Batara, iKatte ampamollea’, jari makkelommi ikambe mammuji ri BallatTa akko’bi’ kacapi, lalang sikontu tallasa’na ikambe."
21(38:6)
22(38:6)