Dual Panel1Allah bera anggen rot oida mimif tein mimeker keingg mufons rot mifmin mar okum ojgomuja si. Jefeda mimif nomnaga mut joug mudou efesi rot ahais ojgomu jeskaseda rineya jeska mimif minesiri gij mar ongga oska fogora minesma mar ongga oufamofa koma ongga Allah anggen rot guru.
2Jeska mimif mingg mar ongga Allah anggen rot oisouska efen oga ongga oufamofa skoita mimif fob. Jefeda iwa isujohu osok gij rusnok Israel ongga riker sis fob. Jeska rua tein ringg mar ongga Allah anggen rot gu rua fob. Tina mar koma onofij rua jinaga guru, jeska rua runororu efen oga rot tenten guru. Noba erek mimif tein munororu Ofa efen oga ongga oufamofa guru, beda mar insa koma ongga Ofa anggen rot gu mimif bera onofij mimif tein jinaga guru.
3Erek koma, tina mimif ongga muroru Allah oga ongga oufamofa osok gij Yesus Kristus fob bera miker keingg mufons rot mifmin mar okum ojgomuja. Noba mimif mijginaga rot oida mar insa koma bera tenten ojgomu. Jeska sis fob Allah agot mar osok gij rua ongga Israel erek kef oida, "Didif dudou okum eteb rot iwa ongga Israel. Jefeda Didif dagen rot oida rua rineker keingg rufons rot rerin mar okum jinaga guru." Erek Allah esinsa engker keingg ofons rot mar ongga Ofa otunggom gu mebif sis fob, tina Ofa agot mar insa koma rot rua ongga Israel insa koma ojgomu.
4Koma tenten, jeska gij Mar Efeyi Ebsi bera rusnok runggu mar osok gij mar ongga Allah ontunggom gij mona ongga cinja erfeka fob. Rua runggu oida, "Gij mona ongga cinja erfeka, beda Allah eker keingg ofons, jefeda Ofa onotunggom mar deika guru."
5Tina iwa ik juens deika rot mar ongga runggu osok gij rua ongga Israel. Jeska gij mar egens insa koma bera Allah agot oida, "Rua rineker keingg rufons rot rerin mar ongga okum jinaga guru."
6Sis fob rineya ongga Israel ringg rot Allah efen oga, tina rua runororu Ofa efen oga ongga oufamofa insa koma guru. Jefeda Ofa okoja rua jeskaseda runoira gij monuh egens ongga ongkoska eteb guru. Beda rua rineker keingg rufons rot rerin mar okum jah suma tein guru. Tina gij mona ongga egema deika beda Allah odou os rot oida rusnok rineya riker keingg rufons rot rerin mar okum jah suma fog tein.
7Noba mona ongga egema deika insa koma bera erek mona ebeibeyaif tein. Sismeni eteb fob bera Allah anggot rot mona ongga ebeibeyaif oisouska raja Daud. Raja Daud agot oida, "Gij mona ebeibeyaif tein, erek iwa idou ebriyi gij mar ongga Allah anggot gu iwa gij idou efesi fob, beda iwa inokoja mar koma rot idou ongga osumsumu guru."
8Noba gij mar insa koma bera Allah enagot mar osok gij mona ongga Yosua ongkag rot rua ongga Israel gij monuh ongga ongkoska sis fob guru. Jeska gij mar egens koma Ofa bera agot rot mona kahma ongga ah yes ros.
9Mimif mijginaga rot oida mona ongga rusnok ringker keingg rufons rot rerin mar okum bera enahuma ros.
10Jefeda, ebeibeyaif Allah efen rusnok rinecira rot rerin mar okum deika guru, tina rua riker keingg rufons rot rerin mar okum koma ojgomuja. Jeska gij mona ongga Allah otunggom mar nomnaga oisa fob, beda Ofa tein engker keingg ofons.
11Erek koma jefeda mimif tein muh mudou efesi gu Allah rot efen oga insa koma jeskaseda mingker keingg mufons rot mifmin mar okum tein ojgomuja. Mimif mita mar erek koma ojgomu jeskaseda minesiri gij mar ongga oska erek rua ongga Israel rinsiri gij sis fob guru. Jeska rua runororu Allah oga rot tenten guru.
12Mimif muh mudou efesi rot ongkas gu Allah erek koma, jeska Ofa efen oga bera erek mar ongga efena ebah rot owesa efek eteb tein. Ofa efen oga insa koma bera erek meiteb kalawan ongga efeya doska. Rusnok rira meiteb kalawan insa koma rireris marska fogora rik rot ongga ojga gij efen ofoufu erek koisoisa. Beda erek koma tein Allah oga bera ongga orocunc rot koisoisa gij mudou efesi rot mar ongga oska jera mar ongga oufamofa tein.
13Noba enadaij nou rusnok ridemdemi mar egema tein gij rudou efesi jeska Allah jinaga guru. Jeska Ofa efen owesa efek adaij nou ek tumu mar nomnaga ongga angh gu mebif nomnaga. Noba gij mona kahma deika bera Ofa emejeka joug mimif rot mifmin mita mar nomnaga si.
14Erek koma noba mimif mifmin imam egens ongga ofoka aksa. Ofa bera ongga ot deismos nou mimif skoita Allah rot mifmin mar ongga oska. Ofa bera Yesus Kristus ongga Allah efen efesa, noba ongga Ofa omfra jah mebaga fob. Noba erek mimif magot rot oida mudou ororu Ofa efen oga fob tein, jefeda mimif muroru oga insa koma rot ahais ojgomu.
15Noba Yesus, ongga erek mifmin imam egens ongga ofoka aksa, bera ejginaga rot teinefa mifmin mudou efesi enahais rot mar ongga ereneni mimif guru. Jeska gij mona ongga Ofa engker gu mebif ros, beda mar okum ereneni Ofa tein. Tina Ofa enesiri gu mar koma jinaga guru.
16Jefeda oufa nou mimif tein mirejgei mar jeska Allah rot mudou ongga enemeesa guru. Jeska Ofa bera ongga ofoka ereij keingg rusnok nomnaga rot odou ongga oufamofa eteb. Mimif mirejgei Ofa rot mar erek koma jeskaseda Ofa omofij mimif rot odou ongga eskeira gij mona ongga mar ereneni mimif. Beda mimif mimesma mudou efesi ongga ahais rot si.