Dual PanelLeso De Mori
1Asé-ka’én ata momang laku! Ho’o surak te suan ata tulis laku latang te méu. Oné sua surak situ, aku sur méu te nuk kaut apa ata molord.
2Ali hitu, nuk kolés le méu keréba danong situt poli caing le sanggéd nabi nggeluk agu perénta de Morin agu Ata Sambé dité ata poli caingd le sanggéd rasul.
3Ata mésén paka pecing le méu, du leso cemol, tuas ata situt mosé lorong belek da’atd. Isé situ te loér méus.
4Taé disé, “Niay Hia hitut poli reké te mai? Ai pu’ung du matad empo dité, sanggéd cao-ca ného du wangka kid pu’ung dédékn lino ho’o.”
5Isé kunjung kéta toé gorid te imbi, te pu’ung du wangkan Mori Keraéng dédék awang agu tana ali rewengN. Dédék Liha tana lino oné-mai waé agu ali waé.
6Le waé hitu kolé, ngong waé mbang, ampus Liha danong tana lino.
7Ali rewengN hitu kolé, tinu agu na’a Liha awang agu tana te ho’on caing leso beté-bicar, du ampusd Liha sanggéd ata da’at oné api.
8Asé-ka’é ata momang laku! Ca ho’o néka kéta hemong le méu: Latang te Mori Keraéng, ca leso cama kaut ného ca sebu ntaung, agu ca sebu ntaung cama kaut ného ca leso.
9Toé galek rekéN Mori Keraéng, koném po galekn taé data. Ngéngga naiN latang te méu, ai ngoéng Diha néka manga cengatan ata ampus, maik sanggén ata holés kolés agu tesers.
10Leso de Morin rodo caiy ného ata takoy. Du hitu awang rencoy agu ngorong kéta runingn. Sanggéd ménan éta awang muntung taungs le api, lino agu sanggéd icin mora-meres taungs.
11Jari, émé sanggéd cao-ca ciri rewut nenggitu taungs, méu paka nggeluk agu junggu mosés,
12du géréng agu bengkes le méu cain leso de Mori Keraéng. Leso hitu awang agu sanggéd ménan ampus taungs le api.
13Maik lorong reké Diha, ité géréng awang agu tana weru, nia manga ata molor agu agil.
14Landing hitu asé-ka’é ata momang laku, cang agu géréng leso hitu, paka wuli wekis te hambor agu Hia, wiga méu toé manga celas agu toé manga ndékoks du cain Hia tai.
15Rékéng kaut le méu te ngéngga nai de Mori dité ného sokor latang te méu kudut tiba selamak. Ai hitu ata poli tulis latang te méu li Paulus asé-ka’é momang dité, lorong agu anor hitut tabing oné hia.
16Nenggitu dé taé diha oné sanggéd surakn. Bo tu’ung, oné sanggéd surakn situ mangas ata toé émong te idep. Hitu ata pandé holé-halés le ata siot toé pecing apa-apad agu ata toé mberes imbid, wiga ciri ampus weki rud. Isé kolé pandé hole-halés surak iwod oné Surak Nggeluk.
Cemoln
17Méu asé-ka’én ata momang laku! Poli pecing le méu toing so’o bebolon. Landing hitu jerék koém, kudut méu néka wéléng nggere-oné salang data siot toé pecing adaks, agu pa’u oné-mai osang bate hesé cedeks.
18Ciri tu’a koém ga oné tabing agu imbi hi Yésus Kristus, Mori agu Ata sambé dité. Latang te Hia dé mengit, te ho’on agu tédéng lén.