Alkitab Mobile SABDA
[VER] : [MANGGARAI]     [PL]  [PB] 
 <<  Titus 1 >> 

Tabé

1Oné-mai aku hi Paulus, mendi de Mori Keraéng agu rasul di Yésus Kristus latang te tinu imbi de weki serani agu pecing do latang te molor, ného hitut ita oné ngaji dité,

2agu ligeng de bengkes kudut mosé tédéng lén hitut danong empo-walok poli reké le Mori Keraéng ata toé manga nggopétN.

3Du rapak leson, Mori Keraéng si’ang rekéN oné pedéN hitu. Pedé hitu polig imbin oné aku te wéway le perénta de Mori Keraéng, Ata Sambé dité.

4Titus, hau tu’ung-tu’ung anak daku, ai hau agu aku cama-cama imbi oné Mori Yésus. Bengkes daku, nahé Mori Keraéng Ema agu hi Kristus Yésus Raja Ata Sambé dité téing berkak agu hambor-libur oné hau.

Gori Keturu Di Titus Oné Kréta Wintuk Latangt Ata Tu’a Agu Ata Titong Weki Serani

5Aku poli ledong hau oné Kréta, betuan kudut hau papong apa ata paka wintuk le hau, agu kudut téti ata tu’a laing de weki serani oné néténg béndar.

6Ata tu’a situt téti de hau te ciri tu’a laing de weki serani, paka: Ata toé manga celad, cay kali winan, sanggéd anak lut imbi diha, agu toé nonoky néhot mosé toé patun agu toé kitep.

7Ai ata wintuk mbaru de Mori Keraéng, atat toé manga celan, toé mésé nai, toé heres, toé langu tuak, toé rabo agu toé gomeng,

8maik ngoéng tiba meka toko rontong, ngoéng te pandé ata di’an kanang, nggalas, agil, nggélok nai, ngancéng kuasa weki ru.

9Be lé-mai hitun kolé, hia paka cau curup molor lorong toing situt di’ad, wiga hia ngancéng titong atay agu sengang le sanggéd isét lawang hia.

10Ai dod atat toé kitep moséd, céwén kéta isé situt baod lut agama Yahudis. Ngoéng disé, ata toé Yahudi paka olong sunat po ciri weki serani. Ali curup nggopétd, isé pandé wéléng nuk data.

11Sanggéd ata nenggitu paka jera hema kauts, ai isé pandé biké ka’éng kilo data le toing ata toé manga betuad, kudut pala tiba ontong ata toé patun.

12Cengata oné-mai isé ata rékéng ného cengata nabi, manga dé’id taén, “Tama laing méut Kréta ata nggopét, kaka rani, agu bot mboros maik ngondé da’at.”

13Saka-si hitu molorn, landing hitu titong kéta tu’ungs isé kudut isé metek kid oné imbid.

14Ali hitu, isé toé pinga kolés tombo turuk data Yahudi agu wintuk ata pandé de manusia siot tadangd oné-mai molor.

15Latangt ata nggélok nai, sanggén taung situ nggelukd, maik latang te ata rinek agu ata toé imbi, toé manga can koé ata nggelukd, ai nai-nawa ko ici nai disé rinek taungs.

16Bo tombod pecing Mori Keraéngs, maik oné-mai pandéd, pali Mori Keraéngs. Isé gutekd, toé lorong agu toé kopd te pandé cao-ca ata di’an.


  Share Facebook  |  Share Twitter

 <<  Titus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel