Dual Panel1Edohuji ongga dudou okora rot, didif dugu surat egens kef gu iwa ongga erek dedin edeser jeskaseda iwa ineita mar ongga oska guru. Tina erek rineya jeska iwa ongga rita mar ongga oska, beda mifmin osnok egens ongga onot deismos nou mimif skoita Allah. Ofa bera Yesus Kristus ongga efen mar ongga oska oskiyai tein guru.
2Ofa aha esinsa gu rusnok ongga rufogog fogora agos nou mifmin mar ongga oska nomnaga fob. Ofa ontunggom mar koma jeskaseda Allah onofra okum keingg mimif rot guru. Noba Ofa onotunggom mar insa koma nou mimif ojgomu guru, tina Ofa agos nou rusnok monuh nomnaga tein rerin mar ongga oska.
3Erek mudou ororu mar ongga Allah anggot rot, beda koma bera ongga orocunc rot oida mimif mijginaga Ofa rot tenten fob.
4Noba idu ongga agot oida ofa ejginaga Allah rot tenten fob, tina ofa onororu mar ongga Ofa anggot rot insa koma guru, beda ofa ocuwei mar ojgomu. Noba koma tein erek ofa okoja Allah oga ongga tenten tein.
5Tina idu ongga omororu mar ongga Allah anggot rot, beda ofa efen odou ongga okora eteb rot Allah jeni erek Allah odou okora eteb rot mimif tein. Mar koma bera omorocunc rot oida mifmin mudou egens jera Ofa fob.
6Noba idu ongga agot oida ofa efen odou egens jera Allah, beda ofa eita mar erek Yesus Kristus eita ojgomu gij mona ongga Ofa engker gu mebif ros.
7Edohuji ongga dudou okora rot, didif dugu surat egens kef osok gij mar egens ongga Allah anggot rot sis fob. Noba mar ongga dinagot insa kef bera enerek mar ongga efeinah guru. Tina didif dumftuftu iwa rot mar insa koma sis fob. Jeska iwa ingg rot mar insa koma sis mona ongga iwa imororu Yesus Kristus erek efeinah ros.
8Tina mar insa koma bera erek mar ongga efeinah tein. Jeska ebeibeyaif iwa idou omokorema rot tenten erek Yesus Kristus odou okora rot iwa gij mona ongga Ofa engker gu mebif ros. Koma tenten ojgomu, jeska erek mimif mita mar koma erek Yesus eita sis fob, beda motkobah ongga angh gij mudou efesi bera eseiseifa ojgomu. Noba mimif misma eiteij ah ongga efeinah ongga erek eisa egigir.
9Erek osnok egens agot oida ofa eita mar ongga ongkoska ojgomu, tina ofa odou oska rot efen mohuj ongga Kristen tein, beda koma orocunc rot oida ofa engker gij motkobah ros, noba onoira gij eisa tein enesi.
10Tina erek osnok egens odou okora rot efen mohuj ongga Kristen fob, beda ofa koma bera oira gij eisa fob. Noba mar egema tein onotunggom ofa jeskaseda esiri gij mar ongga oska jinaga guru.
11Erek koma tina, erek osnok egens efen odou ongga oska rot efen mohujir ongga Kristen, beda ofa bera erek rusnok ongga ringker gij motkobah ros, jeska ofa otunggom mar ongga oska ojgomu ros. Noba jeska ofa engker gij motkobah ros, beda ofa enejginaga rot oida efen odou ongga osumsumu guru. Ofa enejginaga rot oida ofa emesma okum eteb rot efen mar ongga oska insa koma tein guru.
12Didif dunogu surat egens kef gu iwa ongga erek iforoker ros, jeska Allah onsuna rot yeyin mar ongga oska jeska idou efesi fob. Ofa ontunggom mar erek koma oisouska Yesus Kristus ongga anggos nou iwa sis fob.
13Noba didif dunogu surat egens kef gu iwa ongga erek runa ofos fob, jeska iwa bera ijginaga rot Yesus Kristus ongga eker morototuma jera Allah gij mona ongga Allah onotunggom mebif enesi. Noba didif dunogu surat egens kef gu iwa ongga erek iforoker ros, jeska iwa bera inesiri gu Bilis deika guru, tina ebeibeyaif iwa yut rot ahais ojgomuja. Noba didif dunogu surat egens kef gu iwa nomnaga ongga erek dedin edeser, jeska iwa ijginaga rot mifmin mika Allah fob.
14Noba didif dunogu surat egens kef gu iwa ongga erek runa ofos fob, jeska iwa bera ijginaga rot Yesus Kristus ongga engker morototuma jera Allah sis mona ongga Allah onotunggom mebif enesi tein. Noba didif dunogu surat egens kef gu iwa ongga erek iforoker ros, jeska iwa bera iroru Allah oga ongga angh gij idou efesi rot ahais ojgomuja, noba jeska iwa inesiri gu Bilis deika guru.
15Iwa inofra mar ongga rusnok mebif rufra erek oufamofa guru. Noba idou onosos rot mar ongga rusnok mebif rudou osos rot guru. Erek koma tein, erek osnok egens ongga ofra mar ongga mebif efen insa koma erek oufamofa, beda ofa onofra Allah ofoka erek oufamofa guru.
16Jeska mar insa koma bera ofogog noba en jeska rusnok mebif ojgomu. Noba mar ofogog ongga rusnok rudou eftirir keingg ni, mar ongga rua rik gu riteij fogora rudou osos rot ni, mar ongga rua rufra risinsa rufoka erek aksa rot ni, mar koma nomnaga bera enen jeska mika Allah guru. Tina mar koma bera en jeska rusnok mebif ongga rufogog ojgomu.
17Noba rusnok mebif jera mar nomnaga ongga rudou eftirir keingg bera emeseiseifa si. Tina osnok egens ongga ororu mar ongga Allah ondou os rot ojgomu bera emesma eiteij ah ongga ah aibin si.
18Edohuji ongga dudou okora rot erek dedin edeser, mona ongga enja ejgwaga bera enesaga doida fob. Noba iwa ingg fob rot oida gij mona insa koma bera osnok egens ongga ofogog doska emen. Ofa bera ongga eretei rot Yesus Kristus. Noba ebeibeyaif tein rusnok ofoukou ongga riretei rot Yesus Kristus erek osnok egens insa koma bera rin fob. Erek koma jefeda mimif mijginaga rot oida mona ongga enja ejgwaga bera enesaga doida fob.
19Rusnok rufoukou insa koma rimekebema jeska mimif jeska rudou enerek egens jera mimif deika guru. Erek rua bera Kristen ongga ruroru mar ongga tenten ojgomu, beda rua rimeker erek egens morototuma jera mimif ojgomuja si. Tina rua rineita erek koma guri. Noba rua rudou os rimekebema ojgomu. Jefeda rusnok nomnaga rijginaga rot oida rua rinerek egens jera mimif deika guru.
20Tina iwa bera inerek rusnok insa koma guru. Jeska iwa insma owesa efek jeska Efena Ebsi Allah fob. Jefeda iwa ijginaga rot mar meidu ongga erek tenten ojgomu.
21Noba didif dugu surat egens kef gu iwa jeska iwa ijginaga rot oida Allah efen oga bera erek tenten ojgomu. Noba iwa tein ijginaga rot oida mar ongga rusnok enjgineg rucuwei mar gij bera enen jeska Allah efen oga ongga tenten jinaga guru.
22Erek koma tein, rusnok ongga ranggot oida Yesus bera enerek Kristus koma ongga omosuwa mimif jeska mifmin mar okum guru, beda rua bera ongga rucuwei mar ekirsa jeska rusnok nomnaga. Rua bera ongga rukoja Yesus Kristus erek Allah efen efesa jera mifmin mika Allah.
23Jeska erek osnok egens okoja Yesus erek Allah efen efesa ojgomu, beda koma erek ofa okoja rot Allah tein. Tina erek osnok egens agot oida Yesus bera Allah efen efesa, beda ofa tein efen odou ongga egens jera Allah fob.
24Jefeda iwa iroru Allah oga insa koma ongga iwa ingg rot gij mona ongga iwa inroru Yesus Kristus fob ojgomu. Iwa ita mar erek koma, beda idou emeja erek egens jera Yesus ongga Allah efen efesa, jera Ofa efen meka Allah tein si.
25Noba mar ongga Ofa anggen rot gu mimif sis fob bera oida Ofa emeita eiteij ah gu mimif ongga ah aibin ojgomuja si.
26Mar kef ongga didif dunogu gu iwa bera osok gij rusnok ongga rudou os rurokrusa iwa jeskaseda inororu Allah oga ongga tenten deika guru.
27Tina Efena Ebsi Allah, ongga iwa insma jeska Yesus Kristus fob, bera engker gij idou efesi ros. Jefeda iwa inocosu rot oida rusnok enjgineg ruftuftu iwa deika guru. Jeska Efena Ebsi Allah bera ongga oftuftu iwa osok gij mar insa koma nomnaga. Noba mar ongga Ofa oftuftu gu iwa bera erek tenten ojgomu. Ofa onocuwei mar jinaga guru. Jefeda iwa ita idou egens jera Yesus Kristus noba iroru mar koma ongga Efena Ebsi Allah omftuftu gu iwa sis fob ojgomuja.
28Edohuji ongga dudou okora rot erek dedin edeser, iwa ita idou egens jera Yesus Kristus ojgomuja. Iwa ita mar erek koma jeskaseda gij mona ongga Ofa ongksons en fob, beda yeyin idou erek ahais ros noba mojenen iwa rot gij mona insa koma tein guru.
29Noba iwa ijginaga rot oida mar nomnaga ongga Allah ontunggom fob bera erek oufamofa ojgomu. Jefeda erek osnok egens ontunggom mar ongga oufamofa ojgomu, beda ofa enja erek Allah efen efesa fob.