Alkitab Mobile SABDA
[VER] : [MAKASAR]     [PL]  [PB] 
 <<  Yesaya 9 >> 

1(8-23) Mingka tena nasatunggu-tungguna lanakasia’ kasukkarranga anjo pa’rasanganga. Daera napammantangia suku-suku Zebulon siagang Naftali le’baki nikana tuna ri Batara. Mingka ri wattu labattua sallang, Ia lassarei kalompoang sikontu daeraya battu ri Tamparang Tangngaya anrai’ sa’genna ba’leanna Binanga Yordan, ba’lalo sa’genna Galilea napammantangia bansa maraeng.

2(9-1) Bansa attallasaka lalang ri sassanga lacciniki singara’ lompo. Ia ammantanga lalang ri bayang-bayang kamateanga lanisingari ri cayana singaraka.

3(9-2) O, Batara, Kisarei ke’nanga karannuang lompo, Kipa’jari ke’nanga makkio’ rannu. Rannui ke’nanga lanri kabajikanTa, rapang tau a’rannu-rannua wattu napasse’rena wassele’ kattoanna, yareka a’bage barang nirampasa’.

4(9-3) Le’ba’mi Kialle erangngang battala’na siagang lembarang battala’na ri salangganna. Nibetai anjo bansa nangaia anjallakkang ampaccokai ummatTa. Sanrapang ri jammang allaloa ri wattu Kibetana tantara Midian.

5(9-4) A’lappe’-lappeki sa’ra sapatuna tantaraya na bajunna rassi cera’, lala’busu’ nikanre ri pepe’.

6(9-5) Nia’ sitau ana’ lassu’ untu’ ikatte; nisareki’ sitau ana’ bura’ne. Ia la’jari pamimpinta. Laniarengi: "Tumappakainga’ Cara’de’," "Allata’ala Pore," "Mangge Mannannungang," "Karaeng Passiamakkang".

7(9-6) Ammarentai salaku turunganna Daud, kakoasanNa tamaka lompona. Tuli laamangi na salewangang pa’rasanganNa; pamarentahanNa ta’dongkoki rate ri hukkung siagang kaadelang anne kamma siagang satunggu-tungguna. Batara Kaminang Makoasaya, mattantu laNarupaina.

8(9-7) Napabattumi Batara hukkunganga mae ri kakaraenganna Israel.

9(9-8) Sikontu bansa Israel siagang pandudu’ Samaria lanaassengi angkana Batara anggaukangi anjo kammaya. Kamma-kamma anne borroi siagang tinggi langgai ke’nanga. Nakana ke’nanga,

10(9-9) "Rumbammi sikamma bangunang balla’ batua, mingka lappare’ poleangi ikambe balla’ batu beru. Le’ba’mi nita’bang sikamma poko’ kayu araya, mingka lanasambei ikambe siagang kayu camara Libanon kaminang bajika."

11(9-10) Napagio’mi Batara musunna ke’nanga untu’ angngewai ke’nanga.

12(9-11) Bansa Siria bageang iraya siagang bansa Filistin bageang ilau’ angngempoi daerana Israel. Mingka tuli larroNa ija Batara siagang tuli Nahukkunna ija ke’nanga.

13(9-12) Tena ijapa nassesse’ lalang bansa Israel, manna pole nanihukkummo ri Batara Kaminang Makoasaya; tena ijapa natoba’ ke’nanga mae ri Ia.

14(9-13) Lanri kammana anjo lalang sialloji bawang Nahukkung Batara sikamma pamimpinna siagang ra’ya’na Israel. Napolongi ulunna nampa Napela’ ulunna siagang ingkonna.

15(9-14) Ulunna, iamintu tutoa-toana siagang tunipakalompona, na ingkonna iamintu sikamma na’bi assarea pangngajarang sala.

16(9-15) Sikamma pamimpinna anjo bansaya napasala oloammi siagang napa’jari lingumi ra’yaka.

17(9-16) Anjo bansaya a’bokomi siagang panra’mi; yangasenna ke’nanga a’bicara sala mami. Lanri kammana anjo tena manna sitau tau rungka Nipata’lappasa’ ri Batara. Tena Nakamaseangi sikamma jandaya siagang ana’-ana’ kukanga. Mingka tuli larroNa ija siagang tuli Nahukkunna ija Batara ke’nanga.

18(9-17) A’rinrai rapang pepe’ kaja’dallanna ke’nanga na nakanre sa’genna cappu’ rompo’ katintinga. Rinrana rapangi romang akkanre, jai sikali nai’ umbunna.

19(9-18) Sanna’ larroNa Batara Kaminang Koasaya, na hukkunganNa rapangi pepe’ a’rinra lompo; nampa anjo bansaya napare’ kayu tunuang sa’genna cappu’ nakanre pepe’. Tena manna sitau angkamaseangi sari’battanna.

20(9-19) Ri sikontu anjo pa’rasanganga massing a’re’bu’mi siagang sambarang mami apa-apa nakanre, mingka tena bassoro’na ke’nanga. Ba’lalo massing para iami sikanre-kanre sipa’agangngang!

21(9-20) A’bundu’mi tu Manasye siagang tu Efraim, nampa assama ke’nanga angngewai Yehuda. Mingka tuli larrona ija Batara siagang tuli Nahukkunna ija ke’nanga.


  Share Facebook  |  Share Twitter

 <<  Yesaya 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel