Dual PanelHanang Mori Keraéng Ata Beté-Bicar
1Nahé ata lélo ami: Cama ného mendi di Kristus, hiot imbi le Mori Keraéng te caun pété ceha adak Surga.
2Cemoln, isét keturu paka ciri mendi di Kristus kudut isé ngancéng imbi le Mori Keraéng.
3Latang te aku toé manga co’o laingn, koném po aku beté-bicar le méu ko beté-bicar le manusia. Aku kolé toé gorig te beté-bicar weki rug.
4Ai baé laku, aku toé manga salag, landing toé le hitu aku ciri molork, maik Mori Keraéng ata beté-bicar akuy.
5Landing hitu néka beté-bicar émé toé di hitu redun, ngong émé toé di mai Mori Keraéng. Hia te pandé gérak apa situt ceha oné nendép, agu Hia kudut totos apa situt nanéng oné nai. Du leson tai, néténg ata kudut tiba naring de Mori Keraéng.
Jinggop Koé Ba Wekis
6Ase ka’én, sanggéd curup situ bebolod te hena kolé oné weki rug aku agu hi Apolos, landing te di’a méu. Kudut oné-mai tuming dami, pecing le méu apa betuan go’ét ho’o: “Néka lagé ata poli tulis.” Kudut néka manga oné-mai méu ata mésé nai ali méséng kéta hiat cengata oné-mai ata bana.
7Ai céing ata bilang hau ciri ata mengit? Apa néng ata manga oné hau ata toé tiba oné-mai Mori Keraéng? Émé tu’ung tibas le hau, co’o weli tara pandé angos weki rum, néhot paéng de rum?
8Méu poli becurs, poli ciri boras, poli ciri rajas, maik ami toé. Oé, céwé di’an émé tu’ung méu poli ciri rajas, wiga ami kolé lut méu ciri rajakm.
9Ai lorong nuk daku, Mori Keraéng poli téing oné ami sanggéd rasul osang ata taki-wan, cama ného ata siot poli beté-bicar kudut matas. Ai ami poli ciri ata te porong laing latang te lino ho’o, latang te malékat-malékat agu latang te manusia.
10Ami ciri bodok ali imbi oné Kristus, maik méu ciri nggalas ali imbi oné hi Kristus. Ami les, maik méu mberes. Méu mengitm, maik ami ciri ata bocik.
11Dengkir ho’og ami darem, masa waé, lacokm, ongga latakm, agu mosé lé-lau kaut,
12agu pandés lami sanggéd gori ata mendod. Émé tidakm lata, ami berkak isé situ, émé onggakm lata, ta’ong kaut lami,
13émé loérkm lata, walé joél isé lami, ami cama ného wéang de lino, cama ného saki oné-mai sanggéd cao-ca dengkir te ho’on.
14Sanggéd taung so’o tulis taungs laku, toé kudut pandé ritak méu, maik kudut wahéng méu sanggéd anak ata momang daku.
15Ai koném capa kauts dod guru ata toing méu te lorong hi Kristus, toé dod ema de méu. Aku dé ema de méu ata lorong Kristus Yésus, ai aku ata wéro Keréba Di’a hitu oné méu.
16Landing hitu aku toing méu: Lorong koé le méu toming daku!
17Landing le hitu tara wuatn laku hi Timotéus. Hia anak momang daku, ata junggu oné Mori Keraéng. Hia kudut pandé nuk taungs le méu, co’o mosé daku ali lorong hi Kristus Yésus, cama ného ata toing daku oné nia-nia kaut wan ata serani.
18Maik manga pisa taus oné-mai méu ata ciri mésé nais, ai bet disé aku toé mai kolék.
19Maik aku kudut gélang ngo oné méuk, émé ngoéngn Mori Keraéng, agu aku kudut baé toé latang te curup data situt mésé nai, maik ngong mberes disé.
20Ai adak de Mori Keraéng toé oné-mai tombo, maik oné-mai kuasa.
21Apa weli ngoéng de méu ga? Aku paka ngo oné méu agu lecék méu, ko ali momang agu lembés?