Dual PanelSaratu' appa' tapulo appa' sa'bunna to Israel dibeen tanda
1Mangkai too, ummitamo' appa' malaeka' ke'de' ussandai appa' katetukna lino, urrinding appa' katumbunan bara', aka' indana dengan bara' mangngiri' yao gantanan battu' dio tasik, iaraka anna lako to' kayu.
2Angku mane ummita malaeka' senga' lu yaya mai tandai kabuttuan allo, umbaa petandana Puang Allata'alla, Dewata tuo. Napemandui metamba lako inde appa' malaeka' to mangka dibeen kuasa la ussanggangngi lino anna tasikke,
3nakua: “Dau tokke' ussanggangngi gantanan sola tasik battu' angganna to' kayu, ke ta'pa mangka kitandai kidena angganna sabua'na Puang Allata'alla, Dewatanta.”
4Anna mane pokadanna' kumua saratu' appa' tapulo appa' sa'bunna tau ditandai kidena. Inde mai taue pantan diala dio mai sapulo dua to'na pembatisanna to Israel,
5iamo pa'pabuttunna Yehuda sapulo dua sa'bunna tau, pa'pabuttunna Ruben sapulo dua sa'bunna tau, pa'pabuttunna Gad sapulo dua sa'bunna tau,
6pa'pabuttunna Asyer sapulo dua sa'bunna tau, pa'pabuttunna Naftali sapulo dua sa'bunna tau, pa'pabuttunna Manasye sapulo dua sa'bunna tau,
7pa'pabuttunna Simeon sapulo dua sa'bunna tau, pa'pabuttunna Lewi sapulo dua sa'bunna tau, pa'pabuttunna Isakhar sapulo dua sa'bunna tau,
8pa'pabuttunna Zebulon sapulo dua sa'bunna tau, pa'pabuttunna Yusuf sapulo dua sa'bunna tau anna pa'pabuttunna Benyamin sapulo dua sa'bunna tau.
Kombonganna rupa tau tadiissan disangai budanna
9Mangkai too, ummitamo' tau tirempun tadiissan disangai budanna. Ke'de' dio tingngayona tongkonan layuk anna Anak Domba. Napissanni ma'bayu rui' mabusa, anna pantan ummanda'i daun andulan. Inde mai taue pantan lu dio mai ma'rupa-rupa kaparentaan, pembatisan, botto-ma'botto anna basa.
10Sipetamba-tambaan nakua: “Kasalamasanta lu yao mai Puang Allata'alla, to ummokko' yao tongkonan layuk, anna lu yao mai Anak Domba.”
11Napissannimi malimuntu' untingngayo tongkonan layuk umpenombai Puang Allata'alla inde malaeka' ulliling tongkonan layuk sola perepi' anna appa' penatuoe.
12Sipetamba-tambaammi nakua: “Amin! Kipakasalle Puang Allata'alla, Kipomatande Dewatanta, Kurru' sumanga' kipakendek langngan sae lako-lakona! Kiakui kumua Puang Allata'alla: to randan keaka' to ma'kuasa anna to matogon sae lako-lakona! Amin.”
13Dengammi mesa perepi' mekutana lako kaleku, nakua: “Bennara inde lako ma'bayu rui' mabusae anna umba naola sae?”
14Kukuamo: “Tae' kuissanan tuang, ikoria ummissananni.” Nakuamo: “Inde mai taue iamo to mangka ussa'dingan pandarraan mabanda'. Mangka asammi umbasei bayu rui'na umpake rarana Anak Domba napolalan mabusamo.
15Iamo napolalan ke'de'mo dio olona tongkonan layukna Puang Allata'alla anna menomba allo bongi illalan Banua Ada'na Puang Allata'alla. Anna To ummokko'mo yao tongkonan layuk la ummongannii.
16Inde lako taue ta'mo la tadea', ta'mo la mawarrang, ta'mo la ussa'dingan malassunna allo,
17annu' Anak Dombamo, to ke'de' dio sa'dena tongkonan layuk, la ungkambi'i anna untettei lako kalimbuang tamatti', kalimbuangna wai katuoan. Anna Puang Allata'allamo la umpolisanni wai matanna.”