Alkitab Mobile SABDA
[VER] : [MEYAH]     [PL]  [PB] 
 <<  Kisah Para Rasul 12 >> 

1Gij mona insa koma tein raja Herodes obk efen rusnok jeskaseda ragei rusnok ongga ruroru Yesus gij kota Yerusalem fogora omofra mar okum keingg rua.

2Ofa tein obk efen tentarer jeskaseda rira meiteb riragob Yakobus ongga Yohanes efen mokora fogora agos.

3Herodes ek, tina rusnok Yahudi ongga runororu Yesus guru bera rudou eskeira eteb rot ofa jeska ofa otunggom mar ongga ofogog insa koma skoita Yakobus. Jefeda ofa obk efen tentarer deika jeskaseda ragei Petrus tein. Ofa otunggom mar insa koma gij mona eteb egens ongga ruis ofoka Paskah.

4Nou ongga rua ranggei Petrus fob, beda rua raha ofa gij mod oskusk fog. Beda Herodes obk efen tentarer ebic tohkuru jeskaseda rut joug Petrus rot ahais. Tentara Ebic egens erek tentara rufok tohkuru. Ofa osujohu rot oida Petrus ah gij mod oskusk jah suma onjoros mona ongga eteb insa koma omoisa fog. Beda ofa omoroun Petrus noba omoga ojga rot ofa erek teinefa jah rusnok Yahudi rudou nomnaga.

5Jefeda rua raha Petrus gij mod oskusk ojgomu. Tina rua ongga ruroru Yesus gij Yerusalem rum riteij rot ahais gu Tuhan nou Petrus ojgomuja.

6Gij motu juens bera Petrus ahca gij mod oskusk rot efen etma ongga rirakid fob. Noba tentara gegeka gaha ofa gu gefekesa. Noba tentarer rineya ongga runt joug montoj mod oskusk koma. Noba gij monog rahah tentena, beda Herodes omoroun Petrus fogora omoga ojga rot Petrus erek teinefa jah rusnok rudou.

7Gij motu insa koma ros beda Petrus ah ahaingkongka fob. Beda malaikat egens jeska Allah orogna rot efesa erek eisa eteb noba ot desi Petrus. Beda ofa ebs Petrus noba agot oida, "Ei Petrus! Bidebecki ebeirens!" Ainsa koma tein rantai ongga angh tumu Petrus etma ohoda noba esiri jeska.

8Beda malaikat egens koma agot oida, "Birgi meisoufa bebin noba birakid mek meifos tein." Beda Petrus ororu malaikat egens koma oga ojgomu. Beda malaikat egens koma agot deika oida, "Buk mohkowu bebin noba buroru didif ojgomu."

9Jefeda Petrus ororu malaikat egens koma jeska morongsu gij mod oskusk. Tina Petrus enejginaga rot oida malaikat ongga enagot mar gu ofa bera erek mar ongga tenten guru. Jeska ofa osujohu rot oida mar insa koma bera erek mar ongga Tuhan oncunc gu ofa gij odou efesi ojgomu.

10Erek koma beda goga gerabj tentarer ongga runt joug montoj ongga egens. Beda goga gerabj tentarer ongga runt joug montoj ongga egeka tein. Beda goga genjesaga gu montoj besi ongga omf joug mod oskusk nomnaga. Tina montoj koma ohoda jeska rua ojgomu, beda goga gorogna noba gecira morototuma erek ai yes fog. Beda malaikat egens koma eseiseifa jeska Petrus.

11Beda ainsa koma tein Petrus odou ebriyi gij mar insa koma nomnaga ongga ofa engk fob. Noba ofa agot gu esinsa oida, "Ebeibeyaif didif dijginaga rot tenten fob oida Tuhan bera onobk malaikat egens koma jeskaseda osuwa didif jeska Herodes efen owesa efek jera mar ofogog ongga rusnok Yahudi tein rudou os rot Herodes otunggom skoita didif!"

12Nou ongga Petrus odou ejginaga rot tenten oida Allah oroun ofa jeska mod oskusk fob, beda ofa eja jah mod ongga Maria efen. Maria koma bera erek Yohanes efen mosu. Noba Yohanes bera ongga rusnok rijeka ofoka Markus tein. Gij motu insa koma tein bera rusnok rufoukou ongga ruroru Yesus rumohoturuma gij mod egens jeskaseda rum riteij gu Allah rot Petrus.

13Noba askesi rua rum riteij ros, beda Petrus ensaga gu mod insa koma noba ofa engkingk montoj jah mebah. Beda ojaga egens ongga ofoka Rode ojohoda montoj. Ofa erek osnok egens ongga omfij gij mod egens koma.

14Nou ongga ofa ojohoda montoj koma, beda ofa eg oga egens koma. Beda ofa osujohu oida koma bera erek Petrus oga. Jefeda ofa odou efaga ouka eteb, tina ofa onohoda montoj jeska Petrus enesi. Tina ofa oira ebeirens gij morongsu, beda agot gu rua oida, "Petrus bera onot jah mebah kef!"

15Tina rua ragot gu ofa oida, "Merei ok bua fob ei." Tina ofa agot deika oida, "Guru! Koma tenten! Petrus bera onot jah mebah!" Jefeda rua ragot gu ofa oida, "Koma bera malaikat egens ongga ot joug Petrus ojgomu!"

16Tina Petrus onot jah mebah noba engkingk montoj ojgomuja. Jefeda rua ruhoda montoj beda rik, tina tenten Petrus bera koma. Beda rua rudou oubsaha eteb rot!

17Erek koma beda Petrus era etma ereni gu rua oida, "Iwa iker toumou fog jeskaseda didif difesij rot teinefa Tuhan oroun didif jeska mod oskusk koma." Nou ongga ofa emfesij rot mar insa koma fob, beda ofa agot gu rua deika oida, "Iwa ijefesij rot mar kef gu Yakobus jera rusnok enjgineg ongga ruroru Yesus tein." Beda ofa orogna jeska mod egens insa koma noba eja jah monuh enjgineg.

18Erek koma beda gij rahah tentena tentarer ongga runt joug mod oskusk insa koma rik, tina Petrus eneker desi rua deika guru. Jefeda rudou eineina gij noba rimejekema rot ruga ofoukou, jeska rua rinejginaga rot meidu ongga ofra Petrus guru.

19Jefeda Herodes obk efen tentarer jeskaseda ruhca Petrus. Tina rua rinek ofa deika guru. Beda Herodes obk rusnok enjgineg jeskaseda rijeka joug tentarer insa koma ongga runt joug Petrus gij mod oskusk. Beda ofa obk rusnok jeskaseda ragob tentarer insa koma ojgomu. Nou ongga koma oisa fob, beda Herodes eja jeska monuh Yudea noba ejeker gij kota Kaisarea.

20Raja Herodes otkonu oska eteb skoita rua ongga kota Tirus jera kota Sidon. Jefeda rusnok rineya jeska kota egeka insa koma rija morototuma skoita Herodes. Tina gij mona ongga rua rinefesij mar jera Herodes enesi, beda rua rija skoita osnok egens ongga omfij Herodes rot iskusk ongga ofoka Blastus. Beda rua rirejgei ofa jeskaseda ofij rua rot mar ongga rimagot skoita Herodes. Beda rua nomnaga rija skoita Herodes noba ruis gu ofa jeskaseda ofa onotkonu oska rot rua deika guru. Rua rudou os erek koma jeska rusnok ongga ringker gij kota egeka insa koma bera risma maat nomnaga jeska Herodes efen monuh.

21Gij mona ongga raja Herodes emagot rot, beda ofa ergi meisoufa ongga ongkoska yahi noba ejeker gij efen kursi jeskaseda efesij mar gu rusnok.

22Nou ongga rusnok rufoukou jah suma ringg mar ongga Herodes anggot gu rua fob, beda rua ruis rot ruga eteb oida, "Oga enerek rusnok ruga ojgomu guru. Tina efen oga kef erek oga jeska Allah esinsa!"

23Gij mona insa koma tein, Allah obk malaikat egens jeskaseda en noba ofra mar okum keingg Herodes, jeska ofa ofra esinsa ofoka erek aksa eteb, tina ofa onougif gu Allah guru. Jefeda Herodes maren eteb, noba mofumfou et ofa fogora ofa agos.

24Gij mona insa koma bera rusnok rufoukou ringg rot Allah oga ongga oufamofa, jefeda rusnok ongga rumororu Yesus rija erek ekirsa odudu dokun deika.

25Gij mona ongga Barnabas jera Saulus gontunggom mar oisa fob gij kota Yerusalem, beda goga goksons jah kota Antiokhia. Goga goroun osnok egens ongga ofoka Yohanes Markus morototuma jera goga.


  Share Facebook  |  Share Twitter

 <<  Kisah Para Rasul 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel