Alkitab Mobile SABDA
[VER] : [MEYAH]     [PL]  [PB] 
 <<  2 Timotius 1 >> 

1Didif Paulus bera dinjerek Yesus efen rasul egens jeni Allah odou ejginaga rot fob. Didif dunogu surat kef gu bua Timotius ongga didif dudou okora rot erek dedin edesa egens tein. Noba oisouska mar ongga Yesus Kristus ontunggom fob bera Allah anggen rot oida efen rusnok nomnaga rimeita eiteij ah ongga efeinah si. Didif dum diteij gu Allah jeskaseda Ofa jera mifmin Tuhan Yesus Kristus omocunc odou ongga oufamofa noba ongga eriaga skoita bua. Noba didif dum diteij jeskaseda Ofa emeita biteij ah ongga eskeiramera gu bua ojgomuja.

2(1:1)

3Gij orofosut mona jera motu nou ongga didif dum diteij gu Allah, beda didif duis oufamofa eteb gu Ofa. Ofa bera ongga didif dufij rot dudou ongga eskeiramera ojgomuja. Noba dedin indimower tein rufij Ofa gij mona ongga sis fob. Noba orofosut mona ongga didif dum diteij gu Ofa, beda didif duis oufamofa eteb rot bua Timotius tein.

4Didif dudou ah keingg rot teinefa bua budou oubsaha eteb noba ebisa rot gij mona ongga didif dinja jeska bua sis fob tein. Noba didif dudou os dujorodosu bua deika jeskaseda didif dudou efaga ouka morototuma jera bua deika.

5Didif dudou ah keingg rot teinefa bua buroru Yesus rot tenten fob. Sismeni bebin abowa Lois jera mosib Eunike ongga gororu Yesus rot tenten fob. Noba didif dudou ejginaga rot tenten oida bua buroru Yesus rot tenten tein fob.

6Erek koma jefeda didif disisi joug bua deika jeskaseda bua bicira gij owesa efek ongga Allah eita gu bua sis fob. Ofa eita owesa efek insa koma sis mona ongga didif dangha ditma esij bua noba dum diteij keingg bua fob.

7Erek koma jeska Efena Ebsi ongga Allah ensa skoita mimif bera onotunggom mudou erek emeesa rot mar guru. Tina ongga tenten bera, Efena Ebsi insa koma eita owesa efek gu mimif gij mudou efesi fogora mifmin mudou ongga okora rot rusnok enjgineg ni, noba mudou ororu mar ongga oufamofa rot ahais ojgomuja ni.

8Erek koma jefeda mojenenib rot Tuhan oga guru. Noba mojenenib rot didif jeska rusnok raha didif gij mod oskusk insa kef fob guru. Tina bua bisejah budou efesi jeskaseda bita bifera okora morototuma jera didif askesi magef mancira rot Allah oga ongga oufamofa. Magef mancira rot ahais oisouska Allah efen owesa efek ojgomu.

9Allah bera ongga onsuwa mimif nomnaga jeska mifmin mar ongga oska, noba Ofa oncunc mimif jeskaseda mita mar rot mudou ongga ebsi komowa ojgomuja. Ofa onotunggom mar insa koma oisouska mar ongga oufamofa ongga mimif misinsiyai muntunggom guru. Tina Ofa ontunggom mar insa koma oisouska Ofa esinsa odou ejginaga rot ojgomu, noba oisouska odou ongga oufamofa rot mimif tein. Ofa ensejah nou ocunc efen odou erek insa koma gu mimif oisouska Yesus Kristus gij mona ongga sis dojunmeni fob.

10Tina ebeibeyaif Allah oncunc rot mar insa koma oisouska Yesus Kristus fob. Ofa bera ongga en jeskaseda oskotu mimif jeska mifmin mar ongga oska. Jefeda ebeibeyaif mimif minagos deika guru. Noba oisouska efen oga ongga oufamofa insa koma bera rusnok ruira gij efen eisa fob. Jefeda rua risma eiteij ah ongga efeinah noba ongga ah aibin ojgomuja.

11Allah ocunc didif erek efen rasul egens jeskaseda dijefesij rot efen oga ongga oufamofa insa koma gu rusnok enjgineg noba jeskaseda duftuftu rua rot efen ofou jeni tein fob.

12Jefeda ebeibeyaif rusnok rumfra mar okum keingg didif rot ojgomuja. Tina mojenen didif rot mar insa koma guru. Jeska didif dijginaga rot tenten oida Yesus omofij didif si. Noba didif dijginaga rot tenten oida Ofa omot joug didif rot oga ongga oufamofa insa koma ongga Ofa oncunc rot gu didif onjoros mona ongga didif dimfesij rot mar insa koma oisa fob.

13Timotius, didif dumftuftu bua rot oga insa koma ongga tenten. Jefeda buroru mar insa koma rot ahais fogora buh budou ongkas rot ojgomuja. Buroru Yesus Kristus noba budou okora rot rusnok enjgineg tein. Mimif nomnaga mita mar insa koma oisouska mudou ongga egens jera Yesus Kristus fob.

14Butunggom mar insa koma nomnaga oisouska owesa efek ongga en jeska Efena Ebsi Allah ongga engker gij budou efesi ojgomuja. Noba bicira gij mar ongga oufamofa insa koma ongga Allah oncunc bua rot fob ojgomuja.

15Bua bijginaga rot fob oida dedin edohujir nomnaga gij monuh Asia rija jeska didif fob. Rineya jeska rua insa koma bera Figelus gonu Hermogenes.

16Tina Onesiforus jera efen rusnok nomnaga ongga ringker jera ofa bera mojenenir rot didif jeska dingker gij mod oskusk kef guru. Jeska gij mona ongga Onesiforus ensaga gu kota Roma fob, beda ofa ohca didif ojgomuja onjoros ofa ek didif. Beda ofa ofij didif jeskaseda dudou onokum eteb rot mar ongga angh keingg didif guru. Jefeda didif duis gu Allah jeskaseda Ofa ocunc odou ongga eskeiramera gu Onesiforus jera efen rusnok tein.

17(1:16)

18Noba bua tein bijginaga rot oida gij mona ongga dingker jah kota Efesus ros, beda ofa ofij didif ofoukou jah suma tein. Jefeda didif duis gu Tuhan jeskaseda Ofa ocunc efen odou ongga oufamofa eteb gu Onesiforus gij mona ongga Ofa ongksons en deika fob.


  Share Facebook  |  Share Twitter

 <<  2 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel