Alkitab Mobile SABDA
[VER] : [MEYAH]     [PL]  [PB] 
 <<  2 Korintus 5 >> 

1Koma Mar insa koma bera erek tenten ojgomu, jeska mimif mijginaga rot oida mifmin mifaga ongga erek modwok ongga eneja erek etefa kef. Beda gij mona ongga mimif manggos fob, beda mimif mimesma mifaga ongga efeinah deika gij mebaga si. Noba mifmin mifaga ongga efeinah koma bera erek mod egens ongga ot ahais rot ah aibin ojgomuja. Noba mar koma bera enen jeska mar ongga rusnok rutunggom guru. Tina Allah esinsa bera ongga emeita mifaga ongga efeinah erek koma ojgomu.

2Erek koma tina, askesi mimif mingker gij mifaga insa kef ros, bera mudou ereyema rot ojgomuja. Jeska mudou osos rot jeskaseda misma mifaga ongga efeinah noba ongga angh gu mebaga ojgomu. Koma erek osnok egens ongga odou osos rot ergi meisoufa ongga erek efeinah ojgomu.

3Erek koma jeska gij mebaga bera mimif minerek efena ojgomu guru, tina mimif mimesma mifaga ongga efeinah tein si.

4Noba askesi mimif mingker gij mifaga ongga ebeibeyaif efen, bera mimif mibisa noba mireyema osok gij mar okum ongga ah keingg mimif gu mebif ojgomuja. Koma erek rusnok ongga ringker gij modwok ongga eneja etefa ojgomuja. Tina mimif mineradgodu ebeirens jeskaseda manggos ojgomu guru. Koma erek osnok egens ongga ohoda efen meisoufa ongga efeyei ebeirens fogora ofos rourou ojgomu. Mimif mireyema erek koma jeska mimif mudou os miferwei mifaga ongga eriaga insa kef jera mifaga ongga efeinah gu mebaga ojgomu. Jah suma bera mifmin mifaga ongga efena ebah rot ah aibin ojgomuja.

5Allah bera ongga ensejah mimif jeskaseda mimesma mar insa koma. Noba Efena Ebsi ongga Ofa eita gu mimif fob bera erek orocunc rot mar enjgineg tein ongga Ofa anggen rot oida emeita gu mimif gij mona kahma tein si.

6Noba mimif mijginaga rot oida askesi mimif mingker gij mifmin mifaga insa kef ros, beda koma erek miker yes jeska mebaga ongga Tuhan Yesus engker gij. Tina mimif mudou eskeira rot ojgomu, jeska ai juens beda mimif mimesma mifaga ongga efeinah deika gij mebaga si.

7Jeska mar ongga mimif mutunggom gij miteij ah insa kef bera oisouska mudou ongga ororu Allah oga ojgomu, noba onororu mar ongga mimif mik gu miteij guru.

8Noba mimif minemeesa nou magos guru, jeska mimif mijginaga rot oida mimif mijeker morototuma jera Tuhan gu mebaga. Noba koma bera erek oufamofa ekirsa nou mimif.

9Erek koma jefeda memef mog mejmeg gij rot mar ofoka egens ojgomu fogora memef motunggom mar ongga ereita Tuhan efen odou ongga eskeiramera rot ojgomu. Noba memef motunggom mar erek koma askesi mengker gij mefaga insa kef, era askesi mengker gij mebaga ojgomuja.

10Jeska mimif nomnaga mumojot jah Yesus Kristus odou si. Beda Ofa omoga ojga rot mar nomnaga ongga mimif muntunggom askesi mingker gij mifmin mifaga insa kef ros. Ofa emeita oufamofa gu rusnok ongga rutunggom mar ongga erek oufa ojgomu. Noba Ofa omofra okum eteb keingg rusnok ongga runtunggom mar ongga erek oska.

11Yesus Kristus omoga ojga rot rusnok nomnaga rerin rita mar si, jefeda memef memeesa rot Tuhan efen owesa efek ojgomu. Noba memef moftuftu rusnok enjgineg rot ahais jeskaseda rua tein ruroru Allah rot tenten ojgomuja. Noba Allah ejginaga rot oida memef motunggom mar koma rot modou egens ojgomu fob. Noba didif dudou os jeskaseda iwa tein ijginaga rot oida memef meita mar rot modou ongga egens erek koma ojgomu.

12Noba didif dinagot rot mar insa kef jeskaseda disitit disinsa dufoka rot skoita iwa guru. Tina didif dagot rot mar insa kef gu iwa jeskaseda iwa idou eskeira rot memef ojgomu. Beda iwa tein imesitit rot mofoka skoita rusnok enjgineg ongga risitit risinsa rufoka rot mar ongga rua rutunggom jah gu iwa ifekesa. Tina rua rineita mar rot rudou ongga ocosu efei ahtah jinaga guru.

13Noba jeska didif dagot mar erek insa koma beda iwa imosujohu rot oida merei ok didif fob ei. Skoidu, iwa isujohu rot erek koma ojgomu. Jeska didif dutunggom mar nomnaga jeskaseda durofra Allah efen ofoka erek aksa ojgomu. Tina didif dedin dudou bera erek giskini ojgomu. Jeska didif dutunggom mar insa koma jeskaseda orofij iwa tein rot.

14Erek koma jeska Yesus bera oncunc rot efen odou ongga okora eteb rot mimif nomnaga. Jefeda memef modou os mofij rusnok enjgineg ojgomu. Noba modou efesi ororu rot tenten oida Yesus Kristus anggos nou rusnok nomnaga fob. Jefeda ahah Allah eiteij bera mimif nomnaga tein manggos rot mifmin mar ongga oska morototuma jera Yesus fob.

15Noba Ofa anggos nou rusnok nomnaga jeskaseda rua risma eiteij ah ongga efeinah. Tina Ofa enagos nou rusnok jeskaseda rua rutunggom mar ongga risinsa rudou os rot gij rerin riteij ah ongga efeinah insa koma guru. Ofa agos nou rusnok jeskaseda ebeibeyaif bera rua rita mar rot riteij ah ongga efeinah noba ongga ereita Yesus Kristus odou eskeira rot ojgomu. Jeska Ofa bera ongga anggos noba endebecki rot efen eiteij ah ongga efeinah jeskaseda orofij rusnok nomnaga gij mar koma fob.

16Erek koma jefeda iwa inosujohu mar rot rusnok enjgineg morototuma erek rusnok mebif rusujohu rot mar guru. Jeska gij mona ongga mimif munororu Yesus enesi bera mimif tein musujohu rot Yesus Kristus erek rusnok mebif rusujohu rot Ofa.

17Tina gij mona ongga rusnok rudou eja erek egens jera Yesus Kristus fob, beda rua rija erek rusnok ongga efeinah tein ojgomu. Jeska Allah onsuna rot rerin riteij ah ongga ensis jeska fob. Beda rua rinsma eiteij ah ongga efeinah deika fob.

18Noba mar koma nomnaga en jeska Allah ojgomu. Ofa bera ongga oroun rusnok sons skoita Ofa esinsa oisouska Yesus Kristus fob. Noba Ofa obk memef jeskaseda moftuftu rot mar insa koma gu rusnok fogora moroun rua sons skoita Ofa.

19Memef moftuftu rot oida Allah odou os oroun rusnok nomnaga sons skoita Ofa esinsa. Noba Ofa otunggom mar koma oisouska Yesus Kristus ojgomu. Noba askesi Ofa oroun rusnok, beda Ofa onosujohu rot rerin mar ongga oska deika guru. Noba Ofa bera obk memef jeskaseda moftuftu rot mar insa koma gu rusnok nomnaga ojgomuja.

20Jefeda memef bera erek rusnok ongga rumfij Yesus Kristus ojgomu. Noba Allah bera ombk memef fogora Ofa agot mar oisouska memef skoita iwa. Beda memef mois gu iwa oisouska Yesus efen ofoka jeskaseda iwa ikikif jeska yeyin mar ongga oska fogora yuksons skoita Allah ojgomu.

21Yesus Kristus bera efen mar ongga oska erek oskiyai tein guru. Noba erek hakim egens agot oida osnok egens agos ojgomu, beda erek koma tein Allah ombk Yesus sis fob jeskaseda Ofa agos rot mifmin mar ongga oska nomnaga. Ofa ontunggom mar erek koma jeskaseda oisouska mudou ongga egens jera Ofa bera Allah omocunc mimif erek rusnok ongga rerin mar ongga oska oskiyai tein guru.


  Share Facebook  |  Share Twitter

 <<  2 Korintus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel