Dual PanelTakung Ata Patun
1Landing hitu asé-ka’én, le gawas de Mori Keraéng, aku toing méu, kudut méu takung wekis ného takung mosé, nggeluk agu patun oné nai de Mori Keraéng: Hituy ngaji de méu ata naun.
2Méu néka lorong wintuk de lino ho’om, maik caling koé ali pandé weru wintuks, wiga méu ngancéng baé ngoéng de Mori Keraéng: Apa ata di’an, ata henan agu ata besikn oné Hia.
3Landing ali tabing ata téi oné aku, aku taé néténg méu: Néka mésé nai po apa ata cetu’ungn, maik damang maring wekis, lorong mésén imbi de méu hitut widang de Mori Keraéng.
4Cama ného weki manga do taran, maik toé sanggéd tara situ camas disd.
5Nenggitu kolé ité koném po ata dot, ciri ca wekit kali ai mosé cama agu hi Kristus, maik sanggéd ité woé-joé ného tara de ca weki.
6Nenggitut dé ité manga woléngd widang, lorong agu tabing hitut téi oné ité: Émé tabing hitu latang te pedé, pandé ga pedé hitu lorong agu imbi dité.
7Émé tabing latang te keturu, pandé ga keturu hitu; émé tabing latang te toing, toing ga;
8émé tabing latang té titong, titong ga. Céing ata pati cao-ca, pati agu ngalis nai; céing ata ciri adak laing, seber koé liha gorin; céing ata toto momangn, momang ga ali nisang nai.
Toing Kudut Momang Tau
9Momang hitu paka wa-mai nain! Tadang koés da’at agu pandé ata di’ad.
10Poro méu kali momang agu hiang taus cama ného asé-ka’é.
11Néka ngondé holés, kong raka nais te keturu Mori Keraéng.
12Nakam ga landing le bengkes, lembak koém du kélo agu seber koém oné ngaji!
13Campé koé asé-ka’é serani ata géong, agu tiba asé-ka’é ata toko-rontong!
14Tegi le méu berkak latang te céi kaut ata wahéng méu, agu néka tegi te mawangs!
15Nakam ga agu ata naka, rétangm ga agu isét rétang!
16Nahé méu kali nai ca anggit, tuka ca léléng, néka manga mésé-nai, maik réncéng koém kali agu ase-ka’e ata lénggé. Néka mésé nai po apa ata cetu’ungn!
17Néka léko da’at ali pandé da’at, pandé kaut ata di’an latang te sanggén ata!
18Sanggés méu poro mosé hambor agu sanggén ata!
19Asé-ka’én ata momang laku, méu néka soléng kéta te tegi léko, kong Mori Keraéng ata lékon. Ai manga ata poli tulis: “Léko hitu hak Daku. Aku kali ata soléng léko,” curup de Mori Keraéng.
20Maik, “Émé daremy ata balim, téi hia hang; émé masa waéy, téi hia inung! Ali pandé nenggitu, méu pandé ritak hiam, cama ného ongko wara api éta sa’in.”
21Méu néka koda le da’at, maik pandé koda da’at hitu le pandé di’a!