Dual PanelMori Keraéng Tiba Hi Abraham Landing Le Imbin
1Jari, co’o weli nuk dité, latang te hi Abraham empo dité?
2Ai émé hi Abraham tiba le Morin ali pandén, itu tara manga rajan hia te angos. Maik hia toé angos oné ranga de Mori Keraéng.
3Ai apa ata poli tulis oné Surak Nggeluk? “Itu kali imbin hi Abraham, wiga bilangn le Mori Keraéng cama ného ata tiba Liha.”
4Latang té ata gori, tiba lahén toé bilang ného koso nolak, maik hitu muing maki dihan.
5Landing latang te ata toé gori, maik imbi oné Hia hitut tiba ata ndékok, imbi diha hitu pandé tiba hia laing.
6Cama ného hi Daud caro mosé di’a atat tiba le Mori Keraéng, toé landing le pandén:
7“Mosé di’a ata siot ampongs sanggéd lagéd, agu situt tadu ndékokd,
8mosé di’a ata siot toé bilangs ndékokd le Mori Keraéng.”
9Co’oy caro mosé di’a ho’o, hanang latang te ata poli sunat kanang, ko ngancéng kolé latang te ata toéd sunat? Ai poli lami taén, té oné hi Abraham, le imbin hitu wiga tiba hia le Mori Keraéng.
10Du nia di bilangn taé hitu? Be bolon sunat ko du poli sunatn? Toé du poli sunatn, maik bebolon.
11Tanda sunat hitut tiba liha cama ného cap tanda tiba, le imbi hitut toton du hia toé di sunat. Nenggitu dé hia ngancéng ciri ema de sanggéd ata toé di sunat ata imbi, kudut tiba isé le Mori Keraéng.
12Abraham kolé te ciri ema de sanggéd ata sunat, ngong isét toé hanang sunat, maik ata lut kolé lé’é imbi di Abraham, empo dité, du hia toé di sunat.
13Ai reké agu hi Abraham agu waé diha, hia té paéng lino ho’o, toé ali wintuk Taurat, maik ali imbin tara tiban le Mori Keraéng.
14Ai émé isé ata bengkes oné mai wintuk Taurat, tiba maki oné mai reké de Mori Keraéng, wiga oké bon imbi agu koar reké hitu.
15Ai wintuk Taurat, pandé rabon Mori Keraéng, maik nia ata toé manga wintuk Taurat, nitu kolé toé manga lagé.
16Landing hitu, reké hitu pu’ung le imbi, kudut lorong agu tabing, wiga reké hitu hena taung latang te waé di Abraham, toé hanang latang te isét mosé lorong wintuk Taurat, maik ngancéng kolé latang té isét mosé oné mai imbi di Abraham. Ai hi Abraham ciri ema de sanggéd taung ité –
17cama ného manga ata poli tulis: “Hau poli petokn Laku ciri ema de uku do” – oné ranga de Mori Keraéng, hitut imbi li Abraham. Mori Keraéng hitut pandé mosé kolé ata mata agu le curup’N kaut apa ata toé manga, cirik manga.
18Ai koném po toé manga pu’un te bengkes, maik hi Abraham bengkes kin agu imbi, te hia ciri ema de uku do, lorong ata poli taé, “logur-kouks tai waé de hau.”
19Imbi diha toé manga gégon, koném po pecing le run tua gi wekin, ai umur diha aik ceratus ntaung gi, agu hi Sara toé ngancéng wingy.
20Maik latang té reké de Mori Keraéng, hia toé manga gégo-nain ali toé imbi, ngot hia pandé mberes oné imbin agu hia naring Mori Keraéngy.
21Imbi tu’ung liha, te Mori Keraéng hitu manga kuasan latang te pandé apa kaut ata poli reké Diha.
22Itu néng tara tiban hia le Mori Keraéng.
23Curup ho’o nggo’oy, “tiba hia le Mori Keraéng,” toé tulis latang te hi Abraham kanang,
24maik tulis kolé latang te ité, te ité tiba kolé le Mori Keraéng, ai ité imbi oné Hia hitut poli pandé to’o kolé Mori Yésus oné mai ata mata.
25Mori Yésus hitut poli matan ali ndékok dité agu pandé to’o koléy latang te selamak ité.