Dual PanelMori Yésus Pandé Ina Mendi De Kepala Serdadu Kapérnaum (Mat 8:5-13; Yoh 4:46-53)
1Du Mori Yésus poli curup oné ranga de lawa don, itug kali ngo oné Kapérnaumn.
2Nitu manga cengata kepala serdadu, ata manga mendin hitut momang kéta liha. Mendi hitu rémé beti mésén, agu tiong te matay.
3Lété kepala serdadu hitu dengé cai de Mori Yésus, hia jera pisa taus tu’ad ata Yahudi ngo oné Mori Yésus te tegi, kudut Hia maiy, agu pandé ina mendin.
4Isé ngo oné Mori Yésus agu tegi kéta tu’ung lisé, campé Diha, mai taéd: “Laing patén kéta, hia te campé Litéy,
5ai hia momang wa’u ditéy, agu onéy dé hia té heséd mbaru ngaji dami.”
6Itu kali Mori Yésus ngo cama agu iséN. Du Hia toég tadang koén oné mai mbaru de kepala serdadu hitu, kepala de serdadu hitu wuats haé-reban te tombo agu Hias: “Mori, néka kamer bon weki, ai aku toé remog té tiba Ité oné mbaru daku;
7ali hitu, aku doing kolé le weki rug, toé remog mai cé’é Ité. Maik taé kaut reweng ca gewekn, wiga ina muing mendi daku hitu.
8Ai weki rug aku cengata ata be wa mai, agu be wa mai aku manga kolé serdadu. Émé taé kaut laku oné cengatan serdadu hitu: Ngoh! Ngo kaut hia; agu oné cengatan kolé: Mai!, mai kaut hia; ko agu mendig kolé: Pandé ho’o!, pandé kaut liha.”
9Du poli dengén le Mori Yésus curup situ, lenget laing Liha, agu cang holés oné lawa do situt lut Hia, mai taén: “Aku curup agu méu, imbi mésé nenggo’o toé dé’it manga itan Laku, koném po oné mai ata Israél!”
10Agu du kolé mbarud ata situt wuat, itag lisé mendi hitu polig géal-kolé wekin.
Mori Yésus Pandé Mosé Kolé Anak Reba; Oné Béndar Nain
11Poli kaut hitu, Mori Yésus ngo oné ca béndary, ngasangn Nain. Ata nungkun ngo cama agu Hias, nenggitu kolé ata do holid lut Hia.
12Lété Hia ruis lewang béndar, manga rapu ata rakang nggere pé’angy, anak léca ata rona, endén luang gi; agu dod ata oné mai béndar hitu lut inéwai luang hitus.
13Ita le Mori Yésus inéwai luang hitu, kembuk pucun le momang; itug kali tae de Mori Yésus agu hia: “Endé, emo rétang ga!”
14Poli hitu Mori Yésus ngo ruis berotong agu cabi Liha rapu hitu. Og asis isét rakangn. Mai taé de Mori Yésus: “Aku curup agu hau; nana, to’oh ga!”
15Og to’on kaut ata reba hitu, agu lonton, agu wangka kolég curupn, mai Mori Yésus téing kolé oné endén.
16Sanggéd ata situ rantang da’ats, agu isé bong Mori Keraéngs, cang agu taéd: “Cengata nabi mésé poli mangan oné bahi-réha ité. Mori Keraéng mai ba te selamak ro’éngn.”
17Og wéro-émbon keréba latang te Mori Yésus labok Yudéa, agu oné temun tana hitu.
Mori Yésus Agu Hi Yohanés Cebong (Mat 11:2-19)
18Lété hi Yohanés dengé réba latang te sanggéd apa situ oné mai sanggéd ata nungkun,
19béntas liha sua taus oné mai isé agu jera ngo oné Mori Yésus, te réi: “Itéy hitut kudut mai, ko ami paka géréng kolé ata bana?”
20Du isét sua situ cai oné Mori Yésus, curup lisé: “Hi Yohanés Cebong susung ami te réi Ité: Itéy hitut kudut mai, ko ami paka géréng ata bana?”
21Du hitu Mori Yésus pandé ina do ata hena le beti, le kélo agu le jing da’at; Hia kolé widang ita latang te sanggéd ata buta.
22Agu Mori Yésus walé isé: “Kolém ga, agu tura oné hi Yohanés, sanggéd situt ita agu dengé le méu: Ata buta ita atas, ata péko lakos, ata boké ciri helis kolé wekid, ata nenteng ciri nilors, ata mata mosé kolés, agu oné isét lénggé tombo keréba di’a.
23Agu mosé di’a ata hitut toé doét Akuy.”
24Du poli koléd ata situt wuat di Yohanés, wangkag Mori Yésus tombo oné ata do situ latang te hi Yohanés: “Kudut co’o ngo de méu oné satar mambak? Kudut ngo lélo helung ata wi’u-wa’uk le buru?
25Ko kudut co’o weli ngo de méu? Kudut lélo ata hitut paké ceca silep? Ata hitut paké ceca silep agu mosé di’a, ka’éngn oné mbaru de raja.
26Jari, kudut co’o weli ngos ga? Lélo nabi? Tu’ung kéta, agu Aku taé agu méu: Ngot céwé mésé oné mai nabiy.
27Ai latang te hia manga tulis: Lélo damang, Aku te wuat atag, bolo mai Ité; hia te wé’ang salangd wa ranga Dité.
28Aku taé agu méu: Oné mai isé situt loas le inéwai, toé manga cengatan ata céwé mésén oné mai hi Yohanés; landing ata merik-kejikn oné Adak de Mori Keraéng, céwé mésé oné mai hia.”
29Sanggéd taung ata do situt dengé curup Diha, liup nitu kolé agu isét tiba béa, tiba molor de Mori Keraéng, ai isé poli sendo wekid te cebong li Yohanés.
30Maik sanggéd ata Parisi agu ata pecing Taurat doét nanéng de Mori Keraéng latang te isé, ai isé toé gorid te cebong li Yohanés.
31Mai taé de Mori Yésus: “Agu apa kéta Laku tomingd, sanggéd ata uwa ho’o; agu le pai rapangn isé situ?
32Isé situ rapang anak koé siot lonto oné amba, situt kepok taud: Ami tebang sunding te méu, maik méu toé saém, ami déré ngiwi-ngaésm, maik méu toé rétangm.
33Ai main hi Yohanés Cebong, toé hang rotiy agu toé inung anggory, maig taé de méu: hia hena le jing da’aty.
34Poli hitu, main Anak Manusia, hang agu inungy, maig taé de méu: Lélo dé, Hia ca ata ngomper agu ata languy, haé reba disét tegi béa agu ata ndékok.
35Maik nggalas de Mori Keraéng laing molorn, latang te sanggéd ata situt tiban.”
Mori Yésus Luma Wa’in Le Inéwai Ndékok
36Cengata ata Parisi siro Mori Yésus te hang oné mbarun. Mori Yésus ngo oné mbaru dihat Parisi hituy, agu lonto kudut hangn.
37Oné béndar hitu, manga cengata inéwai mbérong. Du dengén le inéwai hiu, te Mori Yésus rémé hangn oné mbaru data Parisi hitu, itug kali main ba ca kuntul watu ata manga mina bengén.
38Cang agu rétangn hia ngo hesé bemusi mai Mori Yésus ruis wa’in, pandé baca wa’i de Mori Yésus le lu’u matan agu koso le wukn, omo wa’in, poli hitu luma le mina bengé.
39Du ata Parisi hitut siro Mori Yésus, ita pandé de inéwai hitu, mai taén oné nain: “Damang émét nabi de Hia ho’o, pecing kéta muing Liha, céing péng, agu inéwai ata apa péng hitut omar Hia; pecing kéta Liha, te inéwai hitu, cengata ata ndékoky.”
40Mai taé de Mori Yésus ngong hia: “Simon, Aku kudut manga curupg agu hau.” Mai walé di Simon: “Wan kali lité gé, Tuang Guru.”
41Mai taé de Mori Yésus: “Manga sua taus ata manga raungd agu cengata ata pandé beka séngn. Hia cengata, raungn lima ratus dinard, hiat cengata kolé limampulud.
42Soho isé toég ngancéng bajard, itug kali laud kaut raung disét sua situ liha. Céing weli oné mai isét sua ata céwé momang hian?”
43Mai walé di Simon: “Bo laku, hia hitut céwé do kosod raungn.” Mai taé de Mori Yésus ngong hia: “Laing tu’ungn taé de hau hitu.”
44Cang agu holésn nggere oné inéwai hitun, Hia curup agu hi Simon: “Ita le hau inéwai ho’oh? Aku mai oné mbaru de hauk, maik hau toé téing Aku waé te waca wa’ig; ngot hia waca wa’i Daku, ali lu’u agu koso le wukn.
45Hau toé tiba Aku ali omo, maik pu’ung caig Aku, hia toé asiy omo wa’i Dakun.
46Hau toé luma le mina ulu Daku, maik hia luma wa’i Daku le mina bengé.
47Landing hitu, Aku curup agu hau: Ndékokn situt do, polig ampongd ai leng mésén momang diha. Maik ata hitut cekoéy kali ampongn, cekoé kolé momangn.”
48Itu kali mai taé Diha ngong inéwai hitu: “Ndékokm polig ampongn.”
49Agu isé ata lonto cama hang agu Hia, nuk wa naid: “Céing kéta péng Hia ho’o, wiga ngancéng ampong ndékok?”
50Maik Mori Yésus curup agu inéwai hitu: “Imbim hitu poli selamak laing haun, kolé di’a-di’ah ga!”