Dual Panel1Kammai anne kananNa Allata’alanu, "Saleori, saleorimi bansaKu!
2Pakasannangi atinna tu Yerusalem, pauangi angkanaya lakala’busammi nipare’ ata. Kupammopporammi salana, le’ba’mi Kuhukkung a’lappi rua sikamma dosana ke’nanga."
3Nia’ kalangngerang sa’ra akkio’ angkana, "Pasadiai oloanga ri parang lompoa untu’ Batara. Lambusi agang lompoa ri parang lompoa untu’ Allata’alata!
4Tunggala’ ka’bunga musti nitambungi, monconga siagang buluka nilappari. Butta a’bontoa la’jari lapparaki, na ia a’buttu-buttua lanilaccuki.
5Nalanipa’nyata kala’biranNa Batara; sikontu rupataua lanasa’bi. Tojeng, KalenNa Batara le’ba’ a’janji!"
6Nia’ sa’ra angkana, "Kabarrangi!" Akkuta’nanga’, "Apa musti kukabarrang?" "Kabarrangi angkana rupataua rapang ruku’, rapang bunga poro sinampe’ji ga’gana.
7Rukuka a’jari kalotoro’, bungaya a’jari kalumeng, punna Napatui’ Batara anging bambanga. Tojeng, anjo bansaya rapangi ruku’.
8Rukuka a’jari kalotoro’, bungaya a’jari kalumeng, mingka kananNa Allata’alata attahangi satunggu-tungguna."
9Naikko ri moncong tinggia, pa’la’bangi kabara’ bajika mae ri Yerusalem! Akkiokko, pilompoi sa’rannu, pa’la’bangi kabara’ bajika mae ri Sion! Paui mae ri kota-kotana Yehuda angkana labattui Allata’alana ke’nanga!
10Ciniki, battui Karaeng Allata’ala siagang koasaNa ero’ anggaukangi kaporeanNa. Nirurungang ri sikamma tau le’baka Nalappassang.
11Rapang sitau pakalawaki amparakai olo’-olo’Na; KalenNa ampa’rappungi ke’nanga. Ana’-ana’ gimbalaka Nakalawingi, na Naemba baji’-baji’ sikamma anronNa.
12Inai ambakuki tamparanga siagang pala’ limanna, yareka angngukkuruki allaka siagang pa’lama’na? Inai ambakuki buttaya siagang pa’baku’ yareka antimbangi monconga siagang buluka ammake dacing?
13Inai ampimpingi Batara, yareka angngajaraKi a’jari tumappakainga’ mae ri Ia?
14Inai Napakkuta’nangngi Batara sollanna anggappa pangngassengang siagang pammahang? Inai assarei pitunju’ untu’ angngalle tindakang cocoka?
15Rapanji siatti’ je’ne’ lalang se’ro’ bansa-bansaya mae ri Batara, rapang silisere’ limbu’bu’ ri timbangang; pulo-puloa sangkammaji ringanna au alusuka.
16Sikontu olo’-olo’ ri romanna Libanon tagannakai lanipa’jari koro’bang nitunu; sike’de’ duduji poko’-poko’ kayuna lanipa’jari kayu tunuang.
17Sikontu bansaya tena anggaranna mae ri Ia, rapang tena apa-apa ri dallekanNa.
18Jari inai lanupasinrapangangi Allata’ala? Inai nukana Naagang sangkamma?
19Tena Nasangkamma patung napareka tukang-tukang, patung nilapisika bulaeng siagang nilapaka pera’.
20Tau tenaya kullena ammali bulaeng yareka pera’, ammilei kayu takkullea linta’ panra’. A’boyai tukang panrea untu’ appare’ patung tenaya nagampang ta’lengga.
21Maka tanuassengai siagang tanulangngerai, siagang tena nanipauangko battu riolo? Maka tena nanupahangi battu riolo antekamma pakaramulana linoa?
22Mappa’jarina ammempoi ri empoang kala’biranNa irate ri bundala’na linoa, pandudu’na buttaya ca’di nicini’ rapang katimbang. Naka’rangi langika rapang kaeng, nampa Napasang rapang kema untu’ nipammantangngi.
23Napa’jari tena kullena tau makoasaya, na tumalompoa tappela’mi kakoasanna.
24Rapangi ke’nanga lamungang lolo, beru accu’laka aka’na. Punna Napatui’ Batara anginga, kalotoro’mi ke’nanga na niri’bakang rapang rarame.
25Inai nukana sangkammanNa Batara Kaminang Matangkasaka? Inai ero’ lanupasangkammangi?
26Ciniki langika, siagang parhatikangi! Inaika ampa’jari sikamma bintoenga? Ia angngatoroki ke’nanga rapang pasukang, Naassengi angkana siapa jaina ke’nanga, nampa massing Nasare areng. Tena manna se’re tappela’, lanri lompona koasaNa Batara!
27Jari he Israel, angngapa nukkunrareng, kamma angkana taNaassengai Karaeng Allata’ala susanu? Kamma angkana taNajampangiai sarennu, natena Naparhatikangi ha’nu?
28Maka tanuassengai siagang tanulangngerai? Batarami Allata’ala mannannungang, ampa’jari sikontu buttaya. Tale’bakai mangngang yareka poso; takkulleai niselangngi pikkiranNa.
29Napakajarreki tau posoa, Nasarei sumanga’ tau tenaya kullena.
30Tau rungkaya a’jari mangngangi siagang posoi ana’-ana’ beru bakkaka tu’guruki lanri tatto’ro.
31Mingka tau manrannuanga ri Batara, langgappai kagassingang beru. Rapangi ke’nanga jangang-jangang rajawali anri’ba’ tinggia siagang kagassingang ka’nyi’na. Lari ke’nanga na tena naposo, a’jappai ke’nanga natena na’jari mangngang.