Alkitab Mobile SABDA
[VER] : [MANGGARAI]     [PL]  [PB] 
 <<  1 Petrus 2 >> 

Mori Yésus Ného Watu Landuk

1Landing hitu oké-koés sanggéd da’at, sanggéd nggapét, sanggéd pisik, jogot agu pocu.

2Jari koém ného anak wara hiot loas weru, hiot masa mtaung waé cucu ata nggélok, ngong reweng de Mori Keraéng, ali hitu uwa imbis agu haéng selamak.

3Manga tulis oné Surak Nggeluk: “Poli mantén tu’ung le méu di’a de Morin.”

4Ali hitu, mai ruis ga oné Hia, ai Hia hitu watu ata téing mosé. Watu hitu poli okén le manusia, maik pilé agu hiangy le Mori Keraéng.

5Méu ondang wekis te papé laing ného watu mosé, te pandé ca mbaru nggeluk de Mori Keraéng. Ali hitu méu ciri ného imam ata gori latangt Mori Keraéng, agu létang hi Yésus Kristus podo takung ata henan oné nai de Mori Keraéng.

6Ai manga tulisn oné Surak Nggeluk: “Lélo dé, Aku poli pésék ca watu oné béndar Sion, watu landuk ata poli nggalé agu wegitn, céing ata imbi oné Hia, toé manga ritak laingn.”

7Watu hitu wegitn latang te méut imbi, maik latang te isét toé imbi: “Watu hitut poli okén le tukang, ciri watu landuky, poli kolé ciri watu pangga ata pandé timpok laing.”

8Hia ciri watu te timpok isé, ai isé toé lorong reweng de Mori Keraéngs. Hitu muing wérétd isé le Mori Keraéng.

9Maik méu dé wa’u ata poli pilés, imam ata gori keturu raja, wa’u nggeluk, ro’éng Run Mori Keraéng. Méu poli pilés te keréba sanggéd pandé lenget Diha, hitut poli bénta méu pé’ang oné-mai nendep nggere-oné gérakN hitut néra.

10Danong méu toé ro’éng de Mori Keraéngm, maik te ho’on poli ciri ro’éng Dihas. Danong méu toé momangm le Mori Keraéng, maik te ho’on poli tiba momang Dihas.

Mendi De Mori Keraéng

11Asé-ka’é ata momang laku! Aku toing méu, ai méu ata long agu ata mbéot oné lino ho’o. Tadang koém oné-mai belek da’at hitut toé ké’ét dungkang wakar.

12Di’a koé ba wekis oné bahi-réha wa’u situt toé pecing Mori Keraéngs, kudut émé pocu méus te méu ata pandé da’at, ngancéng ita kin lisé sanggéd pandé di’a de méu agu bong Mori Keraéngs du leso mai Diha.

13Lorong toming de Morin, junggu koém latang te sanggéd ata cau kuasa, pu’ung oné-mai Kaisér ata landongn kuasa,

14dengkir agu gubérnur ata téti le Kaisér latang te wahéng sanggéd ata pandé da’at agu hiang sanggéd ata pandé di’a.

15Ai ho’oy ngoéng de Mori Keraéng: Ali pandé di’a, méu tadu mu’u data bodok.

16Mosé koém ného ata toé mendi, maik néka papé mosé toé mendi hitu latang te tadu sanggéd da’at, maik mosé koém ného mendi de Mori Keraéng.

17Hiang ga sanggén ata, momang koés sanggéd asé-ka’é ca imbi, hiang ga Mori Keraéng, hiang ga Kaisér!

Kélo Di Kristus Ného Ca Toming

18Oé méu sanggés mendi! Junggu koém kamping moris ali hiang, toé hanang latang te isét di’a naid agu joél, maik latang te isét gutek kolé.

19Émé méu ta’ong kélo hitut toé paka tanggong le méu landing noing ngoéng de Mori Keraéng, méu te tiba widangm.

20Ngancéng weli naring laing ko, émé méu ta’ong hena le ongga, ai méu pandé ndékokm? Émé méu ta’ong susa landing le pandé di’a, méu te tiba widang oné-mai Mori Keraéng.

21Ali hitu tara béntas méu le Mori Keraéng, ai hi Kristus kolé poli ta’ong susa latang te méu agu poli reding tomingN, kudut méu lut lé’é Diham.

22Hia toé manga dé’it pandé ndékokn, agu toé dé’it manga curup nggopétN.

23Du Hia tida wincar-winaky lata, Hia toé gorin te léko. Du ta’ong susaN, Hia toé manga ngetek atan, maik condo wekiN oné Mori Keraéng hitut agil beté-bicarN.

24Weki Run Mori Yésus poli pola panggol landing ndékok dité, kudut ité toé ngoéng te pandé ndékok kolé, maik mosé latang te pandé molor. Ali sanggéd réu Diha méu poli inas ga.

25Ai danong méu ného jimbal wéléngm, maik te ho’on poli émba kolé nggere-oné ata lami agu ata tinu wakars.


  Share Facebook  |  Share Twitter

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel