Alkitab Mobile SABDA
[VER] : [MAKASAR]     [PL]  [PB] 
 <<  Yosua 6 >> 

1Ri kota Yerikho nijagai majarre’mi siagang nitongko’ rapa’mi sikontu pakke’bu’ lompoa sollanna takkullea tu Israel antama’. Tena manna sitau nipa’biang antama yareka assulu’ battu ri anjo kotaya.

2Nakanamo Batara ri Yosua, "Kamma-kamma anne Kupassareangi mae ri kau anjo Yerikho siagang karaenna kammayatompa sikontu tantara baranina.

3Ikau siagang tantaranu musti a’barrisikko angkulilingi anjo kotaya sikali siallo lalang annangallo.

4Tuju imang, massing angngerang tarompe’ musti a’jappa ri dallekanna Patti Parjanjianga. Ri makatujuna alloa, ikau siagang tantaranu musti nuinroi anjo kotaya pintuju nampa sikamma imanga natui’ ngasengi tarompe’na.

5Nampa anjo sikamma imanga musti natui’ la’bu ngasengi tarompe’na. Kamma nulangngere’na ngaseng anjo sa’ra tarompe’ la’bua, sikontu tantaraya musti appadai akkio’ lompo, nampa laruntung tembo’ kalli’na anjo kotaya. Nampa antama’ ngaseng memang mako ri anjo kotaya."

6Jari nakio’mi Yosua sikamma imanga, na nakana, "Angkaki anjo Patti Parjanjianga; tuju tau battu ri kau ngaseng musti a’jappa ri dallekanna siagang angngerang tarompe’."

7Nampa nasuro Yosua a’barrisi’ tantarana angkulilingi anjo kotaya, siagang nia’mo barisang pangawala’ ri dallekang a’jappaya ri dallekanna Patti ParjanjianNa Batara.

8Situru’ parentana Yosua, a’jappami barisang pangawala’ ri dallekanga, iamintu ri dallekanna sikamma imang-imang patui’ tarompeka, nipinawang ri imang-imang a’buleka Patti Parjanjianga, nampa nitongko’ ri barisang pangawala’ kaminang ri bokoa. Lalang a’jappana ke’nanga, nipasa’ra turusmi tarompeka.

9(6:8)

10Sikontu tantaraya le’ba’ ngasemmi niparentakang angkanaya takkulleai ke’nanga akkio’ lompo siagang a’bicara manna sibuku kana punna tenapa nassare kode Yosua.

11Kammaminjo nanasuromo Yosua tantarana angngerangi Patti Parjanjianga angnginroi anjo kotaya sikali, nampa ammotere’ mange ri pakkemaanna ke’nanga siagang a’bangngi anjoreng.

12Ammukona ri bari’basa’ dudua, ambangummi Yosua, nampa a’barrisi’mi makapinruanna sikamma imanga siagang tantaraya angnginroi anjo kotaya; susunna anjo barisanga sangkammai ri allo makase’rea: uru-uruna barisang pangawala’ ri dallekang, nampa tujua patui’ tarompe’, nipinawang ri imang-imang a’buleka Patti Parjanjiang, nampa kala’busanna iamintu barisang pangawala’ bageang ri bokoa. Lalang kammana anjo nipasa’ra turusmi tarompeka.

13(6:12)

14Ri anjo allo makaruaya nainroi ke’nanga sikali anjo kotaya nampa ammotere’ mange ri pakkemaanga. Kammaminjo nagaukang ke’nanga tunggala’ allo lalang annangallo.

15Ri makatujuna alloa ambangummi ke’nanga ri wattu beru ammumbana alloa, nampa a’barrisi’ angnginroi anjo kota Yerikho sangkamma biasa, mingka anjo alloa sa’genna pintuju nainroi. Iajinjo bawang alloa napintuju nainroi ke’nanga anjo kotaya.

16Ri makapintujuna nainroi, kamma natui’na sikamma imanga tarompe’na, nasaremi kode Yosua sikontu pasukanga sollanna akkio’ lompo. Nakana Yosua, "Napassareammi Batara anne kotaya mae ri kau!

17Sikontu kotaya siagang sikontu bonena musti niancuru’ taba sikali salaku passare mae ri Batara. Poro iajinjo bawang Rahab, iamintu anjo baine pagau’ bawanga siagang sikamma bija pammanakanna akkulle nilappassang attallasa’, lanri le’ba’na nabantu mata-matata.

18Takkulleako angngalle apa-apa battu ri anjo sikontu apa mustia niancuru’. Punna nuallei, lanitujui pakkemaanna Israel siagang cilaka na bala.

19Sikontu barang-barang pera’, bulaeng, tambaga, siagang bassia musti nisa’laki untu’ Batara, nampa niboli’ ilalang ri tampa’ pammolikang barang-baranNa Batara."

20Nampa natui’mo sikamma imanga tarompe’na. Na kamma nalangngere’na tu Israel anjo sa’ra tarompeka, akkio’ lompo-lompomi ke’nanga, sa’genna runtummo tembo’ kalli’ kotana Yerikho. Tulusu’mi nai’ sikontu tantara Israel, nampa antama’ siagang naempoi anjo kotaya.

21Sikamma tau niaka lalang ri anjo kotaya, tau toa yareka tau rungka, bura’ne yareka baine, nabuno ngasemmi ke’nanga siagang pa’dang. Manna sikontu olo’-oloka kammayami sapi, gimbala’, siagang keledai nabuno ngaseng tongi ke’nanga.

22Nakanamo Yosua mae ri anjo ruaya tau le’baka a’jari mata-mata, "A’lampako mange ri balla’na anjo baine pagau’ bawanga, siagang erangi assulu’ siagang ngaseng kaluargana sangkamma le’baka nupa’janjiang mae ri ia."

23Jari a’lampami anjo ruaya mata-mata, nampa naerang assulu’ Rahab siagang anrong manggena, sikamma sari’battanna, kammayatompa bija pammanakanna maraenga. Anjo sikontu kaluargana Rahab siagang sikamma atanna nierangi assulu’ mange ri tampa’ amanga ri ampi’na pakkemaanna tu Israel.

24Nampa natunu tantara Israel sikontu anjo kotaya siagang sikontu apa-apa niaka lalang, pantaranganna barang-barang bulaenga, peraka, tambagaya siagang bassia. Anjo barang-barang kammaya naallei ke’nanga siagang naerangi mange ri tampa’ pammolikang barang-baranNa Batara.

25Mingka anjo Rahab siagang sikontu bija pammanakanna nilappassangi attallasa’ ri Yosua, lanri le’ba’na nabantu anjo ruaya mata-mata nasuro Yosua mange ri Yerikho. (Sa’genna anne alloa nia’ ija jari-jarina Rahab ri Israel.)

26Anjo wattua napasuluki Yosua pappisangka kammaya anne, "Inai-nai ero’ angngusahakangi untu’ ambangungi ammotere’ anne kota Yerikho, lanitabai ri pattunraNa Batara. Inai-nai lantannangngi batu pondasi, latappelaki ana’ toana; na inai-nai ampatabai sikamma pakke’bu’ lompona, latappelaki ana’ bungkona."

27Nirurungangi Yosua ri Batara, siagang a’jari masahoroki arenna Yosua ri sikontu anjo pa’rasanganga.


  Share Facebook  |  Share Twitter

 <<  Yosua 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel