Dual Panel1Surat kef jeska didif Paulus. Didif bera erek rasul egens ongga Yesus Kristus oncunc fob. Ofa oncunc didif erek koma jeni Allah odou os rot. Noba mifmin muhuj Sostenes tein eneker morototuma jera didif jah sif.
2Iwa bera irek rusnok ongga Allah efen noba ongga imohoturuma gij kota Korintus. Noba didif dagot gu iwa oida Allah eita yeyin idou ongga egens morototuma jera Yesus Kristus fob, fogora iwa irek Ofa efen rusnok ongga idou ebsi komowa fob. Ofa eita mar koma gu rusnok gij monuh enjgineg tein ongga rumohoturuma jeskaseda rugif gu mifmin Tuhan Yesus Kristus ongga rua tein ruis erek rerin Tuhan.
3Magef mam maiteij jeskaseda mifmin mika Allah jera mifmin Tuhan Yesus Kristus geita oufamofa eteb gu iwa ojgomuja. Noba magef tein mam maiteij jeskaseda Allah eita eiteij ah ongga eskeiramera gu iwa ongga ingker gij kota Korintus.
4Didif duis oufamofa eteb gu Allah rot iwa ojgomuja. Jeska oisouska efen oufamofa ongga Ofa eita gu iwa fob, bera iwa inroru Yesus Kristus fob.
5Noba, Jeska iwa iroru Ofa fob, jefeda Ofa omfij iwa gij mar ofoukou fob. Koma bera, Ofa omfij iwa jeskaseda ita idou efesis fogora ijginaga rot teinefa ifesij mar osok gij Ofa gu rusnok enjgineg. Noba Ofa tein omfij iwa jeskaseda idou ebriyi gij rot efen oga.
6Jeska Allah bera ongga oncunc rot mar nomnaga ongga memef moftuftu gu iwa rot sis bera fob osok Ofa oida mar koma bera erek tenten ojgomu. Jefeda iwa inroru Kristus fob.
7Noba askesi iwa yug moroju rot mona ongga Tuhan Yesus Kristus ongksons en, beda yeyin owesa efek nomnaga ongga Efena Ebsi Allah eita gu rusnok nomnaga fob ongga ruroru Yesus ojgomu.
8Noba Allah emeita idou ahais ojgomuja onjoros mona ongga mifmin Tuhan Yesus Kristus ongksons en fob. Beda gij mona insa koma bera Allah enek yeyin mar ongga oska egema tein jinaga guru.
9Mimif mijginaga rot mar insa koma jeska Allah omotunggom mar nomnaga ongga Ofa anggot rot si. Noba Ofa bera ongga oncunc iwa jeskaseda ijerek egens jera Yesus Kristus ongga erek mimif Tuhan efen efesa.
10Edohuji, didif duis gu iwa oisouska mifmin Tuhan Yesus Kristus efen owesa efek jeskaseda iwa inoga omosokuma noba inemekebema rot ebic egens efen ebirfaga ongga ofoka aksa ekirsa jeska ebic egema efen guru. Tina ongga oufa bera iwa ita idou egens rot mar ongga iwa insujohu osok gij Yesus efen oga ojgomu. Noba iwa tein yuitij moguma fogora ita mar rot idou egens. Jeska koma bera ongga eita Allah odou eskeiramera rot ojgomu.
11Didif dinagot mar insa kef gu iwa jeska rusnok rineya ongga mod etma Kloe ranggot gu didif oida ineya jeska iwa ifekesa bera yuga omosokuma ojgomuja.
12Koma bera, ineya jeska iwa ifekesa yagot oida, "Memef mororu Paulus ojgomu." Noba ineya yagot oida, "Memef mororu Apolos ojgomu." Noba ineya yagot oida, "Memef mororu Kefas." Noba ineya yagot oida, "Memef bera ongga mororu Kristus rot tenten ojgomu noba iwa bera guru."
13Wah! Enadaij nou iwa ikeba Kristus dogdog rot ebic egens egens erek koma jinaga guru! Noba didif Paulus tein dinagos tumu mega salib nou iwa guru. Noba iwa ineita baptis jeskaseda ijerek ebic egens ongga iroru didif ojgomu guru.
14Didif disinsa dita baptis gu Krispus gonu Gayus ojgomu, noba dineita baptis gu rusnok rineya jeska iwa guru.
15Jefeda enadaij nou rineya ragot oida didif dita baptis gu rusnok jeskaseda rua ruroru didif ojgomu guru.
16(Yo tenten, didif dita baptis gu Stefanus jera efen rusnok ongga ringker jera ofa tein. Tina didif dudou enah keingg rot rineya ongga didif dita baptis gu rua guru.)
17Didif dita baptis gu rusnok oskiyai ojgomu, jeska Kristus onobk didif jeskaseda dita baptis gu rusnok nomnaga guru. Tina ongga tenten bera, Ofa obk didif jeskaseda dagot rot Allah efen oga ongga oufamofa ojgomu. Noba didif dinera duga ongga rusnok enjgineg rusujohu oida dudou erek efesis eteb rot guru. Tina didif dira duga ongga erek giskini ojgomu. Didif dita erek koma jeskaseda mar ongga didif dimfesij rot Allah oga osok gij Yesus, ongga anggos tumu mega salib, bera ongga oroku rua rudou skoita Yesus fogora ruroru Ofa tein.
18Erek koma jeska gij mona ongga rusnok, ongga rimeja jah mahmei, bera rig rot oida Yesus agos tumu mega salib jeskaseda osuwa mimif jeska mifmin mar ongga oska fob, beda rua rusujohu oida mucuwei mar rot ojgomu. Tina gij mona ongga mimif mig rot oga ongga oufamofa insa koma, beda koma orocunc rot owesa efek eteb ongga Allah eita gu mimif fob.
19Koma jeni erek mar ongga Allah anggot gij Mar Efeyi Ebsi sis fob oida, "Didif dumohoda rot mar ongga rusnok rusujohu gij rudou efesi ongga erek efesis eteb fogora orowora ojgomu. Noba Didif dumohoda rot mar ongga rusnok rusujohu bera rudou ebriyi eteb gij fogora emeseiseifa rot rua ojgomu si."
20Jeska mar ongga rusnok mebif runsujohu rot oisouska rerin rudou ongga efesis eteb bera onofoufem skoita Allah guru. Noba rusnok ongga runsujohu oida rerin rudou erek efesis eteb gij hukum agama Yahudi, beda Allah osujohu rot oida rua tein bera erek mar ongga onofoufem skoita Ofa guru. Noba rusnok ongga runsujohu oida ruga emesedema rot rudou ongga ebriyi eteb gij, beda Allah osujohu oida rua tein bera erek mar ongga onofoufem skoita Ofa guru.
21Jeska rusnok mebif rusujohu rot oida rua rita rudou egens jera Allah oisouska risinsa rerin rudou efesi ojgomu. Tina Allah efen odou ongga efesis eteb ekirsa fogora onorons erek koma guru. Noba rusnok mebif rusujohu rot oida oga ongga oufamofa osok gij Yesus Kristus bera erek ocuwei mar ojgomu. Tina oga ongga oufamofa koma bera ongga Allah ocunc oisouska efen odou ongga ongkoska jeskaseda osuwa rusnok jeska rerin mar ongga oska nomnaga.
22Rua ongga Yahudi rusujohu rot oida oga ongga oufamofa insa koma bera erek ocuwei mar ojgomu. Jeska rua ruis oida rusnok rutunggom mar onswos sismeni fog jeskaseda rik gu riteij fogora rumororu. Noba rua ongga Yahudi guru rusujohu rot oida oga ongga oufamofa insa koma bera erek ocuwei mar ojgomu. Jeska erek rusnok enjgineg rimera rudou ongga efesis eteb rot fogora rucunc rot mar koma efen ofou jeni ojgomu, beda rua rumororu.
23Erek koma, tina memef mefesij rot oida, Yesus Kristus anggos tumu mega salib jeskaseda osuwa mimif jeska mifmin mar ongga oska. Tina oga ongga oufamofa insa kef bera erek mamu ongga rua ongga Yahudi rukockoreta rot. Rua rukockoreta rot jeska rudou onororu oga ongga oufamofa insa koma guru. Noba rua ongga Yahudi guru rusujohu rot oida oga insa koma bera erek ocuwei mar ojgomu.
24Tina Allah oncunc rusnok rufoukou erek efen rusnok fob. Rineya erek rua ongga erek Yahudi jera rineya ongga erek Yahudi guru tein. Noba gij mona ongga rua insa koma rig rot oga insa koma osok gij Yesus Kristus, beda rudou ebriyi gij rot oida Allah oncunc efen owesa efek eteb gu rua fob. Noba rua tein rudou ebriyi gij rot oida Allah efen odou ongga efesis eteb ekirsa jeska mar nomnaga.
25Jeska gij mona juens bera rusnok mebif rusujohu rot oida mar ongga Allah ontunggom bera erek ocuwei mar ojgomu. Tina ongga tenten bera, mar ongga Ofa ontunggom insa koma orocunc rot oida Ofa efen odou ongga efesis eteb ekirsa jeska rusnok nomnaga. Noba gij mona juens bera rusnok mebif rusujohu rot oida Allah onowesa efek eteb guru. Tina ongga tenten bera Allah efen owesa efek ongga eteb ekirsa jeska rusnok nomnaga.
26Edohuji, iwa idou ah keingg rot mar ongga rusnok enjgineg runsujohu rot iwa gij mona ongga Allah enjeka gu iwa erek efen rusnok sismeni fob. Gij mona insa koma bera rua rusujohu rot oida rineya jeska iwa bera rudou osumsumu ojgomu. Noba rua rusujohu oida rineya jeska iwa bera runowesa efek tein guru. Noba rua rusujohu oida rineya jeska iwa bera runofoka aksa tein guru.
27Tina Allah bera oncunc iwa insa koma nomnaga erek efen rusnok fob. Ofa otunggom mar erek koma jeskaseda rusnok ongga runororu Ofa guru, jera rusnok ongga rusujohu rot oida rudou ebriyi eteb gij mar fob bera mojen rua rot ojgomu. Noba Allah bera ongga oncunc rua insa koma ongga rusnok enjgineg rusujohu rot oida runowesa efek guru. Ofa oncunc rua insa koma jeskaseda rusnok ongga runororu Ofa guru, noba ongga rufra risinsa rufoka erek aksa bera mojen rua rot ojgomu.
28Allah oncunc rua insa koma ongga rusnok enjgineg rusujohu rot oida runofoka aksa guru ni, jera rua ongga rusnok enjgineg ruga oruh rua ni, jera rua ongga runowesa efek guru ni. Ofa oncunc rua insa koma nomnaga jeskaseda rija erek Ofa efen rusnok ojgomu. Noba Ofa otunggom mar insa koma jeskaseda mar nomnaga ongga rusnok mebif risinsa runsujohu rot ongga erek ofoufem bera orowora rot ojgomu.
29Ofa ontunggom mar insa koma nomnaga jeskaseda enadaij nou rusnok egema tein risitit risinsa rufoka rot oida Allah oncunc rua tein erek efen rusnok guru.
30Tina Allah bera ongga eita idou ongga egens jera Yesus Kristus fob. Noba iwa isma idou erek koma oisouska mar ongga Yesus Kristus ontunggom fob. Beda oisouska mar koma bera mifmin mudou ebriyi gij rot teinefa Allah efen odou ongga efesis eteb. Noba mifmin mudou ebriyi gij mar insa koma jeska Yesus bera ongga Allah onobk jeskaseda ofij mimif fogora oskotu mimif jeska mifmin mar ongga oska fob. Erek koma jefeda mimif misma mudou ongga efen mar ongga oska oskiyai tein guru fob, tina ongga ebsi komowa ojgomu.
31Runggu gij Mar Efeyi Ebsi rot oida, "Rua ongga rudou os rifaga ouka, beda rinefaga ouka rot risinsa guru, tina rua rifaga ouka rot Allah efen ofoka ojgomu."