Dual Panel1Erek koma tein, iwa ongga yanghi igers fob bera yugif gu yeyin yahiner rot tenten ojgomu. Noba erek yahiner rineya ongga runororu Yesus Kristus enesi, beda ineradgodu rua rot mar insa koma guru. Tina nou ongga rua rik mar ongga oufamofa ongga iwa itunggom jera rot teinefa iwa yugif gu Allah rot tenten fob, beda oisouska mar insa koma bera rua tein rumororu Yesus Kristus ojgomu.
2(3:1)
3Erek koma tein, mar ongga orocunc rot rujager rerin ongkoska bera enen jeska mar ongga rutunggom erek rumoumna risinsa guru. Erek rua rirgi meisoufa ongga ebahetkit ni, era merfej ongga rinsa ni, serag ongga raha tumu ritma ni, jera mofou ongga raha tumu rutufou ni, mar erek koma nomnaga bera onorocunc rot rerin ongkoska guru.
4Tina mar ongga orocunc rot rujager rerin ongkoska rot ah aibin bera en jeska mar ongga angh gij rudou efesi ojgomu. Koma erek rua runofra risinsa rufoka guru. Noba rua rita mar rot rudou ongga eriagamaga tein ojgomu. Jeska ahah Allah eiteij bera mar insa koma efen efera osok ekirsa jeska meisoufa jera merfej tein.
5Sis fob rujager ongga rudou ebsi komowa noba ongga ruisum gij Allah bera rugif gu rerin rahiner ojgomu. Oisouska mar koma bera rua rurocunc rot rerin ongkoska ongga tenten ojgomu.
6Koma bera erek Sara ongga Abraham efen mohona. Jeska sis fob ofa ougif gu efen mahina noba ejeka ofa erek efen ebirfaga egens. Jefeda erek iwa ita mar ongga tenten ojgomu noba inejekjeka idou efesi rot mar egema tein guru, beda koma omorocunc rot oida iwa tein irek Sara fob.
7Iwa ongga yuskotu arja fob, iwa ita mar erek insa koma tein ojgomu. Iwa ita mar ongga ongkoska skoita yeyin yuhoner noba yugif gu rua tein ojgomu. Jeska rua bera runofora efek erek iwa guru, noba rua rimesma eiteij ah ongga efeinah ongga Allah anggen rot morototuma jera iwa tein. Erek iwa ineita mar insa koma guru, beda Allah eneg rot mar ongga iwa yum iteij gu Ofa rot guru.
8Mar ofoka egens gij surat kef rot omoisa bera erek kef: Didif duis gu iwa jeskaseda iker morototuma rot idou ongga eriagamaga ojgomu, ita idou ongga okora rot rusnok enjgineg rot rerin mar okum ni, idou omokorema ni, inofra yeyin ifoka erek ekirsa jeska rusnok enjgineg guru ni.
9Inesesa mar ongga ofogog sons skoita rusnok enjgineg guru ni, inohurmei mar skoita rusnok enjgineg ongga ruhurmei mar skoita iwa guru ni. Tina ongga ongkoska bera iwa ita mar ongga oufamofa sons skoita rua insa koma ojgomu. Jeska Allah enjeka iwa jeskaseda isma oufamofa eteb jeska Ofa.
10Iwa isma mar erek koma jeska Allah anggot gij Mar Efeyi Ebsi erek kef oida, "Idu ongga odou os esma eiteij ah ongga oufamofa eteb ojgomuja, beda ofa enagot mar ongga ofogog skoita rusnok enjgineg guru era onocuwei mar gij rua tein guru.
11Ongga oufa bera ofa ekikif jeska efen mar ongga oska, noba eita mar ongga oufamofa ojgomu. Noba ofa ereni rot ahais jeskaseda eita odou ongga eriagamaga jera rusnok nomnaga ojgomuja.
12Jeska Allah ot joug rusnok ongga rutunggom mar ongga oufamofa ojgomu. Noba Ofa oj osu nou mar ongga rua rum riteij rot gu Ofa tein. Tina Ofa odou oska rot rusnok ongga rutunggom mar ongga ofogog ojgomu."
13Erek iwa idou os eteb jeskaseda ita mar ongga oufamofa ojgomu, beda giskini rusnok enjgineg rineita mar ongga oska skoita iwa rot guru.
14Erek koma, tina erek rusnok rita mar ongga oska skoita iwa fogora ifera okora rot mar ongga oufamofa ongga intunggom fob, beda Allah emeita oufamofa eteb gu iwa rot koma si. Noba iwa inemeesa rot rusnok ongga rudou os rita mar ongga oska skoita iwa guru. Noba iwa inemeesa rot mar egema tein guru.
15Tina yuh idou efesi rot ongkas skoita Yesus Kristus ongga erek yeyin Tuhan ojgomuja. Noba isejah idou efesi ongga ejginaga rot teinefa iwa iroru Yesus Kristus fob. Jeska erek rusnok enjgineg rijeka iwa rot teinefa fogora yuisum gij Yesus Kristus, beda iwa imagot rot koisoisa gu rua si. Tina iwa ifesij osok gij mar koma gu rua rot idou ongga eriagamaga noba ongga emeesa rot Allah ojgomu.
16Iwa ita mar ongga iwa ijginaga bera jeni erek Allah odou os rot ojgomu. Noba ita mar erek koma jeskaseda mojen en skoita rusnok ongga ragot mar ongga oska skoita iwa. Rua ruhurmei mar gu iwa rot mar ongga oufamofa ongga iwa itunggom jeska iwa iroru Yesus Kristus fob.
17Erek iwa ifera okora rot mar ongga oufamofa ongga iwa intunggom fob, noba mar koma bera ororu Allah odou ejginaga rot, beda koma bera oufamofa eteb ojgomu. Tina erek iwa ifera okora rot mar ongga oska ongga iwa intunggom fob, beda koma onofij iwa jinaga guru.
18Gij mona juens bera Yesus Kristus eita efera okora eteb tumu mega salib jeskaseda osuna mar ongga oska nomnaga jeska rusnok rudou efesi fob. Ofa, ongga efen mar ongga oska oskiyai tein guru, bera eita efera okora rot rusnok ongga rerin mar ongga oska ofoukou. Noba mar ongga Ofa ontunggom insa koma bera erek esejah moroju jeskaseda rusnok ruksons skoita Allah. Rusnok mebif bera ongga ragob Ofa fogora agos fob, tina Ofa esma eiteij ah ongga efeinah sons oisouska Efena Ebsi Allah ojgomu.
19Noba oisouska Efena Ebsi koma tein bera Yesus ojoftuftu mar gu rifena ongga ringker gij monuh mar agos noba ongga rineja jeska jinaga guru.
20Jeska sis fob, gij mona ongga Nuh asus meg eteb ros, beda Allah oin keingg odou efesi rot mar ongga oska ongga rusnok rufoukou runtunggom gij mona insa koma ojgomuja. Noba rua runororu Ofa efen oga jinaga guru. Jefeda rua nomnaga rageben gij mei ofot eteb. Tina rusnok rufok cinja orfomu ongga ringker gij meg eteb insa koma bera rifena ebah. Koma bera Nuh jera efen mohona jera efeser ojgomu ongga risma riteij ah.
21Beda mei insa koma tein bera orocunc rot mei baptis ongga iwa ita ebeibeyaif jeskaseda isma eiteij ah ongga efeinah. Noba mei baptis koma ongga iwa ita bera onot rot yeyin ifaga ongga ahtaboku guru. Tina mei baptis insa koma bera orocunc gu rusnok enjgineg oida iwa idou os jeskaseda Allah osuna yeyin mar ongga oska jeska idou efesi. Jefeda iwa ijginaga rot teinefa iwa iroru Ofa rot idou ongga efen mar ongga oska oskiyai tein deika guru. Mei insa koma bera ongga eita eiteij ah ongga efeinah gu iwa oisouska Yesus Kristus ongga endebecki jeska agos fob.
22Beda ebeibeyaif Ofa onjosok jah mebaga fob. Noba jah suma bera Ofa ofoka ereij keingg mar nomnaga morototuma jera Allah. Noba malaikat-malaikat jera mar nomnaga ongga efen owesa efek bera rugif gu Ofa ojgomuja.