Dual Panel1Nakana Batara, "Langika empoang kala’birangKu, na buttaya pattuppuang bangkengKu. Jari balla’ antekammaya ero’ nubangungangA’ siagang tampa’ apaya lanupa’jariangA’ pammantangangKu?
2Sikontu linoa sangnging bate pare’ limangKu, jari yangasenna anjo apa nipa’jari. Mingka ia Kungaia iamintu tau tuna pa’maika, assesse’ lalanga lanri dosa-dosana, ia mallaka siagang mannurukia mae ri Nakke.
3Mingka anjo bansaya tuli ero’ kalenna nagaukang; nangai appakaringi’-ringika batena ke’nanga anggaukangi ibadana. Tena sisalana mae ri ke’nanga nikanaya: ammunoa sapi laki siagang ammunoa rupatau, ammolonga ana’ gimbala’ siagang ampolongai kallonna kongkonga; assarea gandung siagang akkoro’bangkang cera’ bawi, attunua kamanynyang siagang anynyombaya patung.
4Lanri kammana anjo laKugaukang tommi apa Kukaerokia naKupitujui ke’nanga sikamma bala nakamallakkanga ke’nanga. Saba’ ri wattungKu akkio’, tena tau appiali; ri wattungKu a’bicara, tena tau appilangngeri. La’bi nangaiangngangi ke’nanga angngewaya ri Nakke siagang anggaukangi ja’dalaka."
5Pilangngeri apa Napaua Batara, he ikau mallaka siagang mannurukia mae ri Ia, "Lanri tamamminranu mae ri Nakke, nia’ ri bansanu angkabirisiko, na taeroka ansileporangko. Nacau-cauko ke’nanga na nakana, ‘Lappassammi Napappicinikang Batara kala’biranNa, sollanna nacini’ ikambe karannuannu.’ Mingka kalenna tonji ke’nanga anggappa siri’-siri’.
6Pilangngeri! Nia’ sa’ra gamarrung ri kotaya; nia’ sa’ra battu ri BallakKu; iaminjo sa’rangKu a’balasaka mae ri musua!
7Kota matangkasakKu rapangi sitau baine allassukanga ri tenanapa nakasiaki pa’risika; allassukanga sitau ana’ bura’ne ri tenanapa nakasiaki nikanaya pa’risi’ punna ammana’.
8Inai le’ba’ allangngereki anjo kammaya? Inai le’ba’ anciniki anjo kajariang kammaya? Mingka lassu’mi bansa Israel ri wattunna appisa’ringimo pa’risi’ lamana’ Sion.
9Teako kapangngi angkanaya laKururungangi ummakKu sa’genna wattu kalassukanna siagang tena naKulappassang ke’nanga lassu’." Kammaminjo kananNa Batara.
10Rannu mako siagang Yerusalem, he sikontu tau mangngaia ri ia. Ikau susaya lanri ia, kamma-kamma anne akkulleko a’rannu-rannu.
11Lanukasiaki kacopponganna rapang sitau ana’ lolo anynyusu ri amma’na.
12Saba’ Nakana Batara, "LaKusareko kasalewangang rapang binanga assolonga; kakalumanynyangnganna bansa-bansaya lanierangi mae ri kau rapang binanga allumpa-lumpaya je’ne’na. Rapangko ana’ nipasusua siagang nikalawinga ri amma’na, siagang nisapu-sapua ulunna ri riwaanna.
13LaKusaleoriko ri Yerusalem, rapang se’rea amma’ ansaleori ana’na.
14Nucini’na anjo kammaya, larannu mako, siagang a’jari gassing mako nukkamale kamma ruku’ lolo. Nalanakasia’mo sikamma atangKu karannuangKu siagang lanakasia’mi kalarroangKu sikamma musu-musungKu."
15Tojeng, labattui Batara siagang pepe’; laNadongkoki karetaNa rapang anging lompo, untu’ ampa’betteseki kalarroanNa, siagang angga’gara’ lompo.
16Saba’ sikontu tau nigappaya nia’ salana lanihukkungi siagang pepe’ na pa’dang, siagang jaimi nihukkung mate.
17Nakana Batara, "Sikontu tau antangkasiai kalenna untu’ a’balulung mange ri koko-kokoa mange anynyomba siagang anggaukangi ibadaya mae ri rewata-rewataya, lalanynyaki siagang tau angnganrea bawi, balao, kammayatompa kanre maraengannaya appakaringi’-ringika.
18Kuassengi pikkiranna siagang panggaukanna ke’nanga. NiakKa’ battu untu’ ampa’rappungangi sikamma taua battu ri sikontu bansa-bansaya. Ri wattunna a’rappung ke’nanga, lanacini’mi ke’nanga koasaKu.
19LammoliKa’ se’re pammatei ri tangnga-tangngana ke’nanga. Sike’de’ji battu ri ke’nanga laKupasalama’. LaKusuroi ke’nanga mange ri bansa-bansa niaka ri sikamma pa’rasangang bellaya, tenayapa nalangngereki kabarakKu yareka tenayapa naciniki kala’birangKu siagang koasaKu: mange ri Tarsis, Libia, siagang Lidia siagang sikamma tucara’de’na ammana, mange ri Tubal siagang Yunani. Lanakabarrangi ke’nanga kalompoangKu ri alla’na anjo bansa-bansaya.
20Battu ri anjo sikammaya pa’rasangang, lanaerangi ammotere’ ke’nanga sikamma sari’battang julu bansanu, a’jari hadia mae ri Nakke. Lanaerangi ke’nanga sikamma anjo taua mange ri bulu’ matangkasakKu ri Yerusalem, a’dongko’ jarang, keledai, unta, kareta siagang bendi, kamma biasaya nagaukang tu Israel punna a’lampa ke’nanga mange ri Balla’Na Batara ri Yerusalem untu’ assare passare gandung lalang pammoneang tangkasa’.
21Nia’ siapa are jaina battu ri ke’nanga laKupa’jari imang siagang tu Lewi.
22Rapang langi’ beru siagang butta beru lattahanga lanri koasaKu, kamma tomminjo turungannu siagang arennu tuli lania’na.
23Tunggala’ Bulang Beru siagang allo Pammari-marianga labattui sikontu umma’ rupataua untu’ anynyomba ri Nakke ri Yerusalem.
24Wattunna a’lampa ke’nanga, lanaciniki ke’nanga maya’na sikamma tau le’baka angngewa ri Nakke. Anjo olo’ angkanreai ke’nanga talamateai, siagang pepe’ angkanreai ke’nanga talamateai rinrana; apa appakamalla’ dudua mae ri sikontu tau ancinikai."