Dual Panel1Nampa battu ri pakkemaanga ri Sitim, nasuromi Yosua rua mata-mata a’lampa mange ri Kanaan. Naparentakangi anjo ruaya tau untu’ accokko-cokko ansalidiki Kanaan, lomoro’ se’rea iamintu kota Yerikho. Jari a’lampami ke’nanga mange ri anjo kotaya, nampa a’bangngi ri se’reang balla’ baine pagau’ bawang, niarenga Rahab.
2Nalangngereki karaenna kota Yerikho angkanaya nia’ tu Israel battu ammata-matai daera Yerikho.
3Jari nia’mo tau nasuro anjo karaenga mange ri Rahab untu’ ampabattui parenta kammaya anne, "Pasuluki anjo sikamma tau niaka a’bangngi anjoreng ri ballaka. Anjo ke’nanga mata-mata battu untu’ ansalidiki daera Yerikho!"
4Appialimi Rahab angkana, "Memang nia’ tau battu mae ri ballakku, mingka tena nakuassengi angkana battu kemaei ke’nanga. A’lampami sumpaeng ke’nanga ri wattu appakaramulana sassanga ri tenanapa nike’buki pakke’bu’ lompona kotaya. Nampa tena nakukuta’nangi ke’nanga angkana la’lampa kemaei ke’nanga; mingka punna niondangi linta’, akkulle iji kapang nirapi’ ke’nanga." (Nampa sitojenna le’baki nacokko Rahab anjo ruaya mata-mata irawanganna raramea ri pammakkang balla’na.)
5(2:4)
6(2:4)
7Jari a’lampami anjo tau nasuroa karaenga ambokoi kotaya. Ri wattunna pantara’mo ke’nanga, nike’bu’mi pakke’bu’ lompona kotaya. Naboyami ke’nanga anjo ruaya mata-mata sa’genna ri tampa’ pa’limbangnganga ri Binanga Yordan.
8Anjo bangngia, ri tenanapa nattinro anjo tau ruaya mata-matana tu Israel, nai’mi Rahab ri pammakkang balla’na,
9nampa nakana ri ke’nanga, "Kuassengi angkanaya le’ba’mi Napassareang Batara anne pa’rasanganga mae ri kau ngaseng. Sikontu tau niaka anrinni malla’ ngasengi ri kau ngaseng.
10Nalangngere’mi ikambe kabara’na, angkana antekamma bateNa Batara ampa’jari kalotoroki Tamparang Alara’ ri dallekannu ngaseng, ri wattunna nubokoi Mesir. Nalangngere’ tommi ikambe kabara’na angkana antekamma batena nubuno Sihon siagang Og, iamintu rua karaeng bansa Amori ri rayanganna Binanga Yordan.
11Nalangngere’na ikambe anjo carita-carita kammaya, a’jari malla’ sikalimi ikambe. Sikontu taua tappela’ ngasemmi kabaranianna lanri ikau ngaseng. Karaeng Allata’alanu ma’nassa Ia tojeng Allata’ala Kaminang Makoasaya ri langika siagang ri buttaya.
12Kuminasai kiero’ assumpa lanri arenNa angkanaya lakigau’ bajiki kaluargaku sangkamma apa le’baka kugaukang mae ri katte. A’janji maki’ angkanaya tena nalakibuno anrong manggeku, sikamma sari’battangku siagang sikamma kaluargana ke’nanga, passangalinna lakila’langngi. Siagang sarema’ se’re pammatei ri ma’nassana angkanaya akkulle ngasengki’ nipatappa’!"
13(2:12)
14Appialimi anjo tau ruaya angkana, "A’janji ikambe angkana punna Napassareang Batara anne pa’rasanganga mae ri kambe, lanagau’ bajikko ikambe, assala’ tena nanucaritai manna pole ri nai anne passala’na ikambe. Nitunrai ikambe ri Batara punna tanarupaia ikambe anjo janjinna ikambe."
15Lanri anjo balla’na Rahab iratei ri tembo’na kotaya nibangung, jari napanaummi Rahab anjo tau ruaya battu ri jandelaya naoloro’ naung siagang otere’.
16Nakanamo Rahab ri ke’nanga, "A’lampako mange ri daera pa’monconganga, sollanna tena nijakkalakko ri tau nasuroa karaenga. Accokkoko anjoreng sa’genna tallungallo; punna ammotere’mo ke’nanga nampa mako akkulle ampannarrusuki lampanu."
17Nakanamo anjo turuaya mata-mata mae ri Rahab, "Baji’mi; tena tanarupaina janjinna ikambe situru’ pappala’nu mae ri kambe.
18Mingka ia anne musti nugaukang. Punna battu sallang ikambe ambunduki pa’rasangannu, parallui anne otere’ ejaya nupasikko’ ri anne jandelaya, tampa’nu ampanaungi kambe. Anrong manggenu, sikamma sari’battannu, sikontu bija pammanakanna manggenu, parallui nupasse’re anrinni ri balla’nu.
19Punna nia’ kalase’renna ke’nanga assulu’ battu ri anne ballaka nampa mate nibuno, lanri kasalanna tonji antu namate; ta’lappasaki ikambe battu ri kasalanga. Mingka punna nia’ tau anggappa bala lalang ri anne ballaka, ikambe pata sala.
20Kabalekanna, punna nia’ tau nupauang anne passala’na ikambe, ta’lappasaki ikambe battu ri anjo janji nupalaka mae ri kambe."
21Situjumi Rahab ri anjo passalaka nampa nalappassang ke’nanga a’lampa. Nampa napasikko’ anjo otere’ ejaya mae ri jandelana.
22A’lampami anjo turuaya mata-mata mange ri daera pa’monconganga nampa accokko anjoreng. Tallungalloi sallona anjo sikamma tunasuroa karaenga amboyai ke’nanga ri kere-keremae ri sikontu anjo daeraya, mingka tanabuntulai ke’nanga. Kale’bakkanna ammotere’mi anjo sikamma tunisuroa a’boya mange ri Yerikho.
23Nampa naummo battu ri monconga anjo ruaya mata-matana tu Israel nampa a’limbang ri binangaya, ammotere’ mange ri Yosua. Nalaporo’ ngasemmi ke’nanga sikamma pangalamanna ke’nanga.
24Nampa nakana ke’nanga, "Mattantu Napassareangi Batara anjo sikontu pa’rasanganga mae ri katte; sikontu tau niaka anjoreng malla’ ngasengi mae ri katte."