Alkitab Mobile SABDA
[VER] : [MAKASAR]     [PL]  [PB] 
 <<  Zakharia 1 >> 

1Ri bulang makasagantuju lalang taung makarua ammarentana Karaeng Darius ri Persia, Napabattui Batara anne pasanga mae ri nakke, Na’bi Zakharia ana’na Berekhya cucunna Ido.

2Naparentakangi Batara mae ri nakke untu’ akkana kamma anne mae ri umma’Na, "Ri jammang allaloa, iNakke, Batara Kaminang Koasaya, sanna’ larroKu mae ri boe-boenu.

3Mingka kamma-kamma anne Kukana mae ri kau ngaseng: Ammotere’ mako mae ri Nakke, naKuammotere’ todong mae ri kau ngaseng.

4Teako sangkammai boe-boenu. Wattu jammang riolo napabattui sikamma na’bia pasangKu mae ri ke’nanga sollanna tanagaukangngamo gau’ ja’dalaka siagang gau’ dosaya ke’nanga. Mingka tanajampangiai ke’nanga siagang taerokai ke’nanga mannuruki ri Nakke.

5Kemaemi boe-boenu siagang anjo na’bi-na’bia ri kamma-kammaya anne? Tena ngasemmi ke’nanga.

6Tete ri sikamma anjo na’bi atangKu ngaseng, Kupabattumi sikamma parentaKu siagang sikamma pappakaingakKu mae ri boe-boenu. Mingka tena najampangi ke’nanga sa’genna musti natanggongi ke’nanga kale’bakkang kajariang kodina. Nampa assesse’ lalammo ke’nanga, siagang mangakumi ke’nanga mae ri Nakke angkanaya iNakke, Batara Kaminang Koasaya, le’ba’ anghukkungi ke’nanga situru’ kasalanna ke’nanga, siagang sangkamma apa le’baka Kupattantu."

7Ri tanggala’ ruampulo angngappa’ bulang Syebat, iamintu bulang sampulo asse’re, lalang taung makarua ammarentana Karaeng Darius, Napabattui pasanNa Batara mae ri nakke. Lalang se’re paccini’ ri wattunna bangngi,

8kuciniki malaeka’Na Batara a’dongko’ sikayu jarang eja. Ammantangi ri se’reang ka’bung lappara’ ri alla’na poko’-poko’ kayu mura’. Ri bokona nia’ pirangkayu are jarang maraengannaya ammenteng, nia’ eja tanja’na, nia’ lango-lango siagang nia’ todong kebo’.

9Akkuta’nanga’ mae ri ia angkana, "Karaeng, apa battuanna ngaseng sikamma anne jaranga?" Appialimi angkana, "Lakusungkei battuanna mae ri kau.

10Nisuroi battu ke’nanga ri Batara untu’ amparessai linoa."

11A’laporo’ ngasengi anjo jaranga mae ri malaekaka angkana, "Le’ba’mi ikambe a’jappa alla’bang ri sikontu tompo’na buttaya, nama’nassa angkanaya anne linoa sannangi siagang amangi."

12Nampa nakanamo anjo malaekaka, "O, Batara Kaminang Koasaya, tujupulo taummi salloTa larro mae ri kota Yerusalem siagang kota-kota niaka ri Yehuda. Siapapi salloTa tuli lalarro siagang tena naKipammopporangi ke’nanga?"

13Appialimi Batara mae ri anjo malaekaka siagang kana-kana manynyaleori;

14nampa nasuroa’ anjo malaekaka ampabattui apa Napaua Batara Kaminang Koasaya angkana, "Sanna’ Kukarimangnginna siagang Kujampanginna kota Yerusalem, iamintu kotaKu matangkasaka.

15Mingka sanna’ larroKu mae ri bansa-bansa nakanaya amang siagang sannang pakkasia’na. Nasaba’ ri wattunna Kutahang larroKu mae ri ummakKu, anjo bansa-bansaya pila’ natambai sessana ummakKu.

16Kamma-kamma anne ammoterekKa’ mae ri Yerusalem untu’ ampamopporangi anjo kotaya. Lanibangungi ammotere’ BallakKu siagang lanipakabajiki ammotere’ kota Yerusalem."

17Nasuro tonga’ anjo malaekaka ampabattu tongi anne pasang angkanaya, "A’janji Batara Kaminang Koasaya angkanaya la’jari coppongi kota-kotaNa siagang angkanaya sikalipi pole laNatulung Yerusalem na Naani angkanaya Ia ampatangi."

18Lalang ri paccini’ maraengannaya, nia’ kucini’ appa’ tanru’ sapi.

19Akkuta’nanga’ mae ri anjo malaeka’ le’baka a’bicara mae ri nakke, angkana, "Apa ngaseng battuanna anjo sikamma tanruka?" Appialimi angkana, "Anjo sikamma tanruka iamintu pangngebarranna sikamma kakaraengang makassaka ampatassimbung-simbungai pandudu’na Yehuda, Israel siagang Yerusalem."

20Nampa Napappicinikang Batara mae ri nakke appa’ tukang bassi angngeranga palu-palu.

21Akkuta’namma’ angkana, "Apa ero’ kabattuanna ke’nanga?" Appialimi angkana, "Untu’ ampata’bangkai siagang untu’ anggulungi bansa-bansa le’baka angngancu’-ancuruki Yehuda kammayatompa ampatassimbung-simbungi pandudu’na."


  Share Facebook  |  Share Twitter

 <<  Zakharia 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel