Dual Panel1Paulus jera Silas gecira jah monuh Amfipolis jera monuh Apolonia onjoros gensaga kota Tesalonika. Mod egens ongga Yahudi rum riteij gu Allah gij bera onot gij kota koma.
2Jefeda erek giskini, Paulus eja jah mod insa koma jeskaseda rifesij mar jera rusnok jah suma osok gij Mar Efeyi Ebsi efen ofou. Rua rifesij moguma erek koma gij mona ongga Sabat ojgomu.
3Paulus oftuftu rua noba ocunc gu rua rot koisoisa gij Mar Efeyi Ebsi oida Kristus ongga Allah anggot eimofoj nou emen jeskaseda eita eiteij ah ongga efeinah gu rusnok bera eita efera okora sismeni fog, beda Ofa emedebecki jeska anggos tein. Paulus agot oida, "Yesus ongga didif dimfesij rot gu iwa fob, Ofa bera Kristus ongga Allah anggot eimofoj nou emen jeskaseda eita eiteij ah ongga efeinah gu rusnok."
4Jefeda Yahudi rineya ongga ringg rot mar insa koma ruroru oga ongga oufamofa insa koma. Noba rua rudou eja erek egens jera Paulus jera Silas. Erek koma tein, rusnok ongga Yunani rufoukou ongga rugif gu Allah jera rujaga rufoukou ongga rufoka aksa tein ruroru oga ongga oufamofa insa koma ongga Paulus emfesij gu rua fob.
5Tina rusnok ongga Yahudi rineya rudou ejisei noba oska rot Paulus jera Silas. Jefeda rua ruhoturu rusnok ebireira ongga ringker rourou gij pasar. Beda rua rusos rusnok insa koma jeskaseda rutkonu oska eteb rot Paulus jera Silas. Beda rua nomnaga rija gu moroju gij kota koma noba ruga ofoukou rot mar ongga Paulus jera Silas gontunggom fob. Beda rua rujohca Paulus jera Silas ongga gengker jah mod ongga Yason efen jeskaseda rikris goga skoita rusnok riskemba koma.
6Nou ongga rua rinsaga gu Yason efen mod beda rua rik, tina Paulus jera Silas geneker jah suma deika guru. Jefeda rua rikris Yason jera efen rusnok enjgineg tein ongga ruroru Yesus skoita ebirfager ongga rufoka ereij keingg rusnok gij kota koma. Rua ruga erahah noba ruis oida, "Paulus jera Silas jera gegan gohujir insa kef, rua nomnaga runtunggom mar ongga oska gij monuh ofoukou fob, noba ebeibeyaif rua rutunggom mar ongga oska gij mifmin kota kef tein fobo!
7Noba Yason kef, ofa bera oroun Paulus jera Silas gij efen mod tein! Noba rua kef nomnaga ragot oida raja eteb egema ongga ofoka Yesus enofoguma. Tina mar ongga rua ranggot insa koma bera ekirsa rot mar ongga raja Kaisar anggot rot sis fobo. Jeska raja Kaisar esinsiyai bera erek raja eteb ojgomu."
8Rua ranggot mar erek koma, jefeda rusnok rufoukou jera ebirfager gij kota insa koma rutkonu oska eteb skoita Paulus jera Silas tein.
9Jefeda ebirfager insa koma rubk Yason jera efen mohujir jeskaseda rita fifi gu ebirfager insa koma erek orocunc rot oida Yason omot joug Paulus jera Silas rot mar insa koma. Noba erek goga gemfesij mar deika, beda Yason jera efen mohujir rineita fifi insa koma sons guru. Beda ebirfager insa koma rubk rua jeska.
10Gij motu insa koma bera rua ongga ruroru Yesus gij Tesalonika rubk Paulus jera Silas jah kota Berea. Noba gij mona ongga goga gensaga jah kota Berea fob, beda goga geja jah mod ongga rusnok Yahudi rum riteij gu Allah gij.
11Rusnok ongga ringker gij kota Berea koma bera rudou eriaga ekirsa jeska rua ongga ringker jah kota Tesalonika. Rua rig rot mar ongga Paulus jera Silas gemfesij gu rua osok gij Yesus oga. Noba rua rudou efaga ouka eteb rot mar insa koma. Noba orofosut mona beda rua ruhca gij Mar Efeyi Ebsi jeskaseda rik gu risinsa rot oida mar ongga Paulus emfesij gu rua bera erek tenten ei era gurei.
12Rusnok ongga Yahudi rufoukou ruroru Yesus gij kota insa koma, noba runer jera rujager ongga erek Yunani tein noba ongga rufoka aksa ruroru Yesus gij mona insa koma.
13Nou ongga rusnok ongga Yahudi gij kota Tesalonika ringg rot oida Paulus oftuftu rot Allah oga gij kota Berea, beda rua rija jah kota koma jeskaseda rusos rusnok jah suma fogora rudou oska skoita Paulus jera Silas.
14Erek koma jefeda rua ongga ruroru Yesus gij kota koma rubk Paulus ebeirens jah mei mojumu efembra. Tina Silas jera Timotius geker gu kota insa koma ojgomu.
15Gij mona ongga rua ruroun Paulus jah kota Atena fob, beda rua ruksons jah kota Berea. Beda rua ragot gu Silas jera Timotius oida Paulus odou os goga tein gostoij ofa ebeirens jah kota Atena.
16Askesi Paulus eker nou Silas jera Timotius gij kota Atena ros, beda ofa odou okum eteb jeska ofa ek mar ofoukou ongga angh gij kota koma ongga rusnok rugif gu.
17Jefeda gij mona ongga Sabat beda ofa eja jah mod ongga Yahudi rum riteij gij. Beda ofa efesij mar moguma rot Allah oga jera rusnok Yahudi noba jera rusnok enjgineg tein ongga rugif gu Allah jah suma. Noba orofosut mona bera ofa eja jah pasar jeskaseda efesij mar jera rusnok nomnaga ongga ringker jah suma.
18Rusnok ongga ruroru mar ongga Epikuros omftuftu rot sis fob jera rusnok ongga ruroru mar ongga Stoa omftuftu rot sis fob bera riker gij kota insa koma. Noba rua nomnaga ruga emesedema rot mar ongga Paulus omftuftu fob. Beda rineya jeska rua ragot osok gij Paulus oida, "Ah! Isok kef bera awesi efei ojgomu. Ofa odou osumsumu ojgomu?" Noba rineya jeska rua ragot oida, "Isok kef bera efesij rot mar ongga rusnok monuh enjgineg rugif gu ojgomu." Rua ragot mar erek koma jeska Paulus efesij rot oga ongga oufamofa osok gij Yesus. Noba ofa efesij rot teinefa rusnok ongga ranggos rimedebecki sons jeska ranggos tein.
19Jefeda rua ruroun Paulus jah memaga ofos ongga ofoka Areopagus jeskaseda rumohoturuma jah suma. Beda rua ragot gu ofa oida, "Memef modou os meg deika osok gij mar ongga efeinah insa koma ongga bua bimfesij rot fob.
20Jeska bua bimfesij rot mar onswos ongga memef meneg rot enesi."
21(Rua ragot mar insa koma jeska rua ongga kota Atena jera rusnok enjgineg tein ongga ringker jah suma rudou os eteb rimfesij moguma rot mar onswos ongga rua rig jeska rusnok efeinah ongga rin jah suma.)
22Erek koma beda Paulus ot nou efesij mar gu rua gu memaga ofos Areopagus insa koma. Ofa agot oida, "Iwa ongga Atena. Didif dik oida iwa idou os eteb yugif noba yum iteij gu mar ofoukou gij kota kef.
23Jeska gij mona ongga didif dicira noba diajga joug mar gij kota kef, beda dik mar ofoukou ongga iwa yugif gu. Noba didif dik mar egens ongga iwa yugif gu, tina runggu tumu mar egens koma oida, 'Gu mar egens ongga ah jah mebaga ongga menejginaga rot enesi.' Ebeibeyaif didif dimefesij gu iwa osok gij mar egens insa koma ongga iwa inejginaga rot enesi.
24Allah, ongga ontunggom mebif jera mar nomnaga ongga angh gu mebif, Ofa bera erek Tuhan ongga ofoka ereij keingg mebaga jera mebif nomnaga. Ofa eneker gij mod egens ongga rusnok rii fogora rugif gu guru.
25Allah koma bera ongga eita efena ebah jera awesi efeni jera mar nomnaga gu rusnok. Jefeda enadaij nou rusnok rufij Ofa jinaga guru.
26Noba oisouska osnok orna egens bera Ofa ontunggom rusnok mebif nomnaga fob. Beda Ofa obk rusnok insa koma rijeker rejrej mebif nomnaga. Ofa tein anggot rot mona kenefa jera monuh sinefa bera rua rijeker gij.
27Ofa otunggom mar erek koma jeskaseda rusnok ruhca Ofa. Noba erek rua ruhca Ofa, beda rua rimek Ofa si. Tina ongga tenten bera, Allah eneker yes jeska mimif guru.
28Jeska sis fob osnok egens agot oida, 'Ofa bera ongga eita eiteij ah gu mimif. Noba oisouska Ofa bera mimif micira noba miker gu mebif nomnaga.' Erek koma tein, yeyin osnok egens ongga of medemer sis fob agot rot Ofa oida, 'Bua birek mimif nomnaga mifmin mika.'
29Mimif nomnaga bera ongga erek Allah efen efeser. Noba jeska mimif mirek Allah efen efeser, jefeda enadaij nou mimif musujohu rot oida Allah bera erek mar ongga rusnok runtunggom jeska emas ni, era perak ni, era mamu tein ni guru.
30Jeska sis fob mifmin mimower rudou osumsumu rot mar insa koma ojgomu. Tina Allah onofra okum keingg rua rot guru. Erek koma tina ebeibeyaif Ofa odou os jeskaseda rusnok nomnaga rimeesa joug rerin mar ongga oska.
31Jeska Ofa anggot rot oida gij mona juens ongga emen bera Ofa omoga ojga rot rusnok nomnaga rerin rita mar ongga oska jera mar ongga oufa tein. Ofa omotunggom mar insa koma rot tenten oisouska osnok egens ongga Ofa oncunc fob. Noba Ofa oncunc gu rusnok nomnaga rot oida mar insa koma bera erek tenten ojgomu. Jeska Ofa omfra osnok egens insa koma jeska anggos fob."
32Nou ongga rusnok insa koma rig Paulus agot oida rusnok rimedebecki jeska ranggos, beda rineya rutut rot ofa. Tina rineya ragot gu ofa oida, "Memef modou os meg rot mar insa koma deika ojgomu."
33Nou ongga rua nomnaga rimfesij mar moguma oisa fob, beda Paulus eja jeska rua.
34Tina rineya jeska rusnok insa koma ruroun mar ongga Paulus omftuftu fogora rua ruroru Yesus. Osnok egens jeska rua insa koma bera ofoka Dionisius. Ofa bera erek ebirfaga egens jeska rua ongga rumohoturuma gu memaga Areopagus ofos. Noba ojaga egens ongga ofoka Damaris jera rusnok enjgineg tein ruroru Yesus.