Dual PanelTiba Le Mori Keraéng
1Landing hitu ité ho’ot tiba le Mori Keraéng ali imbi, mosé oné hambor-meler agu Hia, lut Mori dité, Yésus Kristus.
2Lut Hia ité kolé dumpu salang lako te ngo nggere-oné tabing ho’o ali imbi. Oné tabing ho’o, ité hesé agu go’as oné bengkes te tiba mengit de Mori Keraéng.
3Toé hanang hitu kanang. Ité kolé ngot go’as oné singsara dité, ai pecing lité te singsara hitu pandé alus nai,
4agu alus nai pandé ta’ong, agu ta’ong pandé tuan bengkes.
5Agu bengkes toé manga majan, ai momang de Mori Keraéng poli téi oné nai dité le Nai Nggeluk hitut poli patin oné ité.
6Ai du lari lesd ité, hi Kristus poli matan latang te ité ata ndékok du poli wérét le Mori Keraéng.
7Ai toé émongn cengata ngoéng te mata latang te ata molor – maik ngancéng manga ata ngoéng te matay latang te ata di’a.
8Maik nenggo’oy dé Mori Keraéng toto momang’N oné ité: Du ité lari ndékokd, hi Kristus poli matan latang te ité.
9Céwén kolé, ai ité ho’o ga poli tiba le Mori Keraéng le dara di Kristus, ité toét-toé selamak lut Hia oné mai rabo de Mori Keraéng.
10Ai émé ité du lari toé di’a taud agu Mori Keraéng, pandé hambor agu Hia lut rowa de Anak Diha, céwén kéta te ho’on du ité poli hambor agu Mori Keraéng, toét-toé selamakt ali mosé Diha!
11Toé hanang hitu kanang! Ité ngot angos oné Mori Keraéng lut hi Yésus Kristus Mori dité, ai lut Hia ité te ho’on poli tiba hambor hitu.
Hi Adam Agu Hi Kristus
12Ali hitu cama ného ndékok poli mai oné linon lut cengata ata, agu lut ndékok hitu cain mata. Mata hitu poli hena oné sanggén ata, ai sanggén ata poli pandé ndékokd.
13Ai du toé di manga wintuk Taurat, ndékok hitu poli mangan oné lino. Maik ndékok hitu toé manga bilangn ali toé manga wintuk Taurat.
14Am po nggitu, mata poli kuasan oné mai uwa di Adam dengkir cai oné uwa di Musa. Ngot mata hitu hena kolé oné isét toé manga pandé ndékokd, cama ného ndékok hitut poli pandé di Adam. Hi Adam hitu ného gambar Diha hitut kudut mai.
15Maik widang de Mori Keraéng toé camas agu ndékok di Adam. Ai émé ali ndékok dihat cengata, do ata poli pa’u oné kuasa de mata, céwé mésé kolé tabing de Mori Keraéng agu widang Diha ata téi Liha latang té ata do ali cengata ata, ngong hi Yésus Kristus.
16Agu widang hitu toé rinca agu ndékok de cengata ata. Ai beté-bicar latang té ca ata ndékok hitu, poli cai wan le wahéng, maik téi widang landing do ndékok hitu cai wan le selamak.
17Ai émé landing ndékok de cengata, mata hitu manga kuasan lut hiat cengata. Céwén kéta isét ata poli tiba dod tabing agu tiba le Mori Keraéng te mosé agu kuasa ali hiat cengata hitu, ngong hi Yésus Kristus.
18Jari, cama ného lut ca ndékok, do ata hena le wahéng, nenggitu kolé lut ca pandé molor, do ata haéng selamak.
19Ai cama ného lut hiat cengata ata tingul, do ata ciri ndékoks, nenggitu kolé lut hiat cengata ata junggu, do ata ciri selamaks.
20Oné wintuk Taurat, cai-wan ndékok cirik céwé do. Maik nia ndékok tambang dod, nitu tabing cirik monggu-roud.
21Cama ného ndékok manga kuasan oné pété mata, nenggitu kolé tabing te manga kuasan lut pandé molor li Yésus Kristus Mori dité, latang te mosé tédéng lén.