Dual Panel1Kikekke’mi langika nampa naung maKi’, o Batara, Kipa’goccammi sikamma monconga ri dallekanTa,
2rapang pepe’ amparinrayai kayua siagang ampa’rereai je’neka. Kipa’nyatami koasaTa mae ri musu-musunTa, sa’genna annekkere’ bansa-bansaya ri dallekanTa.
3Le’baki Kigaukang gau’ malompoa, tenaya nasanna-sannai ikambe. NaungKi’, nampa ta’goccang sikamma monconga ri dallekanTa.
4Tale’bakai nia’ allangngere’, siagang tale’bakai nia’ accini’ angkanaya pantaranganna iKatte nia’ ija allata’ala maraeng, angngallea tindakang mae ri tau manrannuanga ri ia.
5Kiruppai tau lambusuka siagang tau attallasaka situru’ erotTa. LarroKi’ mae ri kambe, mingka tuli dorakana ikambe memang battu riolo iji nasala ikambe.
6Ikambe tau rantasa’ ngasengi, ba’lalo manna gau’ baji’na ikambe rantasa’ ngasengi na ra’masa’. Lanynyaki ikambe lanri kaja’dallanna ikambe rapang leko’ kayu kalumeng niri’bakang ri anging.
7Tenanniakka appala’ doang mae ri Katte, yareka appala’ pannulung battu ri Katte, saba’ Kicokkoi rupanTa battu ri kambe, na Kilappassang ikambe nipanraki ri dosana ikambe.
8Mingka iKatte, o Batara, iKatte Manggena ikambe, ikambe butta pi’ ji bawang, na iKatte ampareki ikambe; ikambe yangasenna bate pare’ limanTa.
9Jari tea’ maKi’ larro dudui, o Batara, tea’ maKi’ u’rangi pole dosana ikambe; Kicini’mi anne ikambe ummatTa.
10Kota-kota matangkasatTa sanrapammi parang lompoa, Yerusalem a’jari parang kalotoro’ siagang sino.
11Balla’Na Allata’ala matangkasaka siagang mala’birika tampa’na boe-boena ikambe mammuji-muji mae ri Katte, le’ba’mi niancuru’ ri pepe’; Sikontu tampa’ nangaia ikambe a’jarimi rumbangang.
12Kicini’ ngasemmi anjo sikammaya, o Batara, maka erokKi’ ammantang a’mereki? Maka laKibalang parekangi ikambe angkasiaki sessa dudua?