Dual Panel1Edohuji, ainsa kef didif dudou os dagot mar osok gij owesa efek ongga rusnok risma jeska Efena Ebsi Allah. Didif dimagot rot mar insa koma gu iwa jeskaseda idou onosumsumu rot mar koma guru.
2Iwa idou ah keingg rot oida gij mona ongga iwa inororu Allah enesi, bera rusnok rita mar ongga oroku idou skoita mar ongga oska ojgomuja. Koma bera erek iwa yugif gu mar ongga oska noba ongga erek osumsumu ojgomu.
3Erek koma jefeda iwa ijginaga rot tenten oida rusnok ongga ragot mar oisouska Efena Ebsi Allah bera rinagot oida, "Yesus bera oska efekeifa," erek koma jinaga guru. Noba rusnok ongga rinagot mar oisouska Efena Ebsi Allah guru, rua bera rinagot oida, "Yesus bera Tuhan," erek koma jinaga guru.
4Mar ongga rusnok rutunggom rot owesa efek ongga rua rinsma jeska Efena Ebsi Allah bera erek toga toga. Tina Efena Ebsi ongga eita owesa efek gu rusnok nomnaga koma bera egens ojgomu.
5Noba mar ongga rusnok rutunggom jeskaseda rurofij Tuhan bera erek toga toga. Tina Tuhan ongga rua rumfij bera erek egens ojgomu.
6Noba mar ongga osnok egens otunggom oisouska owesa efek jeska Efena Ebsi Allah jeskaseda ofij rusnok enjgineg bera erek toga toga. Tina Allah esinsiyai bera ongga onoftuftu rua gij rudou efesi rot mar ongga rua rutunggom koma nomnaga.
7Gij mona ongga Efena Ebsi ocunc rot efen owesa efek gu osnok egens gij odou efesi, beda mar ongga osnok egens koma ontunggom rot owesa efek insa koma bera jeskaseda orofij rusnok nomnaga.
8Koma erek rineya risma owesa efek jeska Efena Ebsi jeskaseda rudou ebriyi eteb gij mar ongga rua rusujohu rot jera mar ongga rua ragot rot osok gij Allah oga. Fogora rudou efesis tein gij mar ongga rua ruftuftu rot gu rusnok enjgineg.
9Noba rineya risma owesa efek jeskaseda rudou ororu rot ahais ojgomu oida Allah omotunggom mar ongga rua rimerejgei Ofa rot si. Noba rineya risma owesa efek jeskaseda rita eskeira gu rusnok ongga marenir.
10Noba rineya risma owesa efek jeskaseda rutunggom mar ongga onswos eteb ongga ereita rusnok enjgineg rudou oubsaha rot. Noba rineya risma owesa efek jeskaseda rudou ebriyi gij mar ongga Allah oncunc gu rua gij rudou efesi fogora rifesij rot mar koma gu rusnok enjgineg tein. Noba rineya risma owesa efek jeskaseda rudou ebriyi gij rot oida mar ongga rusnok enjgineg ragot rot bera en jeska Allah era en jeska efena ofogog ojgomu. Noba rineya risma owesa efek jeskaseda rifesij mar gij oga egens ongga rua risinsa rinejginaga rot tein enesi. Erek koma tein, gij mona ongga osnok egens emfesij mar gij oga insa koma, beda Efena Ebsi eita owesa gu osnok egens egema deika jeskaseda ofa esinsiyai odou ebriyi gij oga insa koma efen ofou. Fogora Ofa agot rot mar insa koma gu rusnok enjgineg.
11Efena Ebsi Allah bera ongga eita owesa efek gu rusnok egens egens jeskaseda rua rutunggom mar koma nomnaga ojgomu. Noba Efena Ebsi Allah bera ongga eita owesa efek insa koma gu rusnok egens egens nomnaga jeni erek mar ongga Ofa esinsiyai ondou os rot ojgomu.
12Rusnok ongga ruroru Yesus bera erek osnok efaga egens. Efaga egens koma efen efetma ofoukou, tina efetma ongga ofoukou nomnaga ebiedi efaga egens koma ojgomu. Erek koma rot rusnok ongga ruroru Yesus Kristus tein. Yesus bera erek osnok egens, tina mimif ongga mirek rusnok ongga rufoukou bera mibiedi erek ebic egens jera Ofa.
13Mimif nomnaga mifmin mufou ebiedi toga toga. Koma bera, rineya ongga Yahudi ni, rineya ongga Yahudi guru ni, rineya ongga erek rusnok ongga rumfij rerin ebirfager ojgomuja ni, rineya ongga runt gu risinsa ni. Tina gij mona ongga mimif nomnaga mita baptis, beda Efena Ebsi Allah ongga Ofa ombk skoita mimif nomnaga bera ongga otunggom mimif jeskaseda mija erek ebic egens gij Yesus Kristus ojgomu.
14Didif dagot erek koma jeska efaga egens bera enerek efetma egens ojgomu guru, tina efaga egens bera ebiedi efen efetma ofoukou.
15Jefeda erek aki egens agot oida, "Didif bera dinerek etma guru, jefeda didif dinebiedi efaga egens koma guru." Tina aki egens koma tuturu ebiedi efaga egens koma ros.
16Noba erek osu egens tein agot oida, "Didif bera dinerek eiteij guru, jefeda dinebiedi efaga egens koma guru." Tina osu egens koma tuturu ebiedi efaga egens koma ros.
17Mar insa koma enadaij guru, jeska erek efaga egens nomnaga eja erek eiteij ojgomu, beda eneg mar deika guru. Noba erek efaga egens koma nomnaga eja erek osu ojgomu, beda eneg mar efen ensesa deika guru.
18Tina ongga tenten bera, Allah otunggom efaga egens insa koma erek efen efetma ofoukou ebiedi efaga jeni Ofa efen odou ejginaga rot.
19Jeska erek efen efetma egens insa koma enah gu esinsa ojgomu, beda efen efaga enah guru.
20Tina ongga tenten bera efaga egens efen efetma ofoukou ojgomu.
21Erek koma jefeda, eiteij enagot gu etma oida, "Didif dunocosu rot bua guru." Era ebirfaga enagot gu aki oida, "Didif dunocosu rot bua guru."
22Tina ongga tenten bera efetma egens ongga mimif musujohu rot bera ofora eriaga ojgomu bera erek ofoufemfem tein nou mimif.
23Noba efetma koma erek osu efeb ongga mimif musujohu oida erek onofoufem guru, beda mimif mutunggom mar ongga oufamofa rot osu efeb koma erek maha emas gij. Noba efetma koma ongga mojen mimif rot, beda mimif mira mar jeskaseda miredemi mar koma ojgomu.
24Noba efetma koma ongga mojen mimif rot guru bera minedemi mar koma guru. Tina Allah ontunggom mifaga erek koma jeskaseda efetma koma ongga erek ongkoska fob omofij efetma koma ongga erek ongkoska eteb guru.
25Jefeda efaga koma efen efetma enemekebema guru. Tina efetma ebiedi efaga koma erek egens ojgomu jeskaseda omofijma.
26Noba gij mona ongga efetma egens eita efera okora, beda koma erek efaga efetma nomnaga rita rifera okora tein. Noba gij mona ongga efetma egens odou efaga ouka eteb rot mar, beda efaga efetma nomnaga rudou efaga ouka eteb tein.
27Noba erek Allah otunggom efaga egens koma jeskaseda efen efetma ofoukou, beda erek koma tein, Ofa otunggom iwa egens egens ongga erek rusnok ofoukou jeskaseda ija erek ebic egens gij Yesus Kristus fob.
28Beda Ofa eita owesa efek gu iwa egens egens jeskaseda itunggom mar ongga erek imofijma ojgomuja. Erek koma jefeda ongga sismeni bera Ofa eita owesa efek gu rusnok rineya jeskaseda rifarur erek rasul-rasul. Beda Ofa eita owesa efek gu rineya jeskaseda ragot rot mar ongga Ofa oncunc gu rua gij rudou efesi gu rusnok enjgineg. Beda Ofa eita owesa efek gu rineya jeskaseda rudou efesis eteb fogora ruftuftu rot Allah oga gu rusnok enjgineg. Beda Ofa eita owesa efek gu rineya deika jeskaseda rutunggom mar ongga onswos jeska Allah gu rusnok rudou. Beda Ofa eita owesa efek gu rineya jeskaseda rita eskeira gu rusnok ongga marenir. Beda Ofa eita owesa efek gu rineya deika jeskaseda rufij rusnok enjgineg ongga rifera okora. Beda Ofa eita owesa efek gu rineya jeskaseda risejah Mod Ari efen efarur nou rusnok. Beda Ofa eita owesa efek gu rineya jeskaseda rifesij mar gij oga egens ongga rua risinsa rinejginaga rot efen ofou enesi tein.
29Didif dinagot rot oida rusnok nomnaga risma owesa efek jeskaseda rutunggom mar ongga erek egens morototuma guru. Jeska rusnok nomnaga bera rinefarur erek rasul guru. Noba rusnok nomnaga rinerek rua ongga ringg mar jeska Tuhan fogora ragot rot gu rusnok enjgineg guru. Noba rusnok nomnaga rinesma rudou ongga efesis fogora ruftuftu rusnok enjgineg rot Allah oga guru. Noba rusnok nomnaga rinesma owesa efek jeskaseda rutunggom mar ongga onswos jeska Allah jah rusnok rudou guru.
30Noba rusnok nomnaga rinesma owesa efek jeskaseda rita eskeira gu rusnok ongga marenir guru. Noba rusnok nomnaga rinesma owesa efek jeskaseda rifesij mar gij oga egens ongga rua risinsa rinejginaga rot enesi guru. Noba rusnok nomnaga rinesma owesa efek jeskaseda rudou ebriyi gij oga egens koma ongga rusnok enjgineg rimfesij gij guru.
31Ongga oufamofa bera, iwa idou osos rot owesa efek jeska Allah jeskaseda itunggom mar koma ongga erek ofoufemfem ekirsa jeska mar enjgineg ojgomu. Beda ainsa kef didif dumocunc moroju ongga ongkoska eteb ekirsa nou iwa.