Dual PanelMori Yésus Céwé Mésé KuasaN Oné-mai Hi Musa
1Landing hitu asé-ka’én, ata poli pilé le Mori Keraéng, delem koé nuks latang te Mori Yésus. Hia wuat le Mori Keraéng te ciri Rasul agu Imam Mésé hitut imbi dité.
2Hia junggu kétay oné Mori Keraéng hitut poli pilé Hia, cama ného junggu di Musa danong du gori oné mbaru de Mori Keraéng.
3Maik Mori Yésus patun te tiba mengit ata céwé mésén oné-mai hi Musa. Cama ného ata pecing gambar mbaru, céwé hiang lata oné-mai mbaru hitut pandén.
4Bo kali néténg mbaru pandé le cengata ata pecing gambar, maik hanang weki run Mori Keraéng ata pecing gambar sanggéd ménan.
5Tu’ung hi Musa junggu oné sanggéd gori keturu latang te mbaru de Mori Keraéng, te téing saka-si latang te keréba du leso nggere-olon.
6Maik hi Kristus junggu kin, ai Hia Anak ata papongn mbaru de Mori Keraéng. Ngong ité ho’o dé mbaru de Mori Keraéng hitu, émé ité metek tu’ung oné imbi agu bengkes hitut angos lité dengkir cemoln.
Lerak Ali Ledong Imbi
7Landing hitu, ného hitut curup le Nai Nggeluk, “Leso ho’o, émé dengé le méu reweng Diha,
8néka ku’ak, ného empos danong lawang agu damang Mori Keraéng oné satar mambak.
9Taéd Mori Keraéng: Nitu empos damang agu ci Aku, koném po poli itan lisé sanggéd pandé di’a Daku patmpulu ntaung béhéngn.
10Itup tara rabod Laku sanggéd ata situ: Isé wéléng taungs naid agu toé pecing salang Dakus.
11Aku wada lari rabog: Isé toé ngancéng ngo oné osang asi Dakus.”
12Jerék koém asé-ka’én, kudut oné bahi-réha méu, néka manga cengatan koé ata nai da’at agu toé imbi, wiga ledong imbi Mori Keraéng hitut pu’un mosé.
13Maik toing cama taus kali lété leso, lari ngancéng kin te curup “leso ho'o” kudut néka manga oné bahi-réha méu ata ku’ak soho nggopét de ndékok.
14Ai ité haé reba ca gori oné hi Kristus, tama ité metek tu’ung imbi hitu ného du pu’ungn dengkir agu cemoln.
15Manga curup oné Surak Nggeluk: “Leso ho’o, émé dengé le méu reweng Diha, néka ku’ak ného empos danong lawang Mori Keraéng.”
16Céing isé situt kéngko rabo de Mori Keraéng, koném po dengé lisé reweng Diha? Toé weli sanggéd taung isét pé’ang oné-mai Mesird ali titong di Musa?
17Céing weli situt rabo Diha tédéng patmpulu ntaung? Toé weli isét pandé ndékok agu rapud situt héla-haé oné satar mambak?
18Céing weli situt poli wadad Liha te isé toé ngancéng ngo oné osang asi Dihas? Toé weli isé siot toé lorong agu ku’ak?
19Nenggitu de ita lité, te isé toé ngancéng ngo oné osang asi de Mori Keraéng, ai isé toé imbi.