Alkitab Mobile SABDA
[VER] : [MENTAWAI]     [PL]  [PB] 
 <<  Ibrani 4 >> 

1Oto palelengan Taikamanua ai peilé maririu-riu, samba iaaké ka tubutta puaroiatta siripot sipinatonénia. Kalulut néné, kau mariu-riu tajago kam nia, bulé buí ibara sara ka talagatta sitaipuuktungi puaroiat sitonéakenennia.

2Aipoí ka tubutta ka sita atupaarep'an Katuareman Simaerú kelé ka tubudda ka sia. Tápoi ka sia, tá anai lulunia. Aipoi kelé raarep nia, tá matonem bagadda.

3Tápoi ka sita geti simatonem baga, tasisiló kam puaroiat sitonéakenen Taikamanua néné. Aipoí bulat maipó kelé ka sikuat Taikamanua kisé, "Iageti pugolúkungan samba pusuppakkungan leú et, pelé nga-ngangku, 'Tá te raguguruki laggai nenda bulé raaroiaké tubudda sedda sambamai.'" Oto aikua kelé néné Taikamanua, kenanen alepáan aigalai galajetnia ka tetret aibaraaké polak peilé.

4Aipoí pagalaiat gogoi sikapitunia, ai atusurat'aké ka bagat Buko Sipunenan kisé, "Ka gogoi sikapitunia, puarinangan Taikamanua ka sangamberi galajetnia."

5Pagalaiat nenda leú et, ai atusurat'aké mitsá kisé, "Tá te raguguruki laggai nenda, bulé raaroiaké tubudda sedda sambamai."

6Oto sia sipuboboikí masiarep pagalaiat Katuareman Simaerú néné, tá rasisiló puaroiat, kalulut taimatonem bagadda. Bailiu, ké kisé baí nia, kolou, ai sia sabagei momoi rasiló puaroiat néné.

7Aipoí aitetreakéan Taikamanua sara gogoi bagei, iaté oniakenen, "Gogoi Néné". Oto piga ngarura pá burúnia panibonangan mitsá Taikamanua iaté ka sisegéakenen Dapid, ka sikuania kelé ka ruang sikuatta simaruei néné, sipasikukua, "Ké nuarep kam nga-ngan Taikamanua kineneiget, buí nukeláaké kam paatuatmui."

8Ké baí aikauan ka tubudda si Josua kudduat puaroiatda siripot sitonéakenen Taikamanua, táan ikukua mitsá Taikamanua pagalaiat kababarania sara gogoi bagei.

9Oto, ka sia sikauman Taikamanua, ai peilé palelengan bulé rapuaroi tubu, kelé aiaroiaké tubunia ka sia Taikamanua, ka gogoi sikapitunia.

10Aipoí sia sipasisisiló puaroiat tubu, sitonéakenen Taikamanua, raaaroiaké leú te tubudda ka sia, ka sangamberi galajetda, kelé ka Taikamanua leú et.

11Kalulut néné, bulat kau tabesíaké kam nia, tasiló kam puaroiat tubu sitonéakenen Taikamanua néné. Bulat buí ibara beri sara ka talagatta sitaitueeddet masisiló, kelé ka sia siburú, kalulut taimatonem bagadda ka tubut Taikamanua.

12Aipoí tiboiet Taikamanua néné iaté, tiboiet sipuririmanua sambat simaron; bulat malauru, belé peilé lanjau simalauru rua ngasilánia. Bulat makeru siorangannia, pat aili ka pasongan enga sambat ketsat; sambat pasongan pauilakat tolat ka unou tolat, bailiu pat oi isinogi paatuat sambat isiat bagadda sirimanua.

13Bulat beri sara sipungongoí-ngoí simalipput ka matat Taikamanua. Matoilá lé sangamberinia ka matania. Oto buítá takau pertanggung jawabanta ka tubunia.

14Oto iaté lulunia, buítá taomet'aké kam simaron putoneman bagatta simuneng'akenenta. Aian poí ka sita Imam Sabeu Sipulubeunan, situgugurú pat aili ka matat Taikamanua. Nia té nenda Jesus Togat Taikamanua.

15Ka sia Imam Sabeuta néné, tá imam sitaiagai gulaita. Tápoi atusibongan nia ka sangamberinia, kelé leú et sita ka sita; sarat ka sia néné, tá aigalai jo!

16Oto kauan imaeme bagatta mei ka matat Taikamanua, utéta simaerú baga. Ipukakateki sita baga samba ipanunukani sita Taikamanua, bulé tasiló kam paroman, bulat ka ipot tetrenia.


  Share Facebook  |  Share Twitter

 <<  Ibrani 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel