Dual Panel1Edohuji, Allah bera enjeka iwa morototuma jera didif erek Ofa efen rusnok ongga rudou ebsi komowa. Jefeda iwa isujohu rot koisoisa osok gij Yesus Kristus ojgomu. Jeska Ofa bera ongga Allah ombk jeskaseda efesij rot efen oga gu rusnok nomnaga. Noba Ofa bera ongga Allah ombk jeskaseda eja erek mifmin ebirfaga imam egens ongga ofoka aksa. Noba mimif magot rot oida mudou ororu Ofa rot tenten ojgomuja.
2Allah oncunc Ofa erek ebirfaga imam egens, noba Ofa otunggom mar nomnaga ongga Allah odou os rot. Koma tein erek Musa ongga ontunggom mar nomnaga ongga Allah ocunc gu ofa nou efen rusnok sis fob.
3Noba Yesus bera efen ofoka ongga aksa ekirsa jeska Musa. Erek koma jeska giskini rusnok runougif gu mod egens ongga osnok egens ei fob guru. Tina rua rugif gu ofa ongga enei mod insa koma. Jefeda rusnok runougif gu Musa guru, tina rua rugif gu Yesus ojgomu.
4Koma tenten, jeska mod nomnaga ongga onotuma bera rusnok enjgineg rii fob. Tina Allah bera ongga ontunggom mar nomnaga.
5Noba Musa omfij Allah efen rusnok rot tenten, erek osnok egens ofij efen ebirfaga ojgomu. Jefeda ofa ougif gu Allah fogora emfesij gu rusnok rot mar ongga angh gij mona kahma ros tein.
6Tina Yesus bera ofij efen meka Allah rot tenten ojgomu, jeska Ofa bera ongga Allah oncunc erek mifmin ebirfaga egens fob. Noba erek mimif muku mufos rot fogora muisum gij Yesus nou mar ongga Allah emeita gu mimif, beda Allah omocunc mimif erek efen rusnok ojgomuja si.
7Yesus bera erek mifmin ebirfaga imam egens, jefeda iwa idou ah keingg rot mar ongga runggu gij Mar Efeyi Ebsi oisouska Efena Ebsi Allah erek kef oida, "Ebeibeyaif, erek iwa ig mar ongga Allah anggot gu iwa gij idou efesi fob,
8beda iwa inokoja mar koma rot idou ongga osumsumu guru.
9Jeska koma bera ongga yeyin imower rusnok ongga Israel runtunggom sis fob. Rua rikikif jeska Ofa gij mona ongga rua rincira gij monuh ongga mebi oska. Noba gij tahun rara setka tohkuru bera rua rik mar onswos nomnaga ongga Allah ontunggom jah gu rifekesa. Tina rua rireneni Allah rot mar ongga oska ongga rua runtunggom gij mona insa koma ojgomuja.
10Jefeda gij mona insa koma bera Didif dudou okum eteb rot rua, beda Didif dagot oida rua runougif nou dedin duga jinaga guru, noba rua rudou osumsumu rot mar ongga Didif dudou os jeska rua ojgomu.
11Ebeibeyaif Didif dudou okum eteb rot rua. Jefeda Didif danggen rot oida rua runoira gij monuh ongga ongkoska koma guru. Fogora rua rineker keingg rufons rot rerin mar okum jah suma tein jinaga guru."
12Erek koma jefeda, edohuji, didif duis gu iwa jeskaseda iwa ineita idou efesi ongga ofogog erek yeyin imower insa koma ongga ringkikif jeska Allah ongga eker rot ah aibin tein jinaga guru.
13Tina jeska mona efekesa enahuma ros, jefeda iwa imeisisima joug moguma ojgomuja. Iwa ita mar erek koma jeskaseda iwa inocuwei mar gu isinsa oisouska yeyin mar ongga oska ongga orotunggom idou efesi erek eskes rot Allah oga guru.
14Jeska erek mudou ot rot Ofa efen oga ojgomuja, morototuma erek mona ongga mimif munroru Ofa erek efeinah ros, beda mimif mimesma mar nomnaga ongga ongkoska morototuma jera Ofa si.
15Koma bera tenten, jeska rusnok runggu gij Mar Efeyi Ebsi erek kef oida, "Ebeibeyaif, erek iwa idou ebriyi gij mar ongga Allah anggot rot gu iwa gij idou efesi fob, beda iwa inokoja rot mar koma jera idou ongga osumsumu ojgomu guru. Jeska yeyin imower rungkoja rot mar koma sis fob. Rua rikikif jeska Ofa gij mona ongga rua rincira gu monuh ongga mebi oska."
16Iwa idou ah keingg rot mar ongga yeyin imower insa koma runtunggom sis fob ojgomu. Jeska rua bera ongga ruroru Musa gij mona ongga rua rurogna jeska monuh Mesir. Noba gij mona insa koma rua rig Allah oga noba rik mar onswos ofoukou tein ongga Ofa ontunggom jah gu rifekesa fob. Tina rua ringkikif jeska Ofa ojgomu.
17Noba iwa idou ah keingg rot oida Allah odou okum eteb skoita rua rot tahun rara setka tohkuru fob, jeska rua rutunggom mar ongga oska ojgomuja. Jefeda rusnok rufoukou jeska rua bera ranggos askesi rua rincira gij monuh ongga mebi oska insa koma.
18Noba jeska rua ongga Israel insa koma runororu Allah oga rot tenten guru, jefeda Ofa agen rot oida rua runoira gij monuh ongga ongkoska koma guru. Fogora rua rineker keingg rufons rot rerin mar okum jah suma tein guru.
19Erek koma jefeda mimif mijginaga rot oida rua runoira gij monuh ongga ongkoska insa koma guru, jeska rua rudou onororu Allah rot tenten jinaga guru.